رواية صاحب مفتاح الشقه الفصل السابع 7 بقلم عمرو راشد
7
فاكرة المحفظة اللي وقعت من الحرامي اللي اته*جم عليكي
" قومت وقفت بسرعة
لقيته؟
= ومش بس كدا دا أنا كمان عرفت مين اللي بعته
مين
= أمجد العطار جوزك!!
انت بتقول ايه؟
= اقسم بالله زي ما بقولك كدا،، أمجد هو اللي بعتهم،، كان عايز يعمل لقطة معاكي وعملها خلاص
دا انا هخر*ب بيت اهله
= لا لا اصبري،، أنتي كدا هتضيعي حقك
اومال انت عايزني اقعد واتفرج؟
= انا عايزك تهدي عشان نعرف نفكر
مفيش تفكير،، انا هطلب الطلاق وهو هيسيب كل حاجة في الشركة ويرجع شحات زي ما كان
= غلط،، أمجد مش هيعمل دا بالسهولة دي
غصب عنه هيعمله
= خلينا نفكر دلوقتي في حماتي و بعدها نشوف موضوع أمجد،، اسمعي كلامي يا منال بعد إذنك
" كنت قاعد جنب ناهد على السرير بعد ما جالي التليفون ب ان في واحد من رجالتي اللي سر*قو الشقة اتعرف واتكشف خلاص واللي كشفه اسمه صلاح،، قومت اتعدلت وأنا ببتسم و بعدها ناهد قربت مني وحطت راسها على كتفي
في ايه مالك؟
= منال عرفت اني ورا سر*قة الشقة
ينهار اسود وهتعمل ايه؟
= دي اسهل حاجة ممكن تحصل
يا امجد دي زمانها عرفت كل حاجة وطبعا كل المواضيع هتجيب بعضها وهتعرف سبب تعب امها
= كل شئ معمول حسابه يا ناهد متقلقيش
ازاي مقلقش؟
= لان ببساطة دا اللي انا كنت مستنيه،، منال تشك فيا عشان اثبتلها برائتي ومش بس كدا لا دا انا كمان اخليها تقطع علاقتها مع صلاح
وانت هتعمل دا ازاي؟
تخيلي معايا كدا،، حرا*مية يهج*مو علينا في نص الليل و اكون انا موجود معاها في الشقة و اجري وراهم وابدأ اطار*دهم لحد ما واحد منهم يجر*حني بالسك*ينة بتاعته وبعد كدا يهرب وساعتها منال هتشوف دا وكل الشك اللي جواها هيروح
" من احدى الطرق اللي تعرف تنهي بيها الشك انك تنهيه في اقل وقت،، لأنك لو استنيت عليه هيكبر ويزيد و بعدها هيتحول ل حقيقة ومش هتعرف تثبت عكسه،، لازم تلحقه في بدايته عشان تعرف تثبت اللي انت عايزه لان ساعتها بيكون صاحب الشك شخص مشتت ومش متأكد من اي حاجة و دا انسب وقت عشان تدخل فيه جوا دماغه،، وهو دا بالفعل اللي حصل لما رجعت الساعة 1 من عند ناهد،، دخلت الأوضة بس ملقتش منال جوا،، غيرت هدومي وخرجت لقيتها خارجة من أوضة حماتي
في حاجة ولا ايه؟
= بطمن على ماما،، انت ايه التأخير دا كله؟
الشغل كان كتير أوي النهاردة
= وخلصته؟
خلصته
= طب مش هتنام؟
هنام طبعا
= ولا تحب احضرلك تاكل؟
لا انا عايز انام
" نظراتها كلها شك حتى طريقة كلامها و دا مكنش هينفع يدوم لوقت طويل،، ونمت جنبها بالفعل لحد ما صحيت من النوم على صوت صرخة منها،، قومت بسرعة و بصيت جنبي لقيت واحد ملثم ماسكها وبيقولي بصوت عالي
لو عايز تعيش انت وهي يبقا تهدى وتجيب الفلوس اللي هنا بكل هدوء
= ارجوك اهدى وبلاش تأذ*يها
اخلص هات الفلوس
" بصيتلها في عينها اللي كان ماليها الرعب
