رواية حكاية قمر الفصل الثالث 3 بقلم هاجر محمود
رواية حكاية قمر البارت الثالث 3
رواية حكاية قمر الجزء الثالث 3
رواية حكاية قمر الحلقة الثالثة 3
رواية حكاية قمر بقلم هاجر محمود
 |
| رواية حكاية قمر |
رواية حكاية قمر الفصل الثالث 3
الفصل3:-
نروح لبيت علاء "عم قمر"
كانت بنته روڤان بتحضر شنطتها عشان ترجع لبيت جوزها ساعة ما دخلت عليها امها اميرة وهي بتسألها: على فين؟؟
روڤان بفرحة: هرجع بيتي، لجوزي حبيبي
أميرة بتساؤل: هو كلمك ولا ايه؟
روڤان: ايوه
أميرة بتعجب: والحاجات اللي هتتحط ف الاكل دي؟
فقالت روڤان وهي بتقفل الشنطه: البركه فيكي بقا
أميرة: ماشي
وخرجوا من الاوضه وراحوا ناحية باب الشقة، وقالت روڤان وهي بتفتح الباب عشان تمشي: عاوزه اسمع اخبار حلوه كده
أميرة: ان شاء الله
روڤان: يلا سلام
وباست ايد امها ومشيت فقالت أميرة وهي بتقفل الباب وراها: ربنا يوفقك يا بنتي ويهدي سرك
وقبل ما تسافر عدت على بيت عمها طارق وقعدت مع قمر شوية ومشيت
*********************
نروح لبيت طارق "والد قمر"
يوم يوم ورا يوم ورا التالت بعد زيارة روڤان، وفي الفترة دي لاحظت نبيلة زوجة طارق حاجات غريبة بتحصل في البيت، كانت في ساعات النهار تتخيل ان في حد بيجري في اركان البيت او ان حد واقف يراقبها واول ما تبص ناحيته متلاقيش حاجه، وكانت بتسمع عفش او ازاز يتكسر وباب يتقفل بقوه، اما بليل فكانت تقوم مفزوعه على انفاس حد جنب ودنها او صوت حد من ولادها بينادي عليها او تقوم مفزوعة بسبب كوابيس وحشه اوي، بس مرضتش تقول لطارق عشان متقلقوش، وفي يوم جت مكالمه لطارق "والد قمر" من زوجة اخوه علاء "أميرة" بإنها بتعزم نفسها عنده عشان تحتفل بعيد ميلادها فرد طارق عليها بقلق: بس احنا مش فاضيين النهارده
أميرة بسماجه: ما انا عيد ميلادي الجمعه وهاجي انا واخوك علاء ونحتفل كلنا
طارق بقلة حيلة: تنوروا
أميرة: مع السلامه
قفل طارق الخط ونظر وبص لنبيلة وسألها: هنعمل ايه؟
نبيلة بعصبية: مقولتش ليه ان احنا مش ف البيت؟
طارق: اعملها ايه، قولتلها قالت هتيجي بردو
نبيلة بتساؤل: بس معتقدش انهم هيجوا ف الجو ده، صح؟
طارق: ياريت، ده حتى الاسبوع ده ساقعه اوي
نبيلة: يبقا مش هييجو وده كلام وخلاص
طارق: عندك حق
***********************
وعدت الايام وجه يوم الجمعة، وجهز طارق واياد للصلاة فلبسوا ونزلوا للجامع، اما قمر فضلت مع مامتها في البيت بيرتبوه وبيجهزوا الغدا، وبعد ما الصلاة خلصت رجع طارق واياد للبيت وبعد ساعة قعدوا كلهم يتغدوا سوا وبعد الغدا نزل اياد التمرين بتاعه وقمر دخلت اوضتها تكلم صاحبتها ملك وطارق ونبيلة قعدوا مع بعض في اوضة الجلوس بيتفرجوا على فيلم، وفجأة سمعوا جرس الباب فانقبض قلب نبيلة وقالت لطارق: هما، انا حاسه
طارق: يلا ادخلي البسي الحجاب على ما افتح
نبيلة: حاضر
وراحت تلبس الحجاب وفضلت واقفة عند باب اوضة قمر تشوف مين، واول ما فتح طارق الباب ونبيلة شافت مين اللي واقف قدامه راحت داخله الاوضة بسرعة فسألتها قمر: مين اللي بره يا ماما؟
نبيلة: ده عمك ومراته
قمر بانزعاج: وطبعا هيسألوا عليا مش كده؟
قالت نبيلة بتوتر وهي ترتدي حجابها: ايوه
قمر بغضب: قوليلهم نايمه او خرجت، اي حاجه
نبيلة: طيب يا بنتي
"عند طارق"
بعد ما فتح الباب ورحب باخوه ومراته واول ما دخلت اميرة وقعدت فضلت تدور بعينها على قمر واياد ولما ملقتهمش سألت طارق: اومال فين الولاد عشان نسلم عليهم؟
طارق: اياد في التمرين وقمر...
قاطعته نبيلة بسرعة: عند خالتها
أميرة: طيب
وقعدوا واخدوا واجب الضيافة وقبل ما تنتهي الزيارة قالت أميرة: طيب يلا بقا عشان نحتفل كلنا، هي قمر مش هتيجي؟؟
نبيلة بسرعة: لا اصلها هتبات معاها عشان بنت خالتها عيانه
أميرة بشماته: سلامتها عندها ايه؟
نبيلة بغيظ: برود قصدي برد
أميرة: لا الف سلامة عليها
وقامت وفتحت علبة الكيك الكبيرة وحطت فيها الشمع وولعته،ولما حاول طارق ونبيلة يطفوه متطفاش فقالت أميرة: استنا انا هطفيه
فهمست نبيلة لطارق: انت شايف الشمع؟
طارق: ايوه وشامم الريحه كمان
نبيلة: والعمل؟
طارق: مش عارف
فقالت أميرة وهي بتلم حاجاتها بعد ان طفت الشمع: طيب انا همشي بقا وكل سنه وانتم طيبين
طارق: وانتي طيبه
وبصت لجوزها وقالت: ابقا حصلني
علاء: حاضر....
