رواية سرقت زوجى ولكن الفصل الثالث 3 بقلم إسراء إبراهيم

رواية سرقت زوجى ولكن الفصل الثالث 3 بقلم إسراء إبراهيم

رواية سرقت زوجى ولكن

رواية سرقت زوجى ولكن الفصل الثالث 3

الثالث 

سرقت زوجي ولكن 

اتفاجأت ليلي باحمد بيقولها بابتسامة هادية خليتها تفرح اوووي :

ممكن تبقي تيجي بكرة تتكلمي مع فيروز يمكن يعني تتعلم تبقي زيك وتعقل شوية 

ابتسمت ليلي وردت بتأكيد وهي بتبص لاحمد بفرحة ،، وده عشان  اول مرة احمد ميصُدهاش وهو اللي يبدأ معاها كلام من نفسه وكمان يطلب منها تيجي :

طبعا يا احمد  ،، فيروز دي اختي وانا اتمني لو تسمعني عشان حياتكم تكون مستقرة ،، يلا باي 

نزلت ليلي واحمد سرح فيها وكان بيفكر ازاي فيروز رغم انها صحبتها اوي بس دماغها مش زيها خالص ،، حتي طريقة الحوار والتفاهم غيرها خالص ،، نفخ احمد بضيق وبعدين دور عربيته وروح البيت علطول 

............................

كانت فيروز في اوضة مليكة بعد ما نيمت مليكة في سريرها وكانت قاعدة جمبها وبتعيط بحرقة ،، صعبان عليها ان احمد يعمل معاها كدة ويحرجها قدام الناس ،، كانت مش متخيلة انه ممكن يقسي عليها كدة حتي لو هي غلطت كان بيستني ويعاتب بينه وبينها  لكن يهينها كدة قدام الناس عمره ما عملها والاسوأ انه يقارنها بليلي صحبتها ،، مسحت دموعها اول ما سمعت صوت باب الشقة وعرفت انه رجع ،، قامت بغضب وخرجت البلكونة عشان عارفة انه هيدخل يطمن علي مليكة وهي مش عايزة تشوف وشه ،، كانت واقفة بتبص عالنيل والهوا بيطير شعرها وبينشف دموعها اللي نازلة بحسرة لحد ما سمعت صوته من وراها :

واقفة هنا ليه كدة ؟ عشان متشوفنيش مش كدة ؟

لفت فيروز وشها وبصت لاحمد اللي قلبه و*جعه اول ما شاف دموعها ورجعت فيروز دورت وشها تاني من غير ما ترد عليه فاتنهد احمد بحيرة ودخل البلكونة ووقف جمبها وقالها بهدوء :

انتي اللي استفزتيني بتصرفك ده يا فيروز ،، حاولي تحسي احساسي وانا داخل الكافيه وسامع الرجالة بيتغزلو في جمالك وانتي واقفة مع امي ،، تخيلي رد فعلي هيبقي ايه ؟

فيروز دموعها ذادت وهي باصة للنيل ،،مش عشان زعلانة من احمد قد ما هي زعلانة من نفسها لان دي مش طبيعتها وانها عمرها ما لبست كدة ،، غمضت عنيها بندم وهي بتقول في نفسها ياريتها ما سمعت كلام ليلي ،، فتحت عنيها تاني علي صوت احمد وهو بيمسك ايديها وبيقولها بحزن :

انا اسف يا حبيبتي ،، بس حقيقي انا كنت مصدوم وانا شايفك كدة ورد فعلي مكنتش حاسس بيه من غيرتي عليكي 

فيروز بصت لاحمد وفجأة اترمت في حض*نه وهي بتعيط وبتقول بندم :

انا اللي اسفة يا احمد ،، صدقني انا مش كدة ،، انا بس كنت عايزاك تشوفني حلوة وتغير عليا 

حاوطها احمد بايديه وابتسم وهو بيقولها بحب :

انتي دايما حلوة في عيونى يا فيروزتي ،، وعمري نظرتي ليكي ما هتتغير ابدا 

ابتسمت فيروز بحب وهي بصاله ومسح احمد دموعها بايديه واخدها ودخلو وهما مقررين يفتحو صفحة جديدة مع بعض 

...............................

