رواية زوجة للإيجار الفصل الثالث 3 بقلم إسماعيل موسى
 |
| رواية زوجة للإيجار |
رواية زوجة للإيجار الفصل الثالث 3
#زوجه_للأيجار
الثالثه
مبقتش قادره أقف على بعضى، رجليه بترتعش مش قادره تشيلنى
جسمى كله بينقح عليه، دوخت واترميت على السرير
إلى بيقولو محمد جوزى ملوش غير معنى واحد انه مش راجل وانه عايز يبعنى لشخص تانى
وقعدت ادور على حلول لحد عقلى ما صورلى انه بيتكلم على واحده تانيه غيرى، عقلى مقدرش يستوعب فكرة ان جوزى اتجوزنى عشان شخص تانى
وقعدت اندب، انا لسه عروسه يا ربى هسيب البيت فى اول ليله الناس هتقول عليه ايه؟
والدى ووالدتى ناس كبيره فى السن جدا، ومرضى مش هيستحملو صدمة ان ارجعلهم بفستان الفرح
قعدت اضرب فى السرير بايدى إلى انا سمعته ده كدب، تخيلات
انا هنام وهصحى من النوم الاقى حاجه تانيه
لما صحيت من النوم دموعى كانت ناشفه على خدى، حاولت اكون طبيعيه، محمد كان نايم على الكنبه
قربت منه قعدت ابص عليه بغل مده كبيره لحد ما حس بيا
بوست محمد جوزى على خده، قلتله صباح الخير يا حبيبى!!
محمد قام مزعور، جسمه كله اتنفض
قال صباح الخير يا مروه، بعد جسمه عنى
انا هحضر الفطار يا حبيبى على بال ما تاخد حمام؟
محمد قال ماشى
جهزت الفطار وقعدنا ناكل، محمد بداء الكلام، انا بعتذر مره تانيه عن إلى حصل منى امبارح
وبصلى بنظره مختلفه
نظرة زوج راغب فى زوجته وعايزها، كان بيتأمل جسمى بشبق
وحسيت انه متغير عن امبارح خالص لحد انى كنت مستعده انسى كل الكلام إلى سمعته فى التليفون
قمت بدلع وقلتله انا هنضف الأطباق وادخل أوضة النوم
محمد قال وانا مضطر اخرج يا حبيبتى، مش هتأخر ورايا مشوار مهم وهرجع بسرعه وباسنى على خدى وغمز بعينه
دماغى قعدت تضرب تعدل، الوضع كله على بعضه غريب، قلت هستنى محمد لما يرجع وافاتحه فى الكلام إلى سمعته امبارح واطلب منه تفسير
محمد متأخرش، يدوبك ربع ساعه، كأنه كان بيقابل حد تحت العماره مش فى مكان بعيد
كان راجع متوتر وجسمه كله عرق، اول ما شافنى قال انا هاخد حمام جسمى كله ملزق
انتهزت الفرصه ومسكت تليفون محمد وقعدت افتش فى سجل المكالمات
خاصه الساعه إلى كان بيتكلم فيها امبارح، مكنش فيه مكالمات صادره ولا وارده
او كان مسحها مش عارفه
يدوبك محمد خرج من الحمام والتليفون بتاعه رن، محمد مستناش يلبس هدومه ومشى بسرعه ناحيت التليفون، خد التليفون من على الكنبه وبص فى الرقم، وبص عليه ووشه اصفر
وقال، مكالمه من الشغل يا روحى مضطر ارد عليها،
محمد مشى على أوضة النوم وقفل الباب وراه، قلبى مكنش مطمن اصلا، بسرعه وقفت ورا الباب
لازم اعرف ايه بيحصل ومحمد بيكلم مين
قصه بقلم اسماعيل موسى
فى مكالمة التليفون
محمد _____ ايوه وصلت ، ممممم، اه، حاضر هكلمها، هيحصل ايه يعنى؟
لا معتقدش، دول مسنين مش بيقدرو يغادرو الشقه
رأيك كده؟
بس كده صعب اوى
حاضر
حاضر
مممم، فاهم، مش هينفع انا لسه راجع من بره حالا
خليها بكره، اه
بص وهمس محمد بصوت واطى جدا، انا هخرج من الشقه الساعه عشره الصبح وهسيبهالك هنا ومش هرجع غير لما تتصل بيا او اشوفك خارج
هستنى فى القهوه تحت البيت
محمد بخوف وصوته رجع تانى، هى هتوافق
انا هخليها توافق متقلقش
قلتلك هى ملكك
#زوجه_للأيجار
رواية زوجة للإيجار الفصل الرابع 4 من هنا
لقراءة الرواية كاملة اضغط هنا (رواية زوجة للإيجار)
تابعونا على التليجرام من هنا (روايات شيقة ❤️)
تابعونا عبر أخبار جوجل من هنا (روايات شيقة ❤️)