💞حكاية قمر💞
بقلمي: هاجر محمود
ومرت ساعة بعد ما أميرة مشيت فاستأذن علاء عشان يمشي هو كمان فقال له طارق: ما بدري ياخويا
علاء: معلش اصلي مستني ضيوف في البيت ولسه هجيب ضيافه ليهم
فخطرت فكرة على عقل طارق وقال له: طيب خد الكيك ده، احنا محدش هياكله
علاء: معقول!!!
طارق: اه عادي والزيارات جايه كتير
وقام حاطط الكيكه تاني في عليتها ولفها كويس وادهاله ووصله لحد الباب وودعه وقفل الباب وراه، وبعدها نادى على نبيلة وهو بيقول: مشيوا خلاص
نبيلة بتساؤل: والتورته؟!
طارق: لبستهاله
نبيلة: حسبي الله ونعم الوكيل فيها
طارق: المهم، لازم ندور في البيت لتكون رمت حاجه هنا ولا هنا
نبيلة: طبعا، وانا بكره هروقه واطهره
طارق: ماشي، روحي شوفي قمر وانا هكلم اياد يجي
نبيلة: طيب
********************
وبعد ما راحت نبيلة لقمر عدوا كام ساعة ورجع اياد من التمرين واتشعوا كلهم وناموا، وبعد شوية قرب الفجر صحي طارق فجأه بسبب كابوس وهو بيتنفض وبيذكر الله ومد ايده عالمخده اللي جنبه يتطمن على نبيلة بس ملقهاش جنبه، فقام يدور عليها لحد ما لاقها قاعده في الصالة بتقرأ قرآن فراح ناحيتها وقعد جنبها فبصتله بابتسامه وهي بتقفل المصحف وسألته: ايه اللي صحاك؟
طارق: قلقت بس لما ملقتكيش جنبي وقومت ادور عليكي
وسكت شويه فقالت نبيلة: انا عاوزه اقولك على حاجه مأجلاها من فتره
طارق بقلق: خير
نبيلة وهي بتبص يمين وشمال بخوف: انا عاوزه امشي من البيت ده
طارق باستغراب: ليه؟
نبيلة برهبه: انا بقالي فتره بشوف حاجات غريبه بتحصل وبكذب نفسي، والنهارده صحيت على صوت دب رجلين، قومت اشوف فيه ايه واطمن عالعيال من الخوف
افتكر طارق الكابوس اللي جاله من شويه وشد نبيله لحضنه وقال وهو بيمسح على رأسها بحنيه: عارف
نبيلة بقلق: والعمل؟!
طارق بقلة حيلة: على عيني انه بيت ابويا واسيبه بس هنسيبه، يمكن يسيبونا في حالنا
هديت نبيلة في حضنه وقالت: ربنا يشغلهم بنفسهم
طارق بهدوء: هبدأ ادور من بكره على بيت تاني واول ما الاقي هكلم علاء عشان نبيع ده وكل واحد ياخد نصيبه
نبيلة بابتسامه: ان شاء الله
في نفس الوقت سمعوا اذآن الفجر بيأذن فقال طارق: يلا قومي اتوضي على ما اصحي اياد وقمر عشان نصلي الفجر سوا
نبيلة: حاضر
وقامت تتوضى وراح طارق يصحي الولاد وقاموا كلهم عشان يصلوا مع بعض وبعد الصلاة دخل اياد وقمر اوضهم يقرأوا قرآن ويناموا، اما طارق فقعد مع نبيلة يقرأوا قرآن في البلكونه ولما الساعة دقت ٧ بدأ طارق يجهز عشان يروح شغله ويبدأ يومه وراحت نبيلة تصحي اياد عشان يفطر مع والده وينزل هو كمان الشغل، فأول ما دخلت اوضته لقيته صاحي وشغال عاللاب توب فسألته: ايه ده انت منمتش؟
اياد وهو بيتاوب: لا يا ماما
نبيلة باستغراب: ليه كده؟
اياد وهو بيدعك عينيه عشان يفوق: كان ورايا شغل في رسالة الدكتوراه بخلصه
قرب نبيلة منه بابتسامة وطبطبت عليه وهي بتقول: ربنا يوفقك يا حبيبي
اياد وهو بيبوس ايدها: يا رب يا امي
نبيلة: طيب يلا خلص وقوم عشان تفطر مع والدك هو مستنيك
اياد: ثواني وجاي على ما تحضري الفطار
نبيلة: ماشي
وسابته وراحت تحضر الفطار وبعد دقايق بدأت ترص الفطار عالسفرة وندهت عليه وعلى طارق وقعدوا يفطروا وبعد كده راح كل واحد فيهم على شغله....
💞حكاية قمر💞
بقلمي: هاجر محمود
رواية حكاية قمر الفصل الرابع 4 من هنا
لقراءة الرواية كاملة اضغط هنا (رواية حكاية قمر)
تابعونا على التليجرام من هنا (روايات شيقة ❤️)
تابعونا عبر أخبار جوجل من هنا (روايات شيقة ❤️)
