رواية ودق قلبى لها الفصل الثانى 2 بقلم أم فاطمة
رواية ودق قلبى لها البارت الثانى 2
رواية ودق قلبى لها الجزء الثانى 2
رواية ودق قلبى لها الحلقة الثانية 2
رواية ودق قلبى لها بقلم أم فاطمة
 |
| رواية ودق قلبى لها |
رواية ودق قلبى لها الفصل الثانى 2
ودق قلبى لها ❤️
اسكريبت 2
................
بسم الله والصلاة والسلام على رسول الله 🌺
لم يدق قلبى لابنتها ولكن دق قلبى لها هى ، فاعذرونى فليس قلبى بيدى .
عندما وجدت سهير أن زين مازال شارد ولم يتحدث مع العروس بأى كلمة رغم مرور ساعة على تواجدهم ، فشعرت بالخجل ، لذا ارادت إنهاء تلك الجلسة حتى لا تتعرض للإحراج مع الناس أكثر من هذا .
لذلك رددت ...طيب يا ست الكل نقوم إحنا بقا ، عشان منكترش عليكم .
واكيد لينا معاد تانى قريب بعد ما تكون العروسة استخارت ربها كده ،وربنا يقدم اللى فيه الخير .
توددت انهار بقولها ...ما لسه بدرى يا حاجة ، والله قعدتكم حلوة وانا اتشرفت بيكم والله .
سهير ...بدرى من عمرك يا بنتى .
ثم نظرت سهير إلى الذى يقف بجوارها بجمود ، لتنكزه بغيظ مرددة ....سلم على عروستك يا ابنى قبل ما نتكل على الله ونمشى.
حمحم زين بحرج ...اه ، حاضر .
تستأذن احنا ثم رمق انهار بنظرة شوق طويلة قائلا ...ونشوفكوا تانى على خير .
فالتفتت انهار من الخجل وقالت لابنتها وصلى صحبتك لتحت يا بنتى .
سهير ...لا ملوش لزوم يا بنتى .
احنا عارفين سكتنا كويس .
لتقبلها بعدها سهير وتليها زينب ثم مد يده زين ليسلم عليها ، لعله يلمس يديها ليدفىء قلبه المشتاق .
ولكنها وضعت يدها على صدرها تعبيرا عن أنها لا تسلم على الرجال ، كما فعلت ابنتها مثلها .
فزداد إعجابه بها وتعلقا بتلك العفيفة فى صورة حورية من الجنة .
وعندما غادر زين مع أهله.
ابتسمت أنهار لابنتها قائلة ...شكلهم ناس طيبين اوى .
ربنا يكرمك يا حبيبتى ويسعدك .
تقى ...فعلا يا ماما ، بس مش عارفه حاسه ان العريس كده كان تايه ، وعينيه حزينة ومش معايا خالص .
تفتكرى ممكن مكنش عجباه ولا ايه ؟
أنهار ...ايه مش عجباه دى !
ده أنتِ تعجبى الباشا يا قمرى .
ويمكن بس مكسوف يا بنتى ، وعلى العموم كل شىء نصيب .
وربنا يكتبلك كل خير سواء معاه لو فيه نصيب أو مع غيره .
ده نصيب ورزق مكتوب يا حبيبتى ، يعنى مفيش منه مهروب .
المهم بس السعادة يا حبيبتى.
لان الجواز يا سعادة أبدية ، يا شقاء أبدى لو كان انسان مش كويس .
تقى ...اه يا ماما ، وده مخوفنى اوى .
ربنا يستر فعلا ، عشان أنا اتحرمت من عطف بابا ، وعشان كده بتمنى زوج يعوضنى بحنانه عن اللى اتحرمت منه .
مش يزود عليه الوجع .
فبكت انهار على وجع ابنتها ، فاشفقت تقى عليها .
فاحتضنتها بحب مرددة ...ربنا يحفظك ليا يا امى .
أنتِ كنتى نعم الام والأب فى وقت واحد .
وعمرك ما حسيت معاكى انى يتيمة .
ومهما عملت ليكى ،مش هوفيكى حقك عليا .
........
وصل زين إلى شقتهم ، فعاتبته زينب .
كده يا زين ، متكلمش اى كلمة مع البنت ، ايه مش معقول مش عجباك !
دى زى القمر وصغيرة وفى نفس الوقت محترمة جدا ووالدتها ست زى العسل وحنينة اوى ومعندهمش اى مشكلة فى الولاد ، يعنى ربنا عوضك بناس زيهم .
يبقا ليه السكوت ده ؟
جلس زين على اقرب مقعد ثم فرك فى يده وحاول التحدث بصعوبة وزينب ووالدته منتظرين كلماته .
