رواية بنت العدو الفصل الرابع والعشرون 24 بقلم ندى على
رواية بنت العدو البارت الرابع والعشرون 24
رواية بنت العدو الجزء الرابع والعشرون 24
رواية بنت العدو الحلقة الرابعة والعشرون 24
رواية بنت العدو بقلم ندى على
 |
| رواية بنت العدو |
رواية بنت العدو الفصل الرابع والعشرون 24
" بنت العدو "
" البارت الرابع والعشرون "
" الكاتبه ندي علي حبيب "
" الساعه بقت 10 بليل وليلي ومصطفي قررو يخرجو يسهرو برا شويه ليلي وقفت قدام المرايا تلبس عبايه خروج بيج وطرحه بيج وسليبر ابيض مريح وشنطه بيضه وميكب خفيف ، مصطفي لبس بنطلون اسود وقميص ابيض وشمر ايده وساعه سودا وجزمه سودا شمواه ورشة برفان وقعد يستني ليلي في الصاله اللي طلعت ليه "
ليلي : حبيبي انا خلصت هاا ايه رأيك ؟؟
مصطفي بصلها من فوق لتحت وفي ايده سيجارته بيشربها : مش مجسمه العبايه دي شويه ؟
ليلي بصت لنفسها ورجعت بصت ليه : العبايه حلوه والله وبعدين انا جسمي تخن شويه من شرب العصير في رمضان اعمل ايه بقا
مصطفي قام وقف وحط فونه في جيبه : يلا يا ليلي تعالي انت عارف ان دا اللي هيحصل وعارف ان الفتره الجايا خناقات علي اللبس بس نسيت اقولك انا حجزت عن دكتوره سماح يوسف نسا وتوليد تتابعي معاها ايه رأيك ؟
ليلي ببتسامه : عسوله ودكتوره شاطر حاضر نروح ليها هنبذء من يوم ايه ؟
مصطفي : معادنا بكرا بس مدام برا وكدا برا نروحلها بالمره
ليلي ابتسمت و مسكت دراعه ومشيت معاه : ماشي يلا علشان منتأخرش
" مصطفي نزل معاها لحد تحت وكان البيت كله نايم يرتاح شويه علشان محدش كان نام الصبح اخدها وركب العربيه ومشي وليلي جنبه "
مصطفي وهو ماسك ايده ليلي وقربها من بوقه وباسها: وامااانه ما تمشي يا قمر الليل اه يا محلي الليل ويااااه حبيبي
ليلي ببتسامه : تعرف ان بحب الاغنيه دي اووي وكنت ديما لما بسمعها بتخيل اننا في يوم هنعد علي البحر بليل والقمر قدامنا وانت حاضني وبنغني الأغنيه دي
مصطفي شدها وضمها وهو سايق : انا بقا عاوز يكون عندي عيله منك وبيت نربي فيه ولادنا بيت يكون انا اللي تعبان فيه وعمله بتعبي وفلوسي غير كدا انا مش طالب من الدنيا حاجه
ليلي ببتسامه : قريب هيكون عندنا كل حاجه بس لازم نصبر ونتعب علشان نحافظ بعدين ومع الوقت كل احلامنا هتكون حقيقه يا ابن الجبراني
مصطفي بحب : ااااااه يابت العدووو ااااه " وباس دماغها بحب "
.........................................
" في اوضة غالب "
" غالب كان نايم ومستغرق اووي في النوم بس فونه مش مبطل رن ودا مضايقه اووي رفع وشه من علي المخده ومسك الفون بضيق واضح ومش عارف مين اللي بيرن اصلا "
غالب : الوووو مين ؟
بسمله : انا خطيبتك ياسي غالب فاكرني ؟
غالب حط راسه علي المخده تاني : فاكرك فاكرك بترني ليه يا خطيبتي خطيبك عاوز ينااام ؟
بسمله : لاء اصحي اتكلم معايا شويه بقالك 3 سعات ناايم
غالب بنوم : يااااربي يا حبيبتي 3 سعات دول نوم عيل صغير بينام ويصحي يعيط علشان جعان ف امه تقوم ترضعه انا بقا هصحي من النوم ليه اتفطمت انا من زمااااان اووي
بسمله : غااالب قوووم اتكلم معايا " وقالت بلويه بوز " انت بتموووت في النسوان يعني قوم بقا وكلمني
غالب قام واتعدل : لاء بقا مسمحلكيش بصي يا بت الناس انا ماشي بمثل اللي بيقول الباب اللي يجيلك منه البنات افرش تحته وبات ؟؟؟!