متخافيش يا حبيبتي
" اتحركت ناحية الدرج وفتحته وجيبت منه 10 الاف جنيه كانو موجودين جواه
الفلوس اهي،، سيبها بقا هي ملهاش دعوة كلمني انا
= مش عايز كلام كتير فاهمني؟،، اتحرك قدامي و اياك تفكر تعمل اي حركة صدقني مش هتلحق تكملها
" بعدها رمى منال في الأرض وخرج معايا و بدأت الخناقة تدور لحد ما انتهت ب جرح في كتفي و الحرا*مي جري،، في اللحظة دي منال خرجت من الأوضة تجري عليا و بدأت تسندني لحد ما قعدت على الكنبة وهي جريت تجيب شنطة الاسعافات وبدأت تطهر الجر*ح
مكنش لازم تتخانق معاه يا أمجد،، كنت سيبه يمشي
= يمشي ازاي يا منال؟،، دا أنا مستعد امو*ت بس محدش يقرب منك
للدرجادي بتحبني؟
= انا مبحبش حد غيرك،، مفيش ست خلقها ربنا تقدر تملى عيني غيرك
وأنا كمان بحبك أوي
" وبكدا تكون قضيت على اسطورة الشك،، ويومها انا قضيت ليلة مع منال متتنسيش،، صحيت تاني يوم الصبح لقيتها مش جنبي على السرير،، قومت خرجت من الأوضة لقيتها بتحضر الفطار و خارجة من المطبخ و دي كانت اول مرة من فترة طويلة جدا اشوفها بتضحك في وشي وبتحضرلي الفطار
صباح الخير يا عمري،، اقعد افطر يلا
= صباح النور يا حبيبتي،، ايه النشاط دا كله؟
لازم طبعا اكون نشيطة عشان احضرلك الفطار قبل ما تنزل
= بقالك فترة مبتعمليش كدا يعني
مانا حسيت اني مقصرة معاك ف حبيت اغير دا
= طب ومامتك مش هتفطر معانا؟
فطرت من بدري،، وانت كمان لازم تاكل عشان الجر*ح يخف بسرعة
= هاكل اهو
" التغيير شئ مميز بس لو جاي في وقته ومع الشخص الصح بس للاسف انا مش الشخص الصح ولا دا وقته،، بعد ما خلصت اكل دخلت لبست عشان انزل لقيتها دخلت عليا وانا بلبس ووقفت جنبي وقالتلي
انت لسة تعبان يا أمجد،، بلاش تنزل النهاردة
= الشركة دي في رقبتي يا منال مينفعش اسيبها،، دي فلوسك وأنا لازم اكون امين عليها حتى أكتر من نفسي
ربنا يخليك ليا يا حبيبي
= ويخليكي ليا
طب هنتغدا مع بعض النهاردة؟
= مش عارف اذا كنت هعرف ارجع ولا لا بس هحاول
لا تعالى عشان خاطري
= انتي تؤمري
" كملت لبس و بعدها نزلت و روحت على بيت نورا،، الساعة كانت 12 الضهر،، وطبعا وصلت هناك ولبست الجلابية البيضا والطاقية و دخلت الشقة لقيتها لابسة الاسدال وبتصلي،، قعدت جنبها لحد ما خلصت و بعدها هي جات قعدت جنبي
حمدالله على سلامتك يا حبيبي
= الله يسلمك يا ست البنات،، طمنيني على احوالك؟
انا بخير الحمدلله المهم انت
" اتنهدت و رجعت سندت على الكرسي
مش بخير يا نورا،، مشتت جدا الصراحة
= ليه بس يا أمجد؟،، حصل ايه؟
بقالي فترة بحلم حلم غريب اوي
= ايه هو؟
اني واقف قدام شقة و معايا مفتاحها وبفتحها بيه عشان اتفاجئ ب كنز كبير ملوش اخر،، كنز هائل يا نورا وبمجرد ما بدخل جوا الشقة عشان استكشف الكنز بلاقي باب الشقة اتقفل لوحده عليا وانا جوا و بعدها بصحى من الحلم
= حلم غريب بس ممكن يكون خير
