رواية بنت العدو الفصل الثالث والأربعون 43 بقلم ندى على

رواية بنت العدو الفصل الثالث والأربعون 43 بقلم ندى على

رواية بنت العدو البارت الثالث والأربعون 43

رواية بنت العدو الجزء الثالث والأربعون 43

رواية بنت العدو الحلقة الثالثة والأربعون 43

رواية بنت العدو بقلم ندى على

رواية بنت العدو

رواية بنت العدو الفصل الثالث والأربعون 43

" بنت العدو " 

" البارت الثالث والاربعين "

" الكاتبه ندي حبيب "

ليلي بصت ليهم بكل غيره : هو المز الوتكه القمر اللي مفيش منه اتنين اللي انتو نازلين معاكسه فيه دا محدش عرفكم انه جوزي ولا ايه 

فاتن : بجد اصل انتي صغيره عليه اووي يا ليلي متوقعتش انك مراته 

ليلي بغضب : وانتي مالك صغيره عليه ولا كبيره هو جوزي انا واختارني انا وبحبه واخر مره هقولك اتلمي بدل ما المك 

نوال بصت ليها : جوزك قمر يا ليلي بصراحه والجمال لازم يتقدر ولا ايه ؟

ليلي بغضب : لو عينك انتي وهي جت علي جوزي تاني وحياة بنتي لخلعها من مكانها انا بس مش همد ايدي علي وحده منكم علشان انتو في بيتنا غير كدا كان هيبقي كلام تاني " ونزلت علي تحت كان مصطفي قاعد مع سالم واحلام ورشا شايل سلمي علي رجاله " 

ليلي بغضب واندفاع : انت جيت لييه ؟

مصطفي بستغراب : جيت ليه ؟ هو حضرتك مكنتيش عوزاني اجي ولا ايه الوضع 

احلام بغضب : ماالك يا ليلي هو ايه اللي جيت ليه جوزك يجي في الوقت اللي يريحه ؟

" ليلي شالت سلمي من علي رجله حطيتها علي رجل احلام واخدته علي اوضتها وقفلت الباب مصطفي كان هيزعقلها علي اسلوبها بس اتصدم منها لما حضنته وعيطت "

ليلي بعياط : انت جوزي لوحدي وحبيبي لوحدي انا اللي ليا حق اتغزل فيك واحبك محدش يشاركني فيك لو بنظره 

مصطفي طبطب عليها : انا جوزك لوحدك وملكك لوحدك محدش هيشاركني فيكي ولا اقدر اكون مع حد غيرك بطلي عياط بقا ونتكلم بهدوء مالك في ايه 

ليلي بعياط : اصحاب اسراء عمالين يقولو عليك مز ووتكه ومعجبين بيك وبشكلك 

مصطفي بحنان : اخرهم يبصو عليا من بعيد كدا لكن انتي تبصي عليا من بعيد ومن قريب يوم بكون في حضنك انتي وبحبك انتي واختارتك انتي وخلفت منك انتي

ليلي بصت ليه بعيون باكيه : مستحيل تبص لوحده غيري صح ؟

مصطفي قلبه وجعه علي عياطها مسك وشها ومسح الدموع من عيونها وباس شفايفها برقه وقال بهمس : لما يكون معايا القمر هحتاج ايه من النجوم قلبي اللي اختارك وقلبي اللي اجبرني علي حبك يا ليالي نطلع بقا بدل ما يفكرو حاجه غلط خصوصاً الطريقه اللي اخدتيني بيها من قدامهم 

ليلي بإحراج : هتكسف اطلع قدامهم ياتري فعلا فكرو ايه ؟

مصطفي : انتي مراتي يابت اللي يفكر يفكر محدش ليه عندي حاجه المهم انا جيت اشوف سلمي واشوفك علشان هنزل القاهره كدا في شويه حجات هعملهم وهاجي اخدكم ونروح 

ليلي : هتروح القاهره لوحدك يا مصطفي ؟

مصطفي وهو بيحرك ايده علي خدها : يا حبيبي متقلقيش انا هروح في النور اهو 

ليلي : وهترجع في الضلمه وطريق البلد كله زراعي قلبي هيفضل قلقان لحد ما تيجي .... طب هد غالب معاك ؟

مصطفي : غالب لازم يفضل في الارض علشان احنا اخر الشهر هيحاسب المزارعين وهيشوف الحسابات مع جدي وابويا متقلقيش والله هحاول اجي بدري 

