رواية نداء القلب الجزء الثانى الفصل الحادى والعشرون 21 بقلم نورهان ناصر
رواية نداء القلب الجزء الثانى البارت الحادى والعشرون 21
رواية نداء القلب الجزء الثانى الجزء الحادى والعشرون 21
رواية نداء القلب الجزء الثانى الحلقة الحادية والعشرون 21
رواية نداء القلب بقلم نورهان ناصر
 |
| رواية نداء القلب |
رواية نداء القلب الجزء الثانى الفصل الحادى والعشرون 21
الرواية ملك لـ كاتبه نورهان ناصر نداء القلب ♥️ الجزء الثاني الحلقه•21•
كانت تستمع لها بتركيز شديد ، تنساب العبرات من عينيها دون شعور منها ثم أمسكت بيدها هاتفتًا بغصه: مش لوحدك يا حبيبتي
أنا كان حزني على ماما اللي خسرتها في فرح كان عندنا في البلد قبل رجوعكم يا نور مغطي على كل حاجه أنا أكبر منك بأربع سنين وفعلاً كنت بشوف عمي عصام تعبان ومضايق ومرات عمي عايدة مش بطبيعتها بس كنت صغيرة مش فاهمه حاجه وقتها وأمي فقدتها وانا في عمرك كده بنت عشر سنين بس ربنا عوضني ببابا كان هو الدنيا وما فيها ...ووحشني أوي ...وحشني طيبته وحنيته ومحبته ليا وكلامه معايا ....ولما كان بيسيبكم كلكم متجمعين وياجي عندي يقولي يالا يا سمر علشان اخطفك ..ربنا يرحمه ويجمعني بيه قُريب بجد تعبت من الدنيا دي ونفسي أرتاح ..الناس مؤذيين يا نور لدرجه إحنا مش عارفين نتخيلها ....وياما في الدنيا بلاوي .
نور بخفوت ودموعها تسبقها على خدها فتحت قلبها وأخذت تحدثها بما داخلها : العمر بيعدي يا سمر ومحدش عارف السنه دي هيحصل فيها إيه سنه ورى سنه والمشاكل والحزن مبينتهيش كلكم بتقولوا عني عيوطه بتموت في العياط والنكد ...عايزين إيه من طفله عاشت بين أهلها في خناق دايما بيتخانقوا مامتها بتخوفها طول الوقت عايشه بين أهلي خايفه خايفه من أمي في أصعب من كده ولما كنت أسمع صريخها وتزعقتها مع بابا كل شوي كنت بقفل على نفسي الباب واقعد تحت السرير اعيط بالساعات يا سمر وأنا هموت من خوفي مكنش فيه لحظات حلوة ووقت صافي يعدي علينا أمي بتتجنن لما بتشوفني بتخلط بناس من جيرانا أو اتكلم مع حد من الأطفال حتى في الحضانة كانت بتاجي وتفضل مرقباني وتحذر المدرسين إني احتك بحد من الأطفال طفولتي كانت مآساه يا سمر مكنش عندي وقت اضحك معرفش يعني إيه ضحك اصلا ....معرفتش اللعب والضحك غير لما شمس قرب مني وبدأت ألعب معاه واتعلقت بيه أوي حبيته اكتر من أي شيء في الدنيا كنت طول الوقت لازقه فيه ضحكت معاه هو هزرت معاه هو لعبت معاه هو هو حسسني بنفسي بطفولتي اللي معرفتش اعيشها زي بقية الناس كان كل ما يشوفني يشيلني على ضهره يجري في الغيط يجبلي كل اللي يجي على بالي من قبل ما انطق فهمني أوي بيعرف يقرأ اللي جوايا وكل مرة ميدخلش عندي وأيده فاضيه يجبلي عروسه جديدة بيشاركني كل حاجه كان بيقعد معايا يلعب بالعروسه ويتفرج معايا على الكرتون بيسمعني باهتمام دايما مهتم بيا نور عنده خط أحمر حكتله على إللي حصل لماما من صاحبتها طبعاً تفاصيل إللي قولتلك عليها دي أنا عرفتها من جدي الله يرحمه لما مشينا من البلد وسافرنا على هنا وقتها حكالي كل حاجه وحذرني هو كمان وقالي" خلي كتاب حياتك مقفول عليكي ومتثقيش في حد ومش كل حاجه تحصل معاك تجري وتقولي دي صاحبتي وفيها إيه يعني لما أقولها مهي هتفرحلي ؟؟ النفوس بتتغير يا نور يابنتي والقلوب كمان ومتعرفيش اللي قدامك ده بيتمنالك الخير ولا لا جايز يضحك في وشك يبين قدامك إنه مبسوط لسعادتك وهو الد الخصام زي ما ربنا العزيز بيقول ﴿ومن الناس من يعجبك قوله في الحيـٰوة الدنيا ويشهد الله على ما في قلبه وهو ألد الخصام وإذا تولى سعى في الأرض ليفسد فيها ويهلك الحرث والنسل والله لا يحب الفساد ﴾ فدايما اقفلي على قلبك واللي جواك خلي جواكي آه اتكلمي واحتكي بالناس بس مش أوي ومتثقيش في حد يا يابنتي الحسد والحقد بيتولدوا جوه الشخص إللي مبنتوقعش منه كده بسبب كلامنا إحنا يعني هديك مثال عملي يانور
لو إنتي ربنا كرمك وجوزك انسان متقي وعارف ربنا وبيراعيه فيكي ومهنيك وكل طلباتك اوامر وانتي مبسوطه وجوزك بيحبك مروحش أنا بقى حتى لو مش قصدي ولا في نيتي إني اتفاخر ومجرد فضفضه حريم زي ما بتقولوا لـ صاحبتي اللي جوزها عكس جوزك في كل حاجه ضرب واهانه وقلة كرامه ولا بيحبها ولا طايق يشوفها واجي انا بقى واحكيلها على اللي جوزي بيعمله معايا وبيجيب وبيجيب وبيسوي ....خلي حياتك الشخصية مقفولة عليكي البيوت اسرار عارفين يعني إيه الكلمة دي ؟؟ والله العظيم لو تطبقوا الكلمه دي وتفهموها صح مش هيبقى فيه مشاكل والحياة هاتمشي لأن اللي يحصل جوه بيتي مهما كان حاجه حلوه او وحشه ميتعداش باب اوضة نومي ولا يخرج من عتبة بيتي هي دي الست المحترمه اللي أجرها عند ربنا محفوظ وبتعلى في عين جوزها يا نور أحيانا لما بندخل طرف في علاقاتنا بدل ما يهديها بيشعللها أكتر لو كل حاجه حصلت بين اتنين متجوزين وفضلت بينهم وقدروا يحلوا مشاكلهم يبقى خلاص مفيش داعي للبلبله وده قال وده عمل فهماني ياحبيبتي ولو كل واحد خلى في حاله ومش كل ذرة تحصل في حياته يجري ويقول إيه اللي هيخلي انسان مهما كان قريب منك يحقد أو يحسدك مهو من كلامك وهو عارف حاجه عن حياتك مهو انتي اللي بتدي للحقود والحسود فرصة إنه يبقى كده ويتمرد على عيشته ويسخط من اللي ربنا ادهوله وعمره ما يحمده عليه ويبتدي قلبه يتملي حقد وغل وحسد وغيره وغيره يابنتي إحنا بقينا في زمن بنقول فيه يا شر اشتر وبندي فرصة للناس دي تظهر قُدامنا اقفلي على نفسك ومش كل حاجه ينفع تتحكي يابنتي البيوت اسرار طبقي المقوله دي وانتي هترتاحي أتمنى تكوني فاهمه كلامي يا نور "