زين ...البنت فعلا حلوة بس ....!
سهير ...بس ايه يا ابنى ، دى مفهاش عيب .
زين ...عارف ، بس انا مش عايز البنت ، انا عايز امها .
لتتسع مقلتى زينب وسهير عن آخرها ليرددوا فى آن واحد ....ايه ؟
سهير ...انت بتقول ايه يا ابنى ؟
ازاى ندخل نخطب بنت وتبص لأمها.
ده ميصحش وعيب .
وكمان اى راجل بيحب البنت الصغيرة وجى انت عايز وحدة من سنك الدنيا جت عليها كتير ومبقتش فيها حيل لجواز ولا تربية عيال .
لا ده مش كلام عاقلين ابدا يا ابنى .
زينب .. فعلا يا زين ، مينفعش بعد ما اكلمنا على البنت ، نكلم على امها ميصحش ، ازاى يعنى ؟
وكمان أمها مش هتقبل طبعا حاجة زى دى ، لأنها هتكسر بقلب بنتها .
فياريت كده تهدى وتفكر بعقلك ، والبنت فعلا فرصة ومتتعوضش .
زين ...افهمونى ارجوكم ، انا ميهمنيش السن ولا حتى الجمال ، انا عايز واحدة تريحنى .
وانا اول ما شوفت والدتها قلبى قال هى دى ..
سهير ...يا ابنى انت متوهم عشان شبه المرحومة بس ، دى مش منى يا زين ، دى انهار ام العروسة وحماتك.
مينفعش ابدا تكون مكانها .
اعقل وفكر شوية وصلى صلاة استخارة يا زين .
ولو رفضت البنت ، هنشوف غيرها ، لكن أنسى أن تاخد امها ، مينفعش طبعا .
فقام زين إلى غرفته بعد أن امتلكه اليأس فى الوصول إلى تلك ذهبت بعقله من اول لقاء .
وعلى فراشه أخذ يتململ ويتسائل هل فعلا اعجب بها من أجل أنها تشبهها فقط ام بها سحر خاص امتلك قلبه .
ثم تذكر حنوها على أطفاله وطيبة قلبها .
ثم وجد طفله الصغير سالم ، يقف بجانب فراشه ، ناكزا فى ظهره بيده الصغيرة قائلا ...بابا بابا
فاستدار له وابتسم قائلا ...اهلا حبيب بابا .
سالم ..بابا انا حبيت اوى ماما انهار ، امتى هنروح لها تانى ؟
ليجذع زين من كلماته تلك ثم حاول أن يتحدث عن العروس الصغيرة فقال ...مفروض تقى هى اللى هتكون ماما ، لكن انهار هتكون تيتا زى تيتا سهير .
سالم ....لا مليش دعوه ، انا عايز انهار ماما ، هى حلوة وبتحبنى وانا بحبها .
فأعمض زين عينيه متألما ، لأنها لم تؤثر قلبه هو فحسب بل أيضا ابنه الصغير .
فردد....لا حول ولا قوة الا بالله.
ايه العمل طيب ؟
بس انا مش لازم استسلم ، ولازم أكلم معاها .
يمكن تحس بيا وتوافق .
لأن هى المناسبة ليا اكتر من بنتها وهتقدر تسعدنى .
وانا هعمل كل اللى وسعى واسعدها .
بس ترضى وتراضى قلبى .
لذا قرر زين أن يذهب إليها ، ليحدثها فى الأمر .
.......
وفى اليوم التالى فعلا
وجدت انهار من يطرق عليها الباب .
فتسائلت تقى ...يا ترى مين اللى على الباب ، لما اقوم افتح .
انهار ...لا خليكى أنتِ كملى مذكرتك وانا اللى هفتح ، بس نولينى الطرحة .
وبالفعل وضعت الحجاب على شعرها بشكل عشوائي ،حتى أن بعض خصلاتها ابت إلا أن تتدلى على وجهها المستدير رغم أنها حاولت أن تدخلها .
ثم فتحت الباب لتفاجىء به ، فنبض قلبه لرؤيتها بهذه الهيئة .
ولكنها فزعت من رؤيته بهذا التوقيت وبدون معاد سابق ، فأخذت تحكم غطاء شعرها وهم تمتم...استاذ زين .
هو حصل حاجة ، زينب والحاجة بخير !
زين ببعض الارتباك ..بخير الحمد لله.
وانا اسف انى جيت من غير معاد .