ليلي باست خده : ارجلي بألف سلامه انا هفضل عنا لحد ما ترجع تاخدني معاك وانت مروح 

مصطفي: عيوني ليكي يلا اطلعي خدي سلمي وابعدي علي ما اطلع انا علشان ماشي 

ليلي فتحت الباب : احلاام خدي سلمي واستخبي علي ما مصطفي يطلع علشان متعيطش وراه 

احلام قامت اخدت سلمي ودخلت المطبخ : يلا خليه يطلع 

مصطفي طلع وليلي وراه ركب العربيه وبص ليها : عوزه حاجه اجيبها وانا راجع ؟

ليلي ببتسامه : عوزاك ترجعلي بسلامه 

" مصطفي ابتسم ليها وبعتلها بوسه علي الهوا ومشي وهي دخلت علي جوا بعد ما العربيه بتاعته اختفت " 

ليلي في نفسها : حقيقي مبحسش بأمان غير وانا معاه ؟!

احلام : ليلي تعالي خدي سلمي رضعيها علي ما اشوف الفرخه استوت ولا لسه 

ليلي : جيالك اهو يا احلام " وراحت عندها في المطبخ اخدت سلمي منها وقفلت باب المطبخ وقعدت ترضعها " 

احلام جابت كبدة الفرخه وحطيتها في بوق ليلي: علشان تقدري ترضعي بنتك يلا ابلعي ... عمله ايه انتي وجوزك يا ليلي ؟

ليلي : كويسين خالص الدنيا تمام ماما اميمه كويسه معايا هي لازم تسمع الواحد كلمتين بس خلاص اتعودت وماما فاطمه وباقي البيت كله كويس معايا برضو 

احلام بفرحه : يحبب فيكي خلقه يابنت قلبي ياارب 

ليلي : بس عوزه اخد حبوب منع حمل او وسيله تمنع الحمل لحد ما سلمي تكبر شويه 

احلام : يا خيبه خلفي منه كل ما تخلفي تقوي علقتك بيه وتخيله مربوط بيكي علطول 

ليلي : اسكتي يا احلام هو علشان اربطه بيا اموت نفسي دا الحمل والولاده والرضاعه دول اصعب ما في الحياه هده وبعدين مصطفي عمره ما يتخلي عني 

احلام : انا قولتلك اللي عندي بس قبل ما تاخدي منع حمل والكلام دا تعرفي جوزك الاول 

ليلي : ما انا هعمل كدا انشاء الله 

................................

" في صلاة العصر في المسجد اللي جنب البيت صفوان وجمال وسالم ورجاله من البلد بيصلو ورا الشيخ وبعد الصلاه " 

الشيخ محمود ببتسامه لصفوان : مبارك عليك يا صفوان بيقولو كتب كتابك بكرا صحيح الكلام دا ؟

صفوان باس ايد الشيخ : انشاء الله بكرا كتب الكتاب والدخله مش هنعمل فرح علشان هنسافر السعوديه نلحق الحج انشاء الله 

الشيخ محمود بفرحه: ربنا يكتبلك في كل خطوه في حباتك سلامه وفرح ديما احيك علي فكرة عزم الفرح دي بجد واسراء بنت اصول انها وفقت في كلامك 

صفوان : اسراء تربية ايدك يا شيخ البركه فيك ربنا يديك طولة العمر وانشاء الله فرحتي مش هتكمل غير بيك بكرا 

الشيخ بص لجمال اللي قاعد جنب ابوه بيسبح علي صوابع ايده وفي ايده الدبله : فرحتي في الدنيا ان شوفتك جمال حفيد المرحوم غفران الجبراني بجد يا جمال 

جمال ببتسامه : ربنا يهدينا يا شيخ ويقربنا منه اكتر واكتر 

الشيخ محمود ببتسامه وهو بيشاور علي الدبله بتاعت جمال : لو رضيت ربك ربك هيرضيك يا جمال و الانسان يامااا بيعمل ذنوب بس امتي الانسان يحس ان مؤمن بجد لما يغلط غصب عنه بس يرجع يتوب لربنا يكلم ربنا في اللي نفسه فيه يشكيله همه وحزنه وخوفه وسعادته شاارك ربنا في كل حاجه في حياتك مهما كانت وربنا حليم وستار وغفور ورحيم وجميل ولا ايه يا عم جمال " وابتسم اوي "