كان كلامه جميل وبيريحني أوي اتوجعت وجع يا سمر لما خسرته هو كمان كنت متعلق بيه أوي ربنا يرحمه ، ده طبعاً بعد ما شمس اتغير معايا ورجعت لنور البكاءة من جديد وانطفيت خالص وبقت كارهه كل حاجه معرفتش اعمل صداقات ولا أقرب من حد لا في فترة دراستي ولا حتى في الجامعه كان كلام جدي بيلاحقني وتحذيرات ماما ليا واللي حصلها بس نهى صاحبتي غير والله ما قدرتش ما احبهاش هي تعبت أوي معايا لحد ما وافقت نبقى صحاب ومن يومها نور عندها حاجه تانيه بتحبني أوي يا سمر أنا عارفه إن الإنسان بطبعه اجتماعي وميقدرش يعيش بدون الناس الوحدة على قد ما هي جميلة بس قاتله يا سمر بتقتلك ببطء منقدرش نعيش كل واحد فينا في كوكب تاني لازم الحياة تستمر هنقابل ناس وحشين كتير وناس حلوين الحياة مسرح كبير بنتعلم منها كل يوم حاجه جديدة أنا شوفت كتير يا سمر في حياتي شوفت أمي بتموت قدام عيني شوفت بابا تعيس جدا شوفت أهل مبسوطين مع بعض ومعاهم اولاد كتير وأنا كان نفسي يكون ليا أخت مكونش لوحدي كده ومش عارفه ليه خليت شمس يتجاهل أخوه تماما ويهتم بيا بس حسيت إني انانيه زي ما أنا لوحدي ومليش اخوات يبقى الناس تبقى زيي فاخدت شمس ليا عارفه في مرة قالهالي قالي إنتي اخدتيني من أخويا عيطت كتير لأنه معاه حق أنا كنت حاباه ليا لوحدي مكنتش عايزه أشوف اخوات مع بعض أنا طلعت وحشه أوي يا سمر وفرقته عن أخوه عيشت ماهر في مأساتي وحزني وطفولتي التعيسه خليته يجربها وهو لوحده زي ما كنت أنا لوحدي اوقات كتير كنت بشوف نفسي في ماهر وهو قاعد بعيد عننا وأحنا بنلعب ونهيص ونطنطط زي ما أنا كنت كده بالظبط في برلين كنت بشوف الاطفال بيلعبوا في الحدايق مع أهلهم ومبسوطين وأنا قاعده محبوسه وأمي وابويا في عالم تاني وخناقات مستمره ...غِرت من الاخوه دي شمس وماهر كانوا تؤام جميل وأنا جيت دخلت بينهم وفرقتهم بس كان غصب عني أنا حبيت شمس أوي وطمعت فيه ليا لوحدي لو شمس حاسس بالذنب مرة تجاه أخوه فانا الندم والحزن بيقتلني من جوه ألف مرة يا سمر يمكن اللي حصل لرجلي ده عقابي من ربنا لأني فرقت بين آخين .
أنهت حديثها وانفجرت نور في بكاء هيستيري وهي تنتفض بشدة وتشهق بصوت مرتفع وتصرخ بأعلى صوتها بجنون .
انتفضت سمر مكانها ونهضت عن المقعد واقتربت منها وهي تبكي هي الأخرى وخائفة من انفعالها : بالله عليك أهدي نور نور حبيبتي كفاية .... أرجوك .....كلنا غلطانين مش لوحدك متعمليش في نفسك كده أبوس ايدك .....كفايه عياط .....
وقعت سمر على الأرض من التعب وهي تمسك بيد نور بينما نور ظلت تصرخ بشدة بصوت يقطع نياط القلوب : أنا وحشه ....أنا واحده حقيرة .....عملت إيه في حبيبي فرقته عن أخوه .....شمس مش عارف يسامح نفسه بسببي ....ضميره بيأنبه بسببي .....فرقت بين آخين ....يارب ......سامحني ......سامحني .....عملت اييييه فيهم بس لييييه عملت كده ؟؟؟ إزاي اخدته ليا من أخوه ....ليه عيشت ماهر تعاستي ؟؟؟ كان مبسوط مع عيلته اربع سنيين ونص بس وشقلبتله حياته خليته أتعس انسان .....منطفئ .... أنا السبب في تقمصه لـ شمس ......اااااااااههههه يا وجع قلباااااي .....الذنب بيقتلني .....مش عايزه اعيييييش ......يارب ......واحده زيي خساره فيها النفس اللي بتتنفسه .....