تاني يوم كانت فيروز بتحضر الفطار بعد ما اتفقت مع احمد انه ميروحش المكتب وياخد اجازة واحمد كمان كان حاسس انه محتاج ياخد راحة ويقضيها مع فيروز عشان علاقتهم ترجع زي الاول وشوية وهما بيفطرو الجرس ضر*ب فاستغربت فيروز وقام احمد يشوف مين واتفاجأت فيروز انها ليلي فاضايقت وخافت احسن احمد يزعل ويضايق عشان هي جاية من غير معاد بس اتفاجأت باحمد مبتسم وبيرحب بيها فدخلت ليلي وسلمت علي فيروز اللي قالتلها بابتسامة :

اقعدي افطري معانا يلا ،، ما تقولها يا احمد يا حبيبي 

احمد ابتسم وهو بيشاور لليلي وقالها :

اقعدي يا ليلي ،، انتي واقفة ليه احنا مش بُخلة 

قعدت ليلي بابتسامة وهي مستغربة انهم كويسين مع بعض والدنيا تمام لانها كانت متوقعة ان احمد هيبقي مكشر وفيروز كمان خصوصا بعد اللي حصل  امبارح وانتبهت ليلي لاحمد اللي قام وبصت لفيروز وقالتلها بابتسامة باهتة :

انا شايفة انكم اتصالحتو اهو وكل حاجة رجعت زي الاول واحسن 

اتنهدت فيروز وردت بهمس وهي بتبض لفيروز :

اه الحمد لله ،،اسكتي احسن شورتك في موضوع الفستان دي كانت شورة هباب ،، ياريتني ما سمعت كلامك 

اتوترت ليلي وحاولت تتهرب من الموضوع فقالت بضحك :

يا سلام يا ست فيروز بقي اقتراحاتي دلوقتي وحشة ما كنا بنتحايل 

ضحكت فيروز وفي نفس الوقت كان احمد جاي عليها بماية وقالت فيروز بضحك :

انتي بس اتجوزي وانا ههريكي اقتراحات وهوديكي في مصيبة 

ابتسمت ليلي وردت ببراءة مصطنعة وهي بتسيب الشوكة من ايديها : 

لا يا اوختي انا شكلي كدة هعنس ،، اصل مش لاقية الشخص اللي فيه المواصفات اللي بتمناها 

ابتسمت فيروز وهي بتغمز لليلي بهزار وقالتلها :

يا سلام يا ست ليلي مراد ،، وايه بقي يا تري مواصفات فارس الاحلام بتاعك اللي مش راضي يجي ده 

ابتسمت ليلي وقالت بقصد وهي بتبص لفيروز :

انا شروطي سهلة خالص ،، مش عايزاه غير انه يكون حنين عليا حتي في زعله ويكون كبير وعاقل كدة مش شاب لسة صغير واهم حاجة بقي نكون متفاهمين اوي 

احمد بص لليلي شوية وبعدين انتبه لنفسه وبص لمليكة وبقي يلاعبها ووقتها اتكلمت فيروز وهي بتقوم وبتشيل الاطباق :

لا ده انتي كدة عايزة تروحي للخياطة تفصلك واحد يا حبيبتي علي زوقك ،، اصل المواصفات بتاعتك دي مفيش منها دلوقتي ،، مفيش راجل يقدر يفهم الست كويس اوي كدة زي ما بتقولي حتي لو قعدو ميت سنة مع بعض  

احمد بص لفيروز بضيق وكأنه اخد الكلام عليه واضايق انها شايفة انه مش فاهمها كدة زي ما بتقول ليلي واتصدم اول ما سمع كلام ليلي  اللي ابتسمت وردت بتلقائية وهي بتبصله  :

ازاي بس يا فيروز ما عندك احمد جوزك اهو ،، في كل المواصفات اللي اي ست تتمناها ،، يبقي اكيد في امل 

احمد بصلها وابتسم بتلقائية وليلي وقتها اتأكدت ان احمد بدأ ياخد باله منها وفي نفس الوقت فيروز بصت بتوتر لليلي واستغربت كلامها بس فجأة ابتسمت وسابت الاطباق وقربت من احمد وحض*نته وهي بتقول بفرحة  :

لا معلش احمد ده مفيش منه في الكون كله وعشان كدة قولتلك انك مش هتلاقي راجل تاني زيه 

احمد باس ايد فيروز وقالها بحب بعد ما قالت كدة :

ربنا يخليكي ليا يا حبيبتي 

ليلي اضايقت من كلام فيروز وقامت وهي بتقول بابتسامة :

انا هعمل انا بقي الشاي 

فيروز ابتسمت وردت بحب علي ليلي وهي بتشيل الاطباق :

ماشي يا قلبي  واه ،،  احمد بيشرب الشاي سكر 

قا*طعتها ليلي وهي بتبتسم وبتبص لاحمد بطرف عنيها قبل ما تسيبهم وتروح المطبخ :