جمال ببتسامه وارتياح : حقيقي يا شيخ والله العظيم 

الشيخ محمود سند علي صفوان لحد ما قام وقف : خلصنا عباده نقوم نشوف مصالحنا بقااا يلا يا رجاله ربنا يوفقكم ويوفقني يارب " مشي الشيخ محمود ووراه جمال وصفوان " 

صفوان بتعجب : بستغرب الشيخ محمود دا اووي يا جدع 

جمال بستغراب : بتستغربه ليه اشمعنا ؟

صفوان : يفضل يتكلم علي التعداد ديما وان لو مقتدر اتجوز دا شرع ربنا وهو مقتدر  والشيخه لمياء مراته مبتخلفش ورغم كدا رافض يتجوز عليها حاجه غريبه صح ؟ 

جمال : احنا في زمن ابن ستين كلب تقدر تقولي الشيخ محمود هيعرف يجيب وحده في ادب واخلاق واحترام الشيخه لمياء دي ولو فيه وحده بنت ناس مثلا الشيخ محمود بيحب مراته وبيحترمها ممكن مش عاوز يجرح مشاعرها وبعدين احنا مااالنااا قعدتك مع غالب جوز بسمله اختي خليتك متطفل علي الدنيا كلهااا

صفوان بتسقيف : هتجوز هتجوووز انا خلاص هتجوز وهبص علي البنات 

جمال بيكتم بوقه : هتجوز وهبطل ابص مش هبص اتجوز الاول بعدين طلق بلاش تطلع من الدنيا قبل ما تدخلها تمام 

صفوان بخضه : احيييه لو اسراء سمعتني طلاق تلاته لتعميني ؟!

......................................

" في المطعم عند بسمله وغالب "

بسمله وهي بتاكل الكباب اللي غالب طلبه : تصدق بالله الكباب هنا جميللل اووي 

غالب وهو بياكل الفراخ اللي بسمله طلبتها : ولا الفراخ احنا عرفين انها كانت فراخ منيله وميته بس برضو هناكل منها 

بسمله : الحاجه الحرام كدا ليها طعم مختلف نسيييييت 

غالب : عليا الحلال من ديني ما هجيب حاجه تانيه عوزه تتكلمي اتكلمي في اي حاجه بس ابعدي عن الفلوس جيبي وجعني والله 

بسمله : كنت مفكره جدي الله يرحمه بخيل طلعت انيل منه يا غااالب وبعدين خلاص قفلتني من ام السؤال 

غالب بغيظ : جااايبلك فستان ب 600 جنيه وجزمه ب 300 وطرحه ب 150 وقلم روچ ب 70 بغديكي اهو هندفع بتاع 500 جنيه وتقوليلي بخيل هلبسك في الطبق اللي قدامك 

بسمله : اولا اسمه دريس مش فستان واسمه هيلز مش جزمه واسكه ليب جلوس مش روچ خليك مثقف لو سمحت 

غالب : هنسيب الموضوع المهم وهنمسك اسمها الجزمه والهيلز بسمله من الاخر كدا علشان ترتاحي انا لسه معايا في جيبي 170 جنيه هجيب علبة سجاير ب 40 وهمون العربيه ب 130 ارتاااحي بقاا 

بسمله : انا ولا العربيه يا غالب ؟

غالب : العربيه ليها لازمه وشيلاني ؟

بسمله : وانا مش شيلاك يا غالب ؟!

غالب بغمزه : من نحية شايله ف انتي بتشتالي والله مفيش كلام في الحته دي 

بسمله وشها احمر من كتر وقاحته : انت بتقوول ايه اتكسف يا غالب 

غالب بضحك علي شكلها : مكسوف والله وقااعد اهوو كلي كلي الاكل هيبرد 

.......................................