- في إيه إيه الاصوات دي ؟ مالها نور ؟
نهضت سمر بتعب واقتربت من نور جاذبة الستار حولها وهتفت بتلعثم وهي تبكي بشده : عندها انهيار عصبي نادي للدكتورة هتأذي نفسها بسرعهه اتحركي !!!
سمر وهي تربت على كتفها بينما نور تصرخ بشدة وهي تردد كلمه واحدة بينما تضرب بكلتا يديها على قلبها بقوة وسمر تحاول إيقافها ولا تستطيع
اخذت نور تردد بدموع : فرقت بينهم ....فرقت بينهم ....عملت فجوه بينهم .........حرمتهم من بعض ......انا انسانه وحشه .....
سمر بدموع : أهدي خلاص هما دلوقت مع بعض ده مش ذنبك فاهمه شمس كمان غلطان ..كل العيلة غلطانه لما اهملوه كده .......كفايه يا نور كفايه قلبي معدش متحمل كل ده ....انا تعبت ....كفايه ....كفايه ....كفايه والله مش قادره استحمل ........
صوت من خارج الغرفة يهتف بهلع وخوف شديد : سمر سمر إيه اللي بيحصل جوه نور بتصرخ ليه ؟
ابتلعت ريقها ببطء وهتفت بدموع : لؤي لؤي نور نور مش راضيه تسكت عماله تصرخ وتعيط جامد قلبها مش هيستحمل كل ده ساعدني !!!
د/ لؤي بتوتر : غطيها كويس دوك ميارا في عملية دلوقت هدخل أشوفها ...
سمر بدموع : ماشي ......
ثم اتجهت نحو الخزانه أخرجت إسدال الصلاة الخاص بنور وخمار كبير وساعدتها في ارتدائهم بصعوبه ونور لازالت تصرخ بشدة ثم سمحت لدكتور لؤي بالدخول
د/ لؤي بهدوء : نور ....نور ...
سمر ببكاء : مش سامعه حد فينا هتأذي نفسها .....نور بتضيع ...... أقول إيه لـ شمس ....؟
د/ لؤي بتوتر : الممرضة راحت فين كده ؟ طيب بصي حاولي تثبتيها هديها الحقنة أنا ثبتي دراعها كويس علشان احقنها فيه .
سمر بدموع: طيب ...طيب
ثم قامت بتثبيت نور التي تنتفض بشدة وتبكي بصوت مرتفع : ماما ....تعالي خوديني عندك بتسيبيني ليييه ؟؟ ملحقتش أشبع من حضنك لييييييه كده بتروحوا لييييه بنتك عملت ذنب لا يغتفر يا أمي ....فرقت بين آخين ....نور واحده حقيره ....واحده سيئه .....
سمر بدموع : لا إنتي مش كده أهدي يا حبيبتي علشان خاطر شمس .....
هتف دكتور لؤي بتعب : ثبتيها اكتر يا سمر !
في حين كانت نور تحرك جسدها بقوة وهي تضرب بقدمها السليمة السرير وتهز رأسها بشدة ،اذعنت سمر له ثم ثبتتها بقوة أكبر ثم وضع دكتور لؤي الحقنة وغرز طرف السن بها حتى استكانت وهدأت حركتها تدريجياً بينما تردد بخفوت : ماهر سامحني ...شمس ... أنا ...أسفه .....
سمر بدموع : قلبي واجعني عليها مش قادره أشوفها كده !
د/ لؤي ببعض الهدوء: إيه إللي حصل وصلها لكده شمس حصله حاجه ؟ أهدي بس وخدي نفسك براحه وفهميني إيه اللي حصل ؟
سمر وهي تمسح دموعها: لا شمس كويس بس هي افتكرت الماضي وفضلت تصرخ .....