بس انا كنت محتاج فعلا اتكلم معاكى شوية ، ممكن ؟
التفتت أنهار حول نفسها وقد تملكها الحرج ولا تدرى ما تفعل ولكنها فى النهاية لم تجد مفر من القبول فقالت ...اتفضل حضرتك .
فولج زين يتخبط فى مشيته وتساقطت حبات العرق على وجهه من فرط الحرج ثم جلس يفرك فى أصابعه بتوتر .
وجلست أمامه انهار ، لتخرج بعدها تقى ، للتفاجىء به فتبتسم وتحدث نفسها ...ايه هو شكله وقع اوى كده ،ماكان لسه امبارح هنا !
لحق الشوق يناديه ، امال كان قاعد ساكت ليه امبارح ؟
بس تصورى يا بت يا تقى احلو كمان عن امبارح ، اه على حلاوته بس نفسى يتحرك حبتين وتبقا حلاوة بشقاوة .
عشان يحرك مشاعرى .
فتقدمت منهم بخجل وحمحمت ....اهلا بيك يا زين .
ولكنه عندما رآها قطب جبينه ورد ب من اقتضاب وكأنه يقول لها ..مش أنتِ المقصودة ، انا عايز اللى خطفت قلبى دى .
ولكنه من الحرج قال ...اهلا بيكى يا تقى .
وهمت تقى أن تجلس ولكن تفاجئت به يقول...ممكن فنجان قهوة يا تقى .
وهذا لكى تتيح له الفرصة التحدث مع والدتها انهار .
فابتلعت انهار لعابها بخوف بعد أن أدركت أنه يريدها هى .
أما تقى فأومئت رأسها بقبول طلبه ثم ذهبت مسرعة إلى المطبخ .
تقى محدثة نفسها ...ماله الراجل ده بيطرئنى كده ليه !
ولا يكونش مستعجل اوى على الجواز ومكسوف يكلم قدامى .
وعشان كده عايز يكلم ماما .
اه يا خوفى منك يا عبعال .
وما أن تأكد زين من مغادرة تقى حتى هامت عين زين فى أنهار وكأنه يشبع نفسه العطشة إليها .
ولكنها استاءات من نظراته تلك فأردفت...ياريت حضرتك تكلم فى الموضوع اللى جى عشانه .
زين بحرج ...اه بس مش عارف صراحة ابدء منين ؟
ومتردد جدا وخايف شوية بس ياريت تفهمينى صح.
ومترديش على طلبى ده دلوقتى لكن تدى نفسك فرصة تفكرى، عشان متحرمنيش من السعادة اللى اخيرا لقتها لما شوفتك يا انهار .
لتحدق به انهار بريبة قائلة بلهجة حادة ...انت تقصد ايه بكلامك ده يا استاذ زين ؟
زين بحرج ...ارجوكى اسمعينى كويس ، انا اه صحيح دخلت البيت ده كعريس لبنتك ، بس اول ما عينى وقعت عليكى ، حسيت انك اللى نصيبى وقدرى واتعلقت بيكى من أول نظرة ، معرفش ازاى صدقينى بس ده إللى حصل .
وعشان كده جيت اعرض عليكى طلبى للجواز منك انتِ يا انهار ، مش بنتك .
لجمت انهار الصدمة من حديثه ووقفت الكلمات فى حنجرتها واصفر وجهها ولكنها فى النهاية وقفت بعد أن غلت الدماء فى جسدها انهار لتردد بغلظة ....انت شكلك اتجننت أو مش فى وعيك يا استاذ زين .
كلام ايه اللى بتقوله ده !
عيب لما تيجى تخطب بنتى وعينك تلف على غيرها .
وتكسر بخاطر بنتى وده يستحيل انى اسمح بيه يا استاذ.
فوقف زين وحاول أن يهدىء من روعها بقوله ....ارجوكى حسى بيه ، القبول ده من عند ربنا وانا شوفت فيكى انتِ الإنسانة اللى بتمناها.
وبنتك ربنا يكرمها بالأحسن منى .
يكون من سنها وظروفه افضل من ظروفى .
لكن أنتِ مناسبة اكتر ليا .
فياريت تحكمى قلبك قبل عقلك .
انهار ...لا كده كتير .
ثم تابعت بصرامة ....حضرتك دلوقتى عندك اختيارين مفيش غيرهم .
يا تحب تكمل خطوبتك من بنتى ، ولو مش عايزها .
يبقى كل شىء نصيب وتتفضل مع الف سلامه.
لكن اى كلام تانى مرفوض.
تتنهد زين بمرارة مرددا ..
اللى كنت خايف منه حصل ، انك متفهمنيش ، ومتقدريش مشاعرى ناحيتك .