" اليوم عدي والساعه بقت 11 بليل جمال طلع ينام هو وصفوان وسالم علشان ماتو في الشغل النهارده سلمي اللي مش مبطله عياط طول الوقت ومتعلقه في ليلي وخايفه من الكل ، اسراء وشهد عوزين يشغلو اغاني ويرقصو بس جواهم حزين علي جدهم اللي صورته في نص الصاله "

ام صفوان : كدا الشقه خلصت يا اسراء صح ؟

اسراء : ايوا هدومي اترتبت في الدولاب وهدوم صفوان وكل حاجه جاهزه خلاص 

رشا : ربنا يتملكم علي خير يارب هنعمل ايه يا احلام بكرا ؟

احلام : ولا حاجه هنعمل اكل علشان ليلي وجوزها وبسمله وجوزها وعيلة الجبراني كلها هتيجي بكرا وكتب الكتاب اهو بليل 

اسراء : اصلا في ناس بكرا جايا هيتعملو الكوشه وهيرتبو الصاله وهيعملو الزينه هنا 

" ليلي كانت ماشيه بسلمي قدام البيت يمكن تنام بس مفيش فايده دخلت بيها جوا وفضلت تمشي "

رشا : هاتيها شويه يا ليلي واعدي ارتاحي يا نن عيني ولا عرفتي تكلي ولا تشربي ولا تنامي منها 

ليلي بتعب : والله يا ماما رشا مبهدلاني متعلقه بمصطفي اووي يفضل قاعد معاها ومجرد ما ينزل يروح الشغل تفضل تعيط لحد ما يرجع وانا قاعده بيها وبليل عوزاني اصحي بيها ارضعها 

احلام : قولتلك ولا هتبقي قد جواز ولا خلفه ولا حمل مسؤليه قولتلي لااء 

ليلي بضحك : احلااام كل تعبي يهوون ساعة ما انام في حضنه بليل دا كفايه كلمة ام سلمي منه يولييه 

اسراء بضحك : اوعدنااا يارب 

احلام بضحك : شوفي العيااال يولاد ؟! 

" عربية مصطفي وصلت قدام البيت وزمر لليلي انها تطلع " 

ليلي طلعت ليه جري : اخيراااااا وصلت قلبي كان هيقف من الخوف 

مصطفي شايف فرحة بنته ومراته بشوفته : حبايب قلبي اللي وحشوني يلا اركبو يلا " واخد سلمي من ليلي " 

احلام طلعت بشنطة الاكل : ما هو من لقي احبابه نسي اصحابه خدي الاكل بتاعك قبل ما تمشي وتنسيه وبعدين ادخل يا مصطفي اتعشو وامشوو 

مصطفي : انا جعاان نووم يا ام اسراء والله هروح احط راسي علي المخده واناام 

احلام بصت لسلمي اللي فرحانه : ضحكتي يعني يا ست سلمي 

" مصطفي ضم سلمي لحضنه بحب وضحك ليلي اخدت الاكل وودعت الكل وركبت جنب جوزها  " 

مصطفي : يلا مع الف سلامه يام اسراء وصلي سلامي لأبو جمال 

احلام : في رعاية الله مع السلامه 

........................................

" وصل مصطفي وليلي شقتهم " 

ليلي حطت شنطة التكل في المطبخ وراحت اترمت علي الكنبه اللي في الصاله : اخيراااا الواحد برضه مش بيرتاح غير في بيته 

مصطفي : قولتلك متروحيش ولا تيجي مسمعتيش الكلام بس غريبه يعني سلمي نامت علطول 

ليلي : عيطت كتير النهارده ومقريفه من ساعة ما روحنا هناك علشان مش متعوده علي حد ولا متعوده علي البيت 

مصطفي : عمري ما هخليكم تخرجو من البيت تاني انتي طبعا مأكلتيش وباين عليكي وسلمي جايا مفرهده وهتتعب 

ليلي : انا هدخل استحمي وهبقي زي الفل دلوقتي هطلع تسرحلي شعري ونسخن اكل وناكل 

مصطفي : اكل ايه اللي ام اسراء جابته ؟

ليلي : بط ومحشي وشوربه وفاصوليا هنسخن ونامل وبعد الاكل كوباية عصير مانجه ويااااااا سلااام بقا 

مصطفي بغمزه : طب ما تسيبك من المانجا والبط وتيجي نصيع حبه انا وانتي يا بطتي ؟

ليلي : دا انا مفيش فياااا نفس اقووم استحمي تقوم تقولي تعالي نصيع دا انت قلبك ماات 

مصطفي برفع حاجب : انتي تعبانه مش تعبانه انا مالي قولتلك روحي عن بيت اهلك اتنفخي مع اختك مقولتش 

ليلي : وانت قوولت اييه اختي يعني واجب عليا اللي بعمله دا انت بقي المفروض تقدر كل الحجات دي 