بسمله بغضب :تفرش و تبااااات فييين يا حبيبي ؟؟؟
غالب : تحت بيتك يعني مش بنات انتي ولا اييه ؟
بسمله : ااااه بحسب
غالب : اجمعي يا حبيبتي اجمعي المهم بتعملي ايه ؟
بسمله : كنت بكلم البت اللي هتيجي تعملي ميكب بكرا واكدت عليها تيجي والخيمه بتاعت الخطوبه بتتنصب برا وخلصت كل حاجه وجيت اكلمك
غالب بنوم : اممممم " وبيتاوب " طب اتكلمي قولي اي حاجه
بسمله بخبث : خلاص مدام عاوز تنام روح نام شكلك تعبان
غالب بفرحه : اانشالله يخلهملك يا بسمله يا بت سالم الحبيب يااارب مع السلامه " وقفل في وشها وعمل الفون وضع الطيران وعدل البطانيه وحط راسه علي المخده ونام " سبحااان الله الفون عمل وضع الطيران لوحده والله الواحد بقا خايف من نفسه علي نفسه
بسمله رنت اكتر من مره بس الفون مغلق : الصباااح رباااح يا غااالب حاااضر " وقفلت فونها ونااامت لأنها مطبقه من امبارح "
....................................
" في الكافيه عند مصطفي وليلي "
" مصطفي وليلي اول ما دخلو الكافيه ليلي شافت مرايه لتصوير وقفت "
ليلي شدت ايده : مصطفي تعالي نتصور بسرعه " وشديته قبل ما يرد حتي وراحو عندها وفضلو يتصورو "
مصطفي شد ايدها بضيق : يلااا يا ليلي انا مبحبش الصور وانتي عرفه تعالي نعد بقا
ليلي : طيب خد صورنا انا وانت وانت ماسك الفون بقا ... اخر صوره والله ؟
مصطفي : ليلي مبحبش جو المرقعه هصور الصوره ومش هنقوم من مكانا تاني " ومسك الفون وسبت ليلي جنبه وحط ايده علي وسطها وصور الصوره وكانت فعلا تخطف القلب وراحو قعدو علي الطربيزه "
ليلي وهي بتبص علي الصور ببتسامه : مصطفي الصور حلووه اووي .. احم لو طلبت منك انزل صوره ليا انا وانت ردك هيكون ايه ؟
مصطفي بكل هدوء : بجد عوزه تعرفي ردة فعلي ... مش هتزعلي يعني وقتها ولا هتقوليلي مفيش راجل بيمد ايده علي وحده والكلام الحمضان دا ؟؟
ليلي بلعت ريقها : لاء يا حبيبي وعلي ايه مش عوزه انزل صور اصلا ؟
مصطفي ولع سيجاره ونفخ دخانها : ننزل صورنا ليه والناس تشوفنا ليه ويعرفو تفاصيل حياتنا ليه ونرجع نتخانق ونقطع بعض ونستغرب ايه اللي حصلنا ليه
ليلي مسكت ايده : خلاص يا حبيبي مش هنزل حاجه المهم متضايقش
مصذفي باس ايدها : كدا احبك اكتر واكتر لما تسمعي الكلام من غير عناد ومن غير ما اقرر كلامي مليون مره كدا اموووت فيكي
ليلي ضحكت : ما انا بسمع الكلام علطول ومش بقول لاء علي حاجه بتقولها ؟
مصطفي ضحك وهو بيضحك كح جامد لدرجة ان عينه دمعت شرب مايه وكمل كلام : دي ليلي حبيبتي اللي بتسمع كلامي لكن ليلي مراتي بقا لما دماغها تعند بتشتغل بالمعكوس اووي بقا
ليلي بصتله شويه بزعل علي الكحه اللي من السجاير وبعدين اتكلمت : وحبيبي مش ناوي يبطل سجاير وعدتني قبل كدا انك هتبطلها ووعدتك ان هييبك براحتك لحد ما تبطل بس شكلك مش ناوي ؟
مصطفي اتنفس نفس عميق وبعدين طلعه واتكلم : هبطلها والله بس مش مره وحده .... يعني وحده وحده انا كنت الاول بحرق بتاع علبتين في اليوم دلوقتي العلبه بتكفيني يومين ودا تطور حلو وحده وحده كل فين وفين هشربها لحد ما ابطلها خالص
ليلي : يااارب يااارب يا مصطفي تبطلها خااالص
الجارسون جيه ليهم ومعاه المنيو : شرفتونا يا فندم " ادلهم المنيو ومشي "
مصطفي بص في المنيو : هااا تحبي تطلبي ايه بقا ؟
ليلي فكرت شويه ونفسها راحت لحاجه قالت بسرعه: انا عوزه مولتن كيك وشاي
مصطفي بصلها وابتسم لان عارف انها مبتحبش الشوكولاته لكن دا الحمل ورجع بص في المنيو : امممم مولتن كيك متأكده ومعاه شاي !؟
ليلي بسرعه : ايوااا هيكون سخن كدا وحاجه حلوه الله هاته بسرعه بالله