بس انا برده مش هيئس ، وهعتبر برده انك لست مأخذتيش قرارك وانك هتفكرى
وهنتظر ردك .
بس وانتِ بتفكرى ،افتكرى أن حياة أو موت انسان بين ايديكى أنتِ .
وان رفضك ليا هيكون بمثابة حكم بالاعدام .
لكن لو قبلتينى هتحيى قلبى من جديد وصدقينى مش هتندمى ابدا ، لأن هكون ونعم الزوج والسند ليكى .
ومش هخالف ده ابدا .
استمعت انهار لكلماته بأسى ، وتعجبت أنه بالفعل لمس قلبها بكلماته .
واستطاع بكلماته تلك التى خرجت من القلب ان تنعش قلبها الذى موتته بنفسها هى بعد وفاة زوجها ، وتناست أنها امرأة لها الحق فى العيش مع رجل آخر ليشعرها أنها انثى فى حماه ومسئولة منه وتحبه ويحبها .
فهذا شرع الله وحلال طيب ولا عيب فيه .
ولكنها فضلت ابنتها عليها ، حتى لا تأتى لها بزوج ام ، ينغص عليها حياتها .
فضحت بشبابها من أجلها ، وليس شبابها فقط بل عمرها كله فى سبيل سعادتها .
ولكن كيف له أن يفهم ، أنها لن تستطيع قبول عرضه ، لأنها ابدا لن تكون عقبة فى سعادة ابنتها .
فالموت عندها افضل من أن تكسر بقلب ابنتها .
لذا قالت برفض قاطع ...طلبك مرفوض يا استاذ زين .
ثم إشارات بعينها إلى الباب مرددة ....اسفة الزيارة انتهت .
فانفطر قلب زين ولمعت عينيه بالدموع ، فهو فى موقف لا يحسد عليه .
ويعلم أنها على حق ولكن القلب وما أراد .
فهو لا يرى سواها ، والقلب دق لها هى دونا عن ابنتها .
والغريب أن موقفها زاده تعلقا بها ، لأنها ام حنونة فعلا تضحى بسعادتها من أجل ابنتها ..
فنظر لها نظرة طويلة قبل أن يغادر مفعمة بالحب ، حتى أنها أغمضت عينيها ، خشية أن تصبيها لعنة نظراته تلك وتقع فما لا تخشى عقباه .
فهى قد اوصدت قلبها منذ زمن ، فلم يدخله احدا بعد زوجها واقسمت أن تعيش من أجل ابنتها فقط ..
ولم يجد زين مفر من الانصياع لما قالت ، وخطى خطواته نحو الخارج ولكن مع كل خطوة كان يلتفت لينظر إليها ،وود لو عاد وخطفها عنوة ، فهو أصبح كالطفل الصغير الذى يحتاج إلى أمه ولا يستطيع العيش دونها .
ولكنه فى النهاية غادر ولكنه اقسم على المحاولة مرة ثانية أو مرات عديدة حتى ترضى فى النهاية ولن يستسلم قط ، حتى يحصل على قلبها النقى .
خرجت تقى من المطبخ حاملة فنجان القهوة ،ولكنها تفاجئت بعدم وجوده ، ووجدت والدتها تقف متخشبة على وجهها علامات الدهشة ، فتسائلت ....مالك يا ماما ، فيه ايه حصل ؟
ثم تابعت بضحك ....وفين عريسى ، هو لحق يقعد عشان يطفش !
اوعى تكون انتِ طفشتيه يا ماما .
ده لذيذ وعسول صراحة .
فانفعلت أنهار بدورها بسبب ما حدث على ابنتها قائلة...عيب اللى بتقوليه ده يا تقى .
احنا لسه على البر ويعالم النصيب فين ؟
فياريت تكونى عاقلة ومتتعلقيش بحد الا لما تتأكدى أنه نصيبك يا بنتى .
خديها نصيحة منى عشان متتعبيش .
فلمن إذا نصيبها لـزين أم غيره ؟
ولما انفعلت انهار هكذا ؟
يارب تكون الحلقة عجبتكم ومستنية تعليقاتكم الحلوة المشجعة .
ونختم بدعاء جميل ❤️
اللهم زين قلوبنا بالقران واجعله يارب حجة لنا لا علينا
وذكرنا منه ما نسينا وعلمنا منه ما جهلنا .
....
ام فاطمة ❤️ شيماء سعيد
رواية ودق قلبى لها الفصل الثالث 3 من هنا
لقراءة الرواية كاملة اضغط هنا (رواية ودق قلبى لها)
تابعونا على التليجرام من هنا (روايات شيقة ❤️)