مصطفي : طيب تعالي اعملك مساچ يريح جسمك ؟

ليلي : لاء برضو مساچك بيقلب بقلة ادب انا هقوم استحمي وناكل ونااااام "وقامت دخلت علي الحمام وبعد وقت طلعت لبست هدومها وكان مصطفي نام علي الكنبه سابته نايم ودخلت عملت الاكل وراحت تصحي مصطفي "

ليلي : مصطفي يلاا قوم يا حبيبي انا جهزت الاكل كل ونام براحتك 

مصطفي فتح عينه : هناكل بط ومحشي وناام يا ليلي ؟

ليلي : خلاص هناكل ونعمل شاي ونسهر شويه قي البلاكونه قوم يلا 

"مصطفي قام وراح قعد علي الطربيزة اللي في المطبخ وليلي قدامه وفضلو ياكلو "

ليلي : مصطفي انا عوزه اخد حبوب منع حمل لحد ما سلمي تكبر شويه ؟

مصطفي من غير ما يبصلها : لاء حوار حبوب منع الحمل دا لاء سبيها علي ربنا 

ليلي : احم حبيبي انا سيباها علي ربنا بس ممكن احمل عادي انت دكتور وفاهم 

مصطفي : وعلشان دكتور بقولك ان حبوب منع الحمل دي خطيره ممكن تتعودي عليها زيها زي المنوم وانا مش عاوز كدا وبعدين ما تيجبي عيل واتنين وتلاته امال احنا متجوزين ليه " وبصلها " ولا ايه ؟

ليلي عرفت انها بتتكلم في حاجه ممنوع فيها النقاش اصلا قالت بقلة حيله : حاضر " وقطعت البطه " كل يا مصطفي ولا انت نفسك مش جيباك لزفر بليل ولا ايه ؟

مصطفي شد ايديها وباسها : حبيبي باكل والله كلي انتي كمان يلا " واكلو وليلي عملت شاي وطلعو قعدو في البلكونه "

مصطفي بضحك : طول حياتي وانا اعزب كنت بعد في البلكونه دي مكنتش بحبها ابدا من يوم ما اتجوزت وهي ليها طعم تاني " وبصلها بحب " الصراحه مش البلكونه لس اللي بقا ليها طعم تاني هي حياتي كلها بقا ليها طعم تاني يعني كل يوم كنت بصحي علي المنبه دلوقتي بصحي علي صوت سلمي وهي بتعيط بنسبالي طرب مع انه ازعاج

ليلي بعشق : انت بنسبالي كنت حلم تحقيقه مستحيل كنت كل يوم بنام وصورتك علي فوني كنت افضل هل في يوم هنام وهو جنبي فضلت احلم لحد ما فعلا في يوم نمت وراسي علي صدرك ليلي اتجوزت ابن الجبرااني 

مصطفي ضمها لصدره وباسها من راسها : قلب ابن الجبراني يا بت العدو 

ليلي بضحك: خلااص بقا مبقتش بنت العدو احنا بقينا عيله ولا اجمل من كدا 

مصطفي : حتي لو بقينا عيله واحده هتفضلي طول عمرك اكبر حاجه حاربت علشان تكون ليا يا ليالي حلوه اللي بدوووب فيها " قضو السهره كلها في البلكونه ضحك وهزار وحب "

..................................

  " صباح تاني يوم طبعاً مفيش اغاني كتب الكتاب علي الضيق علشان خاطر المرحوم غفرانجمال وصفوان جابو مزمار يرقص ويفرح العروسين وخلاص والغدا للأهل بس  " 

" يوم مليان توتر خوف قلق فرحه كل المشاعر مختلطه مع بعض صفوان اخيرااا وبعد تعب هيتجوز حبيبته اللي حبها واسراء مش مصدقه ان كل اللي هي فيه دا حقيقه وخلاص هتتجوز صفوان " 

" البيت كله مقلوب علشان الراجل يعمل كوشه حلوه وشيك "

" بسمله راحت من الصبح عند اهلها ومعاها لبسها "

بسمله قعده في نص الاوضه : طب احنا عوزين نقول يا ام العريس يا ارنبه بس ام العريس خالتنا نعمل ايه 

