رواية أميرتى الفصل التاسع عشر 19 بقلم سلمى تامر
رواية أميرتى البارت التاسع عشر 19
رواية أميرتى الجزء التاسع عشر 19
رواية أميرتى الحلقة التاسعة عشر 19
رواية أميرتى بقلم سلمى تامر
 |
| رواية أميرتى |
رواية أميرتى الفصل التاسع عشر 19
قطعت كلامها وملامحها بتتحول للألم وبتمسك بطنها
مؤمن بصدمه وهو بيبص على رجليها
_اميرة..انتِ بتنزفي
بعد جملة مؤمن اميرة فقدت الوعي ومحستش بأي حاجه بعدها
فاقت بعد ساعتين في المستشفى ولقيت نفسها لوحدها في الاوضة
متحركتش من مكانها
وبصيت في السقف بشرود ودماغها بسترجع كل شريط حياتها
من اول طفولتها لحد دلوقت اللحظه دي
لقيت انها كانت شخص كويس جداً مع اللي حواليها وبتديهم حب واهتمام من غير مقابل وعمرها ما أذيت حد
مبقتش فاهمة ليه بيحصل فيها كده وصعبت عليها نفسها جداً
حطيت ايديها على بطنها وابتسمت بحزن
توقعت انه اكيد الطفل نزل بعد ما نزفت
اتكلمت بهمس ودموع
_حتى انت سبتني
الباب اتفتح ودخل مؤمن اللي كانت ملامحه عادية ومش باين عليها اي زعل
ابتسمت بسخرية
_ايه فرحان صح
فرحان ان الحاجه الوحيده اللي كانت هتربطك بيا مبقتش موجودة
بصلها بإستغراب شديد واستنكار
_نفسي تبطلي تشوفيني ابن *** بالطريقه دي
_اومال ملامحك عادية ليه
مش اللي أجهضته ده يبقى ابنك!
قعد جنبها عالسرير واتكلم بإبتسامه
_علشان انتِ مأجهضتيش
ابننا كويس وبخير واللي حصلك ده نتيجة الارهاق والحمدلله قدرنا نلحقك
ابتسامه سعيدة ومرتاحه ظهرت على ملامحها وقع اسيرها مؤمن اللي بيحس انه كل ما بيبصلها بينجذب ليها اكتر
_شوفتي بقا انتِ ظالماني ازاي
اميرة بسخرية
_ظالمه انا صح
مؤمن بمسكنه مصطنعه
_جدا.. قسماً بالله ظالماني وقاسية عليا جداً
انا مش عايز اميرة دي انا عايز اميرة الكيوت والطيبة
_ماتت..والفضل يرجعلك
اتنهد بتعب وقعد جنبها على السرير ومسك ايديها وباسها برقة وبطئ
وبعدها بص في عنيها واتكلم بأسف
_اسف..لو زعلانه مني ف حقك عليا
بالنسبالي انتِ الوحيدة اللي في الدنيا اللي مقدرش على خصامها
انا مش عارف انتِ عملتي فيا ايه
انتِ خلتيني أعيد كل حساباتي من الاول وجديد وحاسس اني..اني محبتش حد غيرك يا اميرة
بصتله بصدمه وعدم تصديق من اعترافه وهو هز دماغه بتأكيد
_قسما بالله كل كلمة بقولهالك دلوقت من قلبي
انا فعلا حاسس اني تعلقي بندى مكنش حب
كان اعجاب طفولة..انجذاب مراهق لبنت حلوه
لكن عمري ماحسيت ان انا مثلا عايز ألمسها
عمري ما فكرت في المستقبل وتخيلتها معايا
على عكسك انتِ
حرفيا بتشقلبي كياني
بتقولي اني لما ببقى معاكي بتحسي ان انا ببقى شايف ندى مش انتِ
علشان بعاملك بحب صح
طب والله العظيم ما ببقى شايف غيرك وقتها
انتِ من اول يوم دخلتي حياتي وانتِ احتليتي جزء من عقلي وقلبي
لدرجة اني استعجلت في جوازي من ندى علشان اهرب من الاحساس ده ومحسيش اني بخونها
الفترة اللي اتهمتيني فيها اني بتجاهلك
انا كنت بدور على نفسي