ذيادة ،، عارفة طبعا ان احمد بيحب يشربه ذيادة ،، متقلقيش انا حافظة كويس 

دخلت ليلي المطبخ واحمد متابعها بعنيها باعجاب وهنا انتبه لصوت فيروز وهي بتقوله باستغراب :

احمد هو يعني مش غريبة ان ليلي هنا وانت بتعاملها كويس ومش حساك مضايق عشان هي جت 

اتوتر احمد ورد بابتسامة وهو بيقوم من مكانه :

انا مبقتش فاهمك يا فيروز ،، يعني اضايق منها تزعلي ولما اعاملها كويس برضه تزعلي ،، اعمل ايه طيب عشان ارضيكي 

ردت فيروز بلهفة وهي بتقوم هي كمان وبتقرب منه :

لا والله مش قصدي يا احمد ،، بالعكس انا فرحانة انك اخيرا اقتنعت ان ليلي بتحبني وانها اعز اصدقائي ويهمها سعادتي 

ابتسم احمد ورد بتوتر وهو بيبص لفيروز بتردد:

طيب يا ستي واديني بحاول اتأقلم علي وجودها ،، يلا بقي هدخل انا مكتبي شوية اشتغل وانتي اقعدي مع صحبتك 

ابتسمت فيروز وهي متابعة احمد بعنيها وهو داخل مكتبه ومليكة في نفس الوقت عيطت فشالتها وانتبهت  لصوت ليلي وهي جاية بالشاي وبتسألها :

ايه ده هو احمد مشي ولا ايه ؟ ده انا عملت الشاي 

ابتسمت فيروز وردت بود وهي بتشاورلها علي المكتب :

لا ده في مكتبه بيشتغل ،، بصي دخليله انتي الشاي علي ما اغير لمليكة هدومها احسن بهدلتها واجيلك علطول 

ابتسمت ليلي بهدوء وهي من جواها فرحانة اوي بده واخدت الشاي وراحت ناحية مكتب احمد وخب*طت عالباب فسمعت صوته وهو بيأذن ليها تدخل وهو مفكرها فيروز مراته بس اتصدم لما لاقاها هي ليلي وقام وقف وهو بيقول بابتسامة :

يا خبر وجايبالي الشاي بنفسك ،، اومال فين فيروز ؟

ابتسمت ليلي وهي بتقرب منه وبتحط الشاي عالمكتب وبترد بخبث :

مفيش دي جالها مكالمة مهمة من واحدة صحبتنا وانا خوفت الشاي يبرد فجبتهولك 

ابتسم احمد بامتنان وقالها وهو بيشرب من الشاي :

تسلم ايديكي بجد انك اهتميتي وجبتيه لحد هنا 

ابتسمت ليلي ببراءة مصطنعة وقبل ما تخرج لمحت سجاير كتير في الطفاية اللي علي الترابيزة واوراق كتير فاتكلمت بخبث وهي بتبص لاحمد :

احمد هو انا ممكن اسألك علي حاجة 

استغرب احمد وحرك راسه بايجابية وهو بيقولها بابتسامة :

اكيد يا ليلي اتفضلي 

ليلي قربت من المكتب وبصتله 

وهي بتسأله باهتمام :

ممكن اعرف ايه اللي مضايقك وشاغل تفكيرك اوي كدة ،، انا حاسة انك مشغول بحاجة ومش علي طبيعتك بقالك فترة ،، اسفة لو اتدخلت بس يهمني اطمن عليك 

استغرب احمد وقام وهو بيقول لليلي باعجاب ذاد اكتر بيها وباهتمامها بيه :

ممكن اعرف الاول انتي عرفتي ازاي اني متوتر ومضايق وعقلي مشغول اليومين دول ؟ ،، فيروز اتكلمت معاكي في حاجة ؟

ردت ليلي بخبث وهي بتبص لاحمد وبتقوله بلهفة :

ابدا والله العظيم يا احمد ،، فيروز متكلمتش معايا ولا حكتلي حاجة عنك ،، انا اللي حسيت كدة من نفسي ،، اصل يعني احنا عشرة سنين سوا يا احمد وبقيت حافظاك اكتر من نفسي 

احمد اتصدم من كلام ليلي واتفأجات ليلي بيه بيقرب منها و........يتبع  

سرقت زوجي ولكن 

بقلمي اسراء ابراهيم

رواية سرقت زوجى ولكن الفصل الرابع 4 من هنا

لقراءة الرواية كاملة اضغط هنا (رواية سرقت زوجى ولكن)

تابعونا على التليجرام من هنا (روايات شيقة ❤️)

تابعونا عبر أخبار جوجل من هنا (روايات شيقة ❤️)