رشا : ياابت اسكتي احترمي نفسك دا انتي متجوزه اعقلي كدا 

بسمله برفع حاجب : وعلشان متجوزه مفرحش يعني ولا ايه طب عليا النعمه لقوم ارقصلك يا بت يا اسراء 

اسراء قعده وفي وحده برسم حنه علي ايدها وعلي جسمها : ايه رأيكم في الفراشه اللي علي الرقبه دي حلوه ؟

بسمله : تحفههه اووي ويا سلام بقا لو رسمتلك ورده علي ضهرك بطول العمود الفقري واوو 

اسراء ببتسامه : لسه هعملها اهوو بس عوزه حد يطلع يشوف الراجل بتاع الكوشه عملها زي ما انا طلبتها ولا لاء 

بسمله : وريني كدا الشكل اللي قولتيله اعمله 

اسراء فتحت فونها وورتها شكل كوشه جميله اوي : انا عوزه دي في الصاله نفسهااا 

بسمله : هاتي الفون هطلع اشوفه عمل ايه " واخدت الفون وطلعت تشوف الكوشه بس صفوان رن وبسمله ردت " 

صفوان : سوسوو اطلعيلي الشقه كدا بسرعه ؟

بسمله بتبريقه : تطلعلك الشقه ؟! ولاااا البيت دا طاهر وهيفضل طول عمره طاااهر لاء 

صفوان بضحك : يخربيت تفكيرك الزبااله انتي مسكه فون مراتي لييه يابت انتي ؟!

بسمله : شوف ربنا خلاني امسك الفون وارد علشان اعرف انك عاوزها تطلعلك الشقه بتتغرغر بالبت يا صفواان ماااااشي 

صفوان بضحك : يا حماااره انا عاوز اسألها علي حجات في الشقه ذائد انتي مااالك مش هتجوزها النهارده 

بسمله : امممم ماااشي حاليا احنا مش فاضين بنعمل حجات ابقي اسألها بليل " وقفلت في وشه وطلعت تشوف الكوشه " 

احلام اول ما شافتها : بسمله تعالي قطعي البصل 

ام صفوان : واغسلي المواعين ولفي المحشي مع شهد يلاا 

بسمله : لاااء انتو فهمتو غلط انا كنت طالعه اشوف الكوشه مكنش في بالي مساعده خاالص هبعتلك امي اهوو " وجريت علي الاوضه تاني كانت اسراء بدأت البنت ترسملها الورده علي ضهرها "

..............................

" في مول في البلد كنز كانت بتلف في محلات المول علشان تجيب ليها طقم للفرح وهي ماشيه لقت اللي وقف في وشها " 

سليم : لازم اتكلم معاكي ممكن ؟

كنز حطت ايديها علي قلبها : حراام عليك خضيتني 

سليم ببتسامه : معلش حقك عليا هاا تيجي نعد في اي كافيه نتكلم ؟

كنز اترددت شويه بعدين قالت : تمام مفيش مشكله " وفعلا راحو قعدو في كافيه من ضمن المول فضلو ساكتين شويه لحد ما كنز قررت تقطع الصمت دا " اماندا عمله ايه ؟

سليم : بخير الحمدالله اتعلقت بيكي بسرعه اووي 

كنز ببتسامه : اماندا عسوله وحبوبه وانا حبيتها والله 

سليم اتنهد : اماندا بنتي تعتبر حياتي كلها يعني انا واهب نفسي ليها وبس شايل فكرة الجواز من دماغي علشان خاطرها وعلشان مش عاوز حد ياخد وقتي غيرها عارف كلامي غريب عليكي وبتقولي انا مالي بس من وقت ما اماندا شافتك وكل همها هي ان تيجي تعيشي معانا في بيتنا ؟

كنز بستغراب : مش فهمه وضح اكتر ممكن ؟

سليم بصلها شويه : تتجوزيني يا كنز اوعدك هعيشك ملكه مش هخلي نفسك في حاجه بس الاهم تعتبري اماندا زي بنتك ؟! 

"" انتظرو القااادم "" 

إني أحبك رغم انف قبيلتي ومدينتي وسلاسل العادات ❤️✨

رواية بنت العدو الفصل الرابع والأربعون 44 من هنا

لقراءة الرواية كاملة اضغط هنا (رواية بنت العدو)

تابعونا على التليجرام من هنا (روايات شيقة ❤️)

تابعونا عبر أخبار جوجل من هنا (روايات شيقة ❤️)