د/ لؤي بهدوء: شوفتي بعينك إن الجروح اللي بنسيبها تكبر جوانا بتتعبنا قد ايه ؟
سمر بدموع : مش وقت الكلام ده !
د/ لؤي بهدوء: تمام المهم دكتورة ميارا كانت ناوية تعملها أشعة على المخ والعمود الفقري بس بحالتها دي هنستنى شويه .... نفسيتها سيئه
سمر بدموع: هي عرفت حالة رجلها ...
د/لؤي بهدوء : اممم مكناش عايزينها تعرف دلوقت ...
سمر بقلق : ليه يعني مش قولت إنه مؤقت وشيء زائل ؟
د/لؤي بهدوء: أيوة يا سمر قولت كده بس انتي مستوعبه نصف رجلك من تحت يبقى ميت ده معناه إيه في عصب مقطوع مش مجرد شرخ احتمال نتضطر للتدخل الجراحي والعملية أضرارها خطيرة جدا !
سمر بصدمه واحست بالدوار فجأة وترنحت في وقفتها ، رآها دكتور لؤي فكاد يقترب منها، رفعت سمر يدها تمنعه واستندت بضعف على حافة السرير الذي تغفو عليه نور وهتفت بدموع وهي تحاول استيعاب ما تفوه به : جراحه وعمليه ؟ بس ده مكنش كلامك ...
د/ لؤي بهدوء وحزن : أنا حاولت اطمنكم بس في احتمال للعملية بصي هنهعملها رنين مغناطيسي (MRI) علشان نشوف بدقة أكتر الأنسجة العضلية والأعصاب بتاعت رجلها يمكن الأشعة اللي عملتها ميارا فيها حاجه غلط الأشعة السينية مش بتكون دقيقة أوي ومبتديش صورة كامله فاحنا هنجرب الرنين المغناطيسي ونشوف ولو كده ممكن نجرب التصوير المقطعي المحوسب ده هيساعدنا إنه يدينا صورة كامله عن البنية الجسم الداخلية .
سمر بدموع : استر يا رب ، يارب لطفك ..ده شمس يروح فيها لو عرف بالعملية دي عمليات إيه تاني بس ؟ قلبها ضعيف يا دكتور ...مش هيستحمل كل الضغط ده ...
د/ لؤي بحزن : مهو يا يزول لوحده يإما تفضل بالأدوية وهتضطر أسفا تقعد على كرسي متحرك لأن رجل واحده مش هتخليها تمشي وبعدين الخوف الاكبر إنه يتحول لشلل متحرك وميكونش ثابت وينتشر في جسمها ....يا العملية الخطيرة دي لأنها في الأعصاب ...يا معجزة تحصل وترحمها من كل ده .
سمر بدموع شديدة: يا حبيبتي يا نور !!!
كان يسير وهو يضع يده أعلى رأسه بتعب ، أخذ نفسًا عميقاً عدة مرات ، وفي أثناء ذهابه استوقفه أحدهم وهو ينادي عليه
- ميبو !
توقف مكانه وهو يوليه ظهره ثم التفت له ليرى من يناديه بذلك الإسم شخص واحد فقط مسموح له بذلك : شمس مش معقول إنت هنا ؟
اقترب شمس منه وهو يقول بضحك : لأ هناك ! إيه يا عم فينك كده ؟
(مهاب ده رائد زي شمس وعمر أما أبو فشه عايمه ده من حراس الحدود فاهمين حاجه 😂)
مهاب بضحك: وحشتني كد اكده ! حمد الله على السلامه.
شمس بابتسامه : الله يسلمك يا ميبو ! رايح فين كده ؟
(ميبو هنكتبه زي ما شمس بيقوله علشان متتلغبطوش )
ميبو بابتسامه : هيكون فين يعني بذكائك ده رايح للسنيورة هو أنا ورايا غيرها !
شمس بضحك : سنيورة مين دي ؟
ميبو بابتسامه : مروه زميلتك يا مغفل في الدراسه !