مصطفي ابتسم : عيووني لعيووني بس ايه رأيك بقا اجيبلك مع المولتن كيك دا تشيز كيك " مصطفي عارف انها مش هتاكل الشوكولاته علشان كدا اقترح الاقتراح دا لكن ردها صدمه "
ليلي بقرف : لاااء اي حاجه فيها بسكوت مش هاكلها انا عوزه مولتن كيك وشاي ؟
مصطفي نادي الجرسون : بص بقا يا باشا انا عاوز واحد مولتن كيك وواحد شاي وواحد قهوه وشيشه مكس بطيخ مع مانجا
الجرسون ببتسامه : تحت امرك يا فندم اي طلبات تانيه ؟
مصطفي : حبيبي تسلم " الجرسون مشي وليلي ومصطفي فضلو يتكلمو ويضحكو وقامو راحو عند الدكتوره اللي طمنتهم علي البيبي وكتبت علاج لليلي تمشي عليه وراحو كافيه تاني وقضو واجمل وقت مع بعض لحد ما الساعه دخلت علي 1 ونص مصطفي اخدها ومشي علي بيتهم وكان البيت كله لسه نايم طلعو علي شقتهم وغيرو هدومهم ونامو علطول وهما في حضن بعض "
.......................................
" صباح اليوم التاني وهو تاني ايام العيد ويوم خطوبة غالب وبسمله ليلي ومصطفي صحو علي صوت الزغاريط والاغاني اللي موصل لشقتهم "
ليلي قامت بضيق قعدت علي السرير : لا حول ولا قوة الا بالله العلي العظيم طب اللي عاوز يتخمد يتخمد ازاااي " فضلت تدور علي الفون لحد ما لقيته تحت راس مصطفي جابته وبصت في الساعه وكانت 12 وتلت " بيسقفو من دلوقتي لييه معرفش
مصطفي بضيق : يعني انا هلاحقها من الصوت اللي تحت ولا منك نامي يا ليلي خليني اعرف اتخمد ساعه كمان
ليلي بصت في فونه : تنام فين يا روحي دا غالب وجدك رنو بتاع خمستلاف مره والفون صامت
مصطفي اتعدل ودعك عينه : ليه هي الساعه كام دلوقتي ؟
ليلي : 12 وتلت اهي قوم اغسل وشك علي ما اقوم اعمل فطار وننزل تحت علشان امك زمان النسوان اللي تحت دي كلها قالتلهم مرات ابني مبتنزلش غير الضهر قوم قوم
مصطفي اتعدل ونام : قومي بس اعملي انتي فطار وانا هقوم علطول ؟
ليلي حطت راسها علي صدره بنوم ونامت : حاضر هقوم اهو
مصطفي حط ايده علي وسطها وضمه لحضنه ودفن وشه في رقابتها وغطاها كويس : خلاص ماشي لما تخلصي الفطار صحينا بقا " ونامو بعمق "
................................
" في بيت غفران الحبيب "
" البيت كان عباره عن حريم بترقص جواه وناس بتعمل في الخيمه والديجي قدام البيت وعيال بتفرقع بومب وصواريخ "
"في الشقه بتاعت سالم وخصوصا اوضة البنات"
اسماء " الميكب ارتست ": ايه يا عروسه عوزه ميكب ازاي وهتعملي طرحه ولا هتسيبي شعرك ؟
اسراء بضحك : سبيلها شعرها خلي غالب يحلقو ليها ونخلص
اسماء بضحك : خطيبك غيور بقا وخدين بعض علي حب ولا ايه ؟
بسمله ببتسامه : عن حب انا بحبه وهو بيحبني وجيه اتقدم ليا واهلي وافقو المهم انا عوزه ميكب بسيط مش اڤوره وهعمل طرحه
اسماء فتحت الشنطه بتاعت الميكب بتاعها وبدأت تطلع المكياج بتاعها : خلاص ماشي يا سكر " وبدأت تعملها الميكب "
" في بيت غفران الحبيب تحت "
" احلام دخلت علي ام صفوان الاوضه بتاعتها وقعدت جنبها تستناها تخلص صلاة الضهر "
ام صفوان خلصت وبصتلها بستغراب : خير اللهم اجعله خير يا احلام قعدتي واتسهم عليكي كدا ليه ؟
احلام : والله ما عرفه يا ام صفوان النسوان اللي برا يا اختي كلهم بيسألو عن ليلي ومعرفش عرفو بحملها ازاي كل وحده تقولي حملت بسرعه وجوزها راجل طول بعرض وحسد عيني عينك كدا يوليه
ام صفوان : الله اكبر في عينهم بالله مبسوطه ان ليلي مصطفي مرضاش يخليها تيجي عندنا بدري والنسوان اللي برا تشوفها الناس عينها وحشه
احلام : والله خايفه عليها يا ام صفوان ربنا يكملها حملها علي خير ويخليلها جوزها ياارب المهم لما اطلع اشوف رشا بتعمل ايه واجيلك
ام صفوان : ماشي يما ومتحطيش حاجه في دماغك وربنا هو اللي بينجي وقادر ربنا ينجيها يارب
....................................