بشوف انا عايز ايه..وظالم ولا لأ
اسف اني وصلتلك احساس النفور بس انا كنت مبعرفش انام غير وانتِ في حضني آخر اليوم
وده لوحده إثبات اني مكنتش بتجاهلك علشان ندى
كنت هجرتك مثلا لو كلامك صح
لما روحتلها في الحفله مش علشان ارجعها
علشان نظراتها حسسيتني بأكتر شعور بكرهه وهو اني ظالم
علشان كده روحتلها وكانت نيتي اني اوقفها عند حدها
اه اتأثرت بكلامها لما فكرتني بموضوع ابوها وامها
وحسيت ان ممكن اكون غلطت ومدتهاش فرصه تانيه مش علشان الحب..علشان تأنيب الضمير اللي حسيته وقتها نحيتها
لكن اول ما ظهرتي قدامي افتكرت كل اللي عملته فيا وان لو حد ظالم ف هي مش انا علشان كده سبتها وجتلك
لو الحب هو انك تبقى عايز تعيش مع الشخص اللي قدامك لحد آخر يوم في عمرك وكل ما بتلمسه بتحس انها اول مره وابتسامته بتنسيك اي تعب انت مريت بيه في حياتك وبيحتلك من نظرة واحده
يبقى انا مش بحبك يا اميرة
انا بعشقك
دموعها نزلت بتأثر من كلامها وهو مسحها وابتسم بحنان
_مش عايز دموع بعد كده
كل اللي عايزة اني اشوف ضحكتك اللي بترد فيا الروح من تاني..يا أميرتي
حسيت انها تعبت من الهروب منه وانها دلوقت مش محتاجه غيره جنبها ف كان ردها على كلامه كان انها اترميت في حضنه بإشتياق واضح
وساعتها مؤمن ابتسم بسعادة ودفن وشه في شعرها
_وحشتيني
غمضت عنيها وهي بتشم ريحته اللي بتعشقها واتكلمت بشوق اكبر
_وانت كمان يامؤمن
وحشتني اوي
_سامحتيني
بعدت عنه وبصيت في عنيه وهزيت دماغها بموافقه وابتسامه جميله
ابتسم وباسها بحب وشوق وبعد عنها بصعوبه وهو متخدر من قربها
_بحبك يا أميرتي
يا احسن حاجه حصلتلي في حياتي والمفروض اصلي لربنا كل يوم شكر ليه انه خلاكي من نصيبي
معرفتش ترد على حلاوة كلامه واكتفت انها ترجع تاني لحضنه وتغمض عنيها براحه وكأنها لقيت ملجأها الوحيد
بعد عنها وطلع موبايله واتكلم بجدية مصطنعه:
_بعد اذنك بقا يا مراتي انا عايز ميرو صاحبتي علشان لسه نازل موسم من مسلسلنا المفضل وعايزين نتفرج عليه
اميرة لمشاغبه وغيره مصطنعه
_يسلام!
طب انا كمان عايزة اتفرج معاكم
فكر شوية واتكلم بنفس النبرة
_يعني مش هتنكدي عليا انا وهي
_على حسب بقا حركاتكم مع بعض
_خلاص بصي بلاش تجبيها علشان لو
وهمس في ودانها بشوية بكلام
ورجع كمل كلامه
_البت متتكسفش
اميرة بإحراج
_وقح
_حبيبتي تسلمي يارب
بصوا لبعض وانفجروا في الضحك ورجعت لحضنه من تاني وابتدوا يتفرجوا على المسلسل مع بعض طول الليل في المستشفى
___________________
تاني يوم مؤمن كان بيجيب قهوة من كافيتريا المستشفى
طلع تاني لأوضة اميرة لقى راجل غريب اول مره يشوفه حاضنها
ملامحه اتحولت للغضب و...
يتبع
اموت انا في القفلات الجامده😉😂😂😂
#أميرتي
#سلمى_تامر
رواية أميرتى الفصل العشرون 20 من هنا
لقراءة الرواية كاملة اضغط هنا (رواية أميرتى)
تابعونا على التليجرام من هنا (روايات شيقة ❤️)
تابعونا عبر أخبار جوجل من هنا (روايات شيقة ❤️)