شمس بضحك : الله طب وليه الغلط دلوقت ؟ يعني أنا أعرف منين إنها جاسوسه ولا حتى صهـ...يونيه ؟ إيه هشم على ضهر أيدي ؟؟.
ميبو بابتسامه : تعالى تعالى شاركني في الهم ده دول باردين بشكل مستفز!
شمس بضحك : لأ معطلكش إنت بقى أنا واحد طالع من المستشفى ومرارتي مفقوعه لوحدها وعريس ناوي أدخل دنيا مع نفسك !
ميبو بابتسامه : واطي من يومك !
شمس بضحك : بهزر معاك قولي بس التحقيق عامل ايه ؟
ميبو وهو يتنهد بتعب : بص هي بتنكر علاقتها بلارا وباخوها كمان والتنظيم وكله ومُصره إنها متعرفش احنا بنتكلم عن إيه وإنها مجرد سائحه جايه مصر
عادي ولما فتحنا سيرة مروة واقامتها هنا أنكرت كل ده بشدة وحاليا طالبه تتنقل من هنا بس السفارة الإسرائيـ..لية هنا رفضت تساعدها لأن الأدلة قوية ضدها وأحنا بينا معاهدة سلام فمينفعش تاخد صفها والا ده بقى يبقى تحيز ونخش في حرب ما ليها اول من آخر بالمختصر السفارة بالبلدي كده باعتها .
شمس وهو يفكر : طيب بص ادخل واتصرف عادي وحقق معاها والأوراق اللي معايا دي هتخليها متعرفش تنطق وخد الصورة دي كمان .
نظر ميبو ليده وهتف بتسائل : ايه الملفات دي الأول ؟
شمس بابتسامه : دي صورة من السجل /الملف بتاعها في المدرسه الابتدائيه تبع سوهاج إللي كانت فيها معايا أنا وأخويا والصوره دي في عيد ميلادي أنا وماهر وهي معانا بنفس ملامحها دي متغيرتش كتير شايف العلامة الزرقة دي اللي في رقبتها هتلاقيها لحد اليوم موجوده كمان في جرح في رأسها وخياطته لسه موجوده بردو كنت وقعتها بدون قصد من على سور المدرسه لأنها كانت بتلاحقني في كل مكان بشكل بيضايقني الصراحه فكنت متغاظ منها ولما طلعت ورايا على السور محستش بنفسي وأنا بزقها ..
ميبو بضحك : كانت معجبة قديمه بقى !
شمس بضحك: ولنهارده ياخويا ! ..صمت بُرهه ثم تابع بخبث ....اسمع مني الخطه دي ونفذ كل اللي هقولهولك بالحرف أنهى حديثه ثم أخذ يهمس له بما يفعله ....
تسريع في الأحداث ( المشهد ده انا ذكرته قبل كده هكمل من وقت ما سيرين حضنت شمس )
كانت تضمه بشدة وهي تبكي بينما شمس كان يقف بدون أن يفعل أي حركه
هتف ميبو بخبث شديد وهو ينهي التسجيل : كده بقى نقول باي باي يا سيرين ومبروك عليك الإعدام !
تصلبت في مكانها وفتحت عينيها بزعر وابتعدت عن شمس كـ التي صعقها البرق في إحدى ليالي الشتاء وهتفت بتلعثم : إيه ؟!
شمس بضيق : ده دليل إنك عارفاني كويس وانكارك ده معدش له أي لازمه لو بتحبيبني زي ما بتقولي تساعديني أرجع أخويا ليا أثبت هويته انتي في إيدك كل حاجه .....
سيرين بدموع شديدة : بس كده هموت يا شمس مش هيسكتوا !
شمس بضيق : وأخويا اللي اخدتوه وعايش بهوية مش بتاعته ودمرتوا حياته لوثته ايديه بالدم غرقتوه في قرفكم اييييه اسيبه وأنا مالي كل واحد بيحصد اللي ذرعه !!