تفتكري فعلا ممكن يكون في كنز؟
= انت شخص كويس يا أمجد و ربنا اكيد هيرزقك بالكنز اللي تستحقه
انا ربنا رزقني بيكي خلاص يا نورا،، مش عايز أكتر من كدا
= انا مبقتش مصدقة نفسي لما اتقدمتلي،، أخيرا لقيت الشخص اللي بحلم بيه،، فيك كل الصفات اللي كنت بحلم بيها
انتي عارفة اني حلمت بيكي قبل ما اعرفك؟
" ابتسامتها في الوقت دا اترسمت على وشها وقالتلي
بجد؟
= بجد
طب قولي بقا عملت ايه مع الست اللي هتتجوزها
= عرضت عليها الموضوع ومستني ردها
ربنا يقدملك اللي فيه الخير يا حبيبي
= انا مفيش حاجة بتفرحني قد دعائك ليا
انا دايما بدعيلك يا حبيبي
= طب ايه بقا؟،، ما تيجي ندخل جوا شوية
عيب يا أمجد
= اصل الجو هنا حر،، قومي بس معايا
" من الحاجات اللي لازم تكون واخد بالك كويس منها هي انك تكون مسنود من كل الجهات عشان لو وقعت من طرف تلاقي الطرف التاني يلحقك،، في اليوم دا قعدت عند نورا وقت طويل لحد الساعة 10 بليل وبعدها قررت امشي عشان اعرف اوصل في المعاد،، ووصلت بالفعل هناك،، في شقة حماتي عشان اشوف شهد،، بعد ما وصلت ب ساعة سمعت جرس الباب بيرن قومت فتحت الباب ولقيتها هي
كنت حاسة انك هتيجي النهاردة
" ابتسمتلها وهي دخلت الشقة وقفلت الباب وراها
في الحقيقة انا جيت عشانك
= أمجد انا لسة..
انا حلمت بيكي
= بيا انا؟
اه
= حلمت ب ايه؟
حلمت اني واقف قدام باب شقة ومعايا مفتاحها وفتحتها فعلا ولقيت جواها كنز كبير ملوش اول من اخر بعدها لقيتك أنتي ظهرتي ووقفتي جنبي و بعدها دخلنا جوا الشقة أكتر والباب اتقفل علينا
" لقيتها ابتسمت وعنيها لمعت وقالتلي
الكنز كان عبارة عن ايه؟
= كل اللي نفسك فيه،، أي حاجة بتحلمي بيها هتبقا موجودة جوا
اي حاجة؟
= اي حاجة
طب والحلم دا معناه ايه؟
= اني صاحب مفتاح الشقة،، شقة السعادة،، الجنة اللي بيحلم بيها أي بني آدم بس جنة على الأرض وشروطها بسيطة جدا
ايه شروطها؟
= انك تبقي معايا و تنفذي اوامري،، توهبي حياتك و روحك كلها ليا،، ابقا انا رقم واحد في حياتك
وأنا موافقة
= موافقة تتجوزيني؟
موافقة جدا،، موافقة اكون تحت طوعك،، روحي وجسمي كلهم ليك
= بدأتي تفهمي يا شهد
" كأنها كانت في عالم تاني وهي بتكلمني،، بس هو دا اللي انا عايزه،، لازم العقل يتمسح تماما عشان اعرف اسيطر عليه ويبقا تحت ايدي انا وبس
هنتجوز امتى؟
= اول ما هكلمك تتفقي مع اهلك اني جاي اتقدملك
اتفقنا،، متتأخرش
= انا دايما مظبوط في مواعيدي مبتأخرش
" في الوقت دا كانت منال بتكلمني كتير جدا اكتر من 10 مرات،، بعد ما شهد مشيت وانا نزلت من الشقة و ركبت العربية رديت عليها
ايه يا حبيبتي في ايه؟
= انت فين يا امجد؟
انا في الشغل يا حبيبتي،، في حاجة؟
= في الشغل ازاي؟ وأنا اتصلت بيهم وقالو انك مجيتش النهاردة ولا امبارح!!
بقلم : عمرو_راشد
صاحب_مفتاح_الشقة 7
#يتبع
مجمع رواية صاحب مفتاح الشقه من هنا
