رواية دماء على أوراق الورود الجزء الأول الفصل الثانى 2 بقلم آسر توفيق
رواية دماء على أوراق الورود الجزء الأول الفصل الثانى 2
عند السادسة مساء وصل الحاج مهاب عند مكتب المحامى ليجد فى انتظاره رجاء الهوارى ارملة اخيه وشقيقها حامد ومعهم داليا ابنة اخيه التى اندفعت نحوه باكية والقت نفسخا فى حضنه عند دخوله وهى عاجزة عن الكلام
مهاب : اهدى يا حبيبتى كفايه عياط وارحمى نفسك المرحوم ما يعزش على اللى خلقه دى اعمار وكلنا مصيرنا بايد ربنا ادعيله يا حبيبتى بالرحمه واستغفرى ربك
داليا محسن : مش قادره اصدق لحد دلوقت ان بابا مات مش عارفه اقول ايه ولا اعمل ايه
مهاب : اول حاجه لازم تعمليها انك تبطلى عياط وترحمى نفسك وترجعى مدرستك الامتحانات قربت وانتى لازم تنجحى علشان تفرحى بابا وتغرحينى انا كمان
داليا محسن : مش قادره يا عمى مش قادره
مهاب : لازم تقدرى يا حبيبتى انتى قويه انتى بنت عيلة شركس لازم تقدرى علشان خاطر بابا وعلشان خاطرى مش انا كمان بابا مهاب ؟
داليا محسن : حاضر يا عمى من بكره حاروح المدرسه علشان خاطر بابا وعلشان خاطرك
مسح دموعها بيده وهو يصطحبها ليجلسها بجواره على الاريكة قائلا
مهاب : خلاص يبقى كفايه عياط بقى
ثم التفت الى رجاء واخيها قائلا
مهاب : لا مؤاخذه يا حاج حامد حمد الله على السلامه
حامد : الله يسلمك يا حاج مهاب كويس انك اخدت بالك اننا قاعدين
مهاب : معلش انتوا عارفين لما باشوف داليا بتعيط الدنيا بتضيق فى عينى ما باشوفش حاجه انتوا قاعدين من بدرى ؟
رجاء : لا ابدا احنا واصلين قبلك بدقايق والمحامى منتظرنا ومفضى نفسه علشاننا
السكرتيره : اتفضلوا الاستاذ فى انتظاركم
دخلوا الى مكتب المحامى وجلس مهاب امام مكتبه وبجواره داليا وعلى المقابل جلست رجاء وبجوارها حامد وبدا المحامى يطالع شهادة الوفاة وتقرير المستشفى وبعض الاوراق قبل ان يسال
المحامى : ممكن اعرف مين المستحقين للتركه ؟ اقصد الورثه يعنى
مهاب : مفهوم يا متر الورثه هم بنته داليا ودى قاصر وزوجته مدام رجاء الهوارى ومعاهم انا باعتبار ان المرحوم ما كانش عنده اولاد ذكور مافيش غير داليا
المحامى : طبعا داليا تحت وصاية والدتها مدام رجاء تمام يبقى حضرتك يا حاج ومدام رجاء تعملوا توكيل ونرفع الدعوى ويوم الجلسه تحضروا اتنين شهود
مهاب : مافيش مشكله نعمل التوكيل وعلى الشهود عندنا العزبه بحالها تشهد وكفايه اولادى محسن ونادر
المحامى : لا يستحسن يا حاج من غير الاقارب ودلوقت ممكن اخد فكره عن عناصر التركه ؟ الميراث اللى سايبه المرحوم وهل فيه مخصصات او موروثات تستدعى التقسيم اراضى او عقارات
رجاء : المرحوم سايب خير كتير جدا ده دكتور محسن ممتاز شركس كان عميد كلية الهندسه ومن عيله كبيره ومعروفه وسايب شقق وفلوس و .....
قاطعتها داليا بجفاء
داليا : بيتهيالى ان عمى الحاج مهاب ادرى بالحاجات دى منك
صمتت رجاء على مضض وهى مستاءة من مقاطعة داليا لها بينما قال مهاب للمحامى
مهاب : والله يا استاذ المرحوم زى ما يكون حاسس ان اجله قرب واتصرف فى كل حاجه تقريبا قبل وفاته يعنى كتب الشقه اللى فى لوران باسم داليا بنته وعمل وديعه لمدام رجاء بنصيبها فى الميراث وعمل وديعه تانيه لداليا بس تصرفها لما تكمل خمسه وعشرين سنه وكل اللى فاضل بعد كده شقه فى العجمى وشاليه فى الساحل ومبلغ فى البنك بس مافيش خاجه تانيه
رجاء : والارض ؟
مهاب : ارض ايه ؟
رجاء : الارض اللى فى العزبه
مهاب : ارض ايه اللى فى العزبه هو المرحوم ما قالش حاجه عنها ؟ الدكتور باعلى الارض دى من اكتر من سنه مش معقول ما جابش سيره لواحده منكم
انتفضت داليا عند سماع ذلك ونظرت لعمها بدهشة بينما