سيرين بدموع: هساعدك علشان أكفر عن غلطي إنت كنت ومازلت أنضف شخص قابلته وحبيـ...
شمس بضيق : مروة متكمليش اذا سمحتي وخلينا في المهم ...
سيرين بدموع : حاضر يا شمس هقول على كل حاجه بس ساعدني مش عايزه أموت اضمنلي ده .
نظر شمس إلى ميبو الذي يتابع بصمت ثم تحدث : إيه رأيك يا مهاب ؟
ميبو بابتسامه : الرأي رأيك إنت لو تعاونت معانا مش عارف يمكن يقبلوا يخففوا الحكم من إعدام لـ سجن خصوصا إنها ماقتلتش حد يعني وطول فترة تواجدها هي وعيلتها في مصر ماعملوش أي حركه شغب ...بس سؤال واحد جاوبي عليه بصراحه قبل ما نقرر نساعدك هل بلغتوا في الفترة دي أي أخبار عن مصر اماكن حيويه في بلدنا مثلا احكيلنا كل حاجه ...
شمس بتأييد: بالظبط احكي كل حاجه عملتوها واحنا هنقرر تستاهلي المساعده ولا لأ .
سيرين بدموع شديدة : ليه بتعمل كده ؟ أنا حبيتك من قلبي !! عايزني أموت يا شمس ....
شمس بضيق: مروة لو سمحتي ده مش وقته وعلشان خاطر الزمالة اللي بينا أنا ماسك نفسي عنك فأرجوك متضغطيش عليا اكتر من كده .
سيرين بدموع: تمام يا شمس أسمع هي أصلا خربانه خربانه لو كان في نيتهم يساعدوني كانوا عملوا كده من زمان فات شهر واكتر وأنا مرميه هنا .....
تسلل بهدوء وعلى أطراف أصابعه ثم فتح إحدى الغرف بهدوء وكانت الغرفة المقصودة ،كانت سحر تتملل في نومتها شعرت بأحدهم قد اقتحم الغرفة وفور أن فتحت عينيها، انقض عليها غارزًا تلك الإبرة في عنقها ثم حملها بهدوء وخرج بنفس الخفة التي دخل بها ، فتحت عينيها بعد فترة لتجد نفسها مُكبلة وملقية على الأرض بإهمال فجأة فُتح الباب بقوة جعلتها تنتفض بأرضها بشده نظرت بطرف عينيها إلى تلك الأقدام السوداء التي تقترب منها ، تسارعت دقات قلبها بشدة أحست أن الهواء نفذ من تلك الغرفة ، وتصلبت جميع عضلات وجهها عندما انحنى ذاك الشخص لتقع عينيها على أبشع وجه وُجد في هذا العالم هاهو يبتسم بخبث شديد وهو ينفث دخان سجارته الفاخره : جاهزة يا قُطه ؟
- سحر سحر .....
أفاقت من كابوسها ذاك على صوت أحدهم يقف أعلى رأسها وما إن وقعت عينيها عليه حتى صفعته بقوة وصدى صوت ذاك الكف مدويًا في أرجاء الغرفة كُلها ، بينما اسودت الدنيا في عيني الآخر و .......
يتبع
نداء_القلب ♥️
البارت_الواحد_والعشرين_الجزء_الثاني.
قلمي_نورهان_ناصر .
( ملحوظه قصة اللي حصلت لوالدة نور جزء منها حقيقي وحصل والباقي حبكه درامية من خيالي أنا خدوا بالكم من كلام اللي قالوا جد نور لأنه ميه في الميه مظبوط خلوا حياتكم وسعادتكم كتاب مقفول عليكم اضحكوا وهزروا واختلطوا بالناس بس مش أوي ومش كل حاجه ينفع تتحكي فاهمين والسلام 🚶🏻♀️♥️)
رواية نداء القلب الفصل الثانى والعشرون 22 من هنا
رواية نداء القلب الجزء الثانى 2
رواية نداء القلب الجزء الأول 1
تابعونا على التليجرام من هنا (روايات شيقة ❤️)