" في بيت غالي الجبراني "
فاطمه قاعده وبتطبل علي الطربيزه وبتغني بفرحه وغالب قاعد جنبها بيضحك : يا عريس ابقي افتكر سبلي حته من الدكر
غالب بضحك : لاء دي خطووبه يا بطوط لسه مفيش حمام ولا بط لسه
فاطمه : اعملك احلي واجمل دكر بط فيكي يا بلد دا خطوبة الغاالي يولااا
غالب باس ايدها : ربنا ميحرمني منك يا بطوط ابدا
فاطمه : امال مصطفي كل دا نايم ولا ايه ؟؟
غالب : دا انا رنيت عليه بتاع 90 مره ومبردش قولت اسيبه ينام لما يصحي براحته بقا
غالي من علي باب البيت : غاااالب تعالي سلم علي العمده
غالب : جيلك يا حاااج اهو " وقام طلع ليهم برا "
اميمه طلعت ومعاها الدهب تفرجه لنسوان وهي بتزغرط : صلوو علي النبي في قلبكم كدا " بدأت تفرج ليهم الدهب منهم المبسوط ومنهم اللي كانت تتمني لبنتها العدل دا "
نجلاء وحده من الجيران : امال مرات ابنك فين يا اميمه ؟
اميمه بلوية بوز : مرات ابني مبتقومش غير العصر يماا
في نزلة ليلي اللي ابتسمت لأنها عرفه ان دا اللي هيحصل نزلت من علي السلم بجمالها وانوثتها الطاااغيه وهلي وشها ابتسامه : اعمل ايه يا حماتي الحمل جاي معايا بنوم وبعدين جوزي كان فوق معايا في شقتي هنزل واسيبه ازاي بس " وراحت سلمت علي نجلاء " ازيك يا طنط
نحلاء ببتسامه : الصلي علي النبي ازيك يا كبدي
ليلي راحت باست ايد فاطمه : صباح الخير يا ماما فاطمه معلش اتأخرت في النوم شويه النهارده اتأخرت في النوم بليل
فاطمه ببتسامه : علي مهلك يا نن عيني لو تعبانه اطلعي نامي شويه كمان
مصطفي اللي نزل وراها وقال بمهمس وهو بيبوس واس فاطمه : لاء تطلع تنام كمان ايه كدا مش هتنام بليل وانا مبعرف انام غير في خضنها يا بطوط
فاطمه بضحك : اختشي يا ولااا واتكسف وبعدين ما تنام وتتبسط العمر هنعيشه مره وحده ومنعرفش امتي هيخلص يبقي نعيش مرتاحين
مصطفي : كلام صح الصح امااال فين عريسنا اللي قارف ميتين اهلي من صباحية ربنا دا
فاطمه : العمده برا وجدك نادي عليه يسلم عليه
مصطفي : العمده اممممم
" البنات اللي موجوده تقريبا عينهم علي مصطفي بس ودا مخلي ليلي هتتهبل "
ليلي راحت جنبه بهمس : اطلع اعد برا متجيش هنا
مصطفي بصلها بستغراب : بتقولي ايه مش سامع ؟؟
ليلي بصتله بغيظ : البنات هتكلك بعينها يا مصطفي روح اعد مع الرجاله برا متعدش هنا احسن هروح اجيبهم ليك من شعرهم وحده وحده
مصطفي قام وقف وقال بهمس : ما انا سبت العالم كله واخدتك انتي مراتي ياابت وميمليش عيني غير ليلي وبس " وشاور علي الدبله اللي في ايده وهو ماشي "
ليلي ابتسمت بعشق وقالت في نفسها : يا تري هحبك اكتر من كدا فين يابن الجبراني؟!
................................
" بليل الساعه دخلت علي 7 وبسمله خلصت وكانت زي القمر بفستان احمر صك ياده وديل طوويل من ورا وجزمه كعب سودا وطرحه سودا "
بسمله بفرحه وهي بتلف قدام اسراء وشهد : بناااات ايه رأيكم في الفستان شكلي حلو في حاجه نقصه ؟؟
شهد : بالله العظيم قمر قمر قمر الله اكبر " وزغرطت "
دخلت احلام ليهم وكانت لبست وجهزت هي كمان : اللهم صلي علي النبي ايه القمر والعسل دا كله يا بت يا بسبوسه
بسمله ببتسامه : والله شكلي حلو طب امي فين عوزاها تشوفني ؟
احلام : امك برا بتسلم علي الناس اللي جايا " وسمعو صوت تزمير والمزمار اشتغل وعرفو ان غالب وصل " اهو عيلة الجبراني وصلت
" قدام البيت "
نزل غالب من عربيته ووقف قدام غفران وسلم علي وهكذا سالم : سلموووو عليكم يا قوم
غفران بضحك : نورت القوم يابن الجبراني
غالب : انا غالب الجبراني بتتقال مع بعض لكن مصطفي بيتقال ابن الجبراني بس
غالي : كلنا اخرنا اننا جبرانيه بطل تتكلم كتير بقا وادخل هات عروستك
ليلي راحت باست ايد جدها : صحتك عمله ايه يا جدي
غفران حضنها : يا هلا يا هلا بالغاليه ادخلي علي جو يلا جوزك فين
مصطفي جيه من وراها وسلم علي غفران :كنت بركن العربيه اخبارك يا حاج " وبص لليلي انها تدخل وبالفعل دخلت وسلمت علي الكل ودخلت علي بسمله اللي قعده مع البنات في اوضة جدها انتظر غالب "
ليلي دخلت ببتسامه : يا عروسه يا عروسه
غالب من وراها بمرح : انا العريس لوو سمحتي بقا يا مرات ابن الجبراني ابعدي علشان عاوز اخد ايد خطيبتي
ليلي ضحكت وبعدت من قدامه : اتفضل يا غااالب اتفضل اددخل وزل فيا كمان وكمان والله لقول لجوزي
غالب ضحكت ودخل وشاف بسمله : هو النهارده مينفعش نكتب الكتاب والفرح واخدك البيت وخلاص ايييه الحلاوة دي يااابت
بسمله ببتسامه : بجد شكلي حلو يعني ؟
غالب مسك ايدها ومشي بيها : قمررر يابت قمر ايه رأيك في البدله دي شياكه كدا صح
بسمله ببتسامه : قمررر قمررر كدا يولااا " اول ما طلعى من الاوضه الكل زغرط والاغاني اشتغلت وطلعو قعدو في الخيمه وليلي بتتصور هي واسراء وشهد وزينب وكالعاده كنزي قعده مع العيله "
غفران : الدهب فين علشان يتلبس
"مصطفي بص ليلي لان الدهب في شنتطها وليلي جابته ليه "
" وبدأت اغنية يا دبلة الخطوبه عقبلنا كلنا تشتغل والدهب غالب بيلبسو وليلي وقفه جنب جوزها بتصور الخطوبه ببتسامه "
مصطفي : الدبله في اليمين يلاااا انت لسه عيل يدوب خاطب
غالب بصله بغيظ ولبسها في اليمين : خليك في نفسك وفي مراتك يا كبير ؟
مصطفي حط ايده علي وسط ليلي : ما انا فيها اهو امال انا فيك ولا ايه
فاطمه راحت عند ليلي شدتها قعدتها جنبها بخوغ عليها : اعدي النسوان عينهم عليكي انتي وجوزك تتنشي عين وانتي حلوه كدا
" ليلي ابتسمت ليها وقعدت جنبها "
" فرحه ممزوجه بكل المشاعر اللي خايف واللي قلقان واللي مش مرتاح بس الوضع المسيطر علي اليوم هو الفرحه "
"" انتظرو القادم ""
'والحقيقه اني وجدت فيك اطمئناني رغم خوفي منك ..!🔐♥️💫
رواية بنت العدو الفصل الخامس والعشرون 25 من هنا
لقراءة الرواية كاملة اضغط هنا (رواية بنت العدو)
تابعونا على التليجرام من هنا (روايات شيقة ❤️)
تابعونا عبر أخبار جوجل من هنا (روايات شيقة ❤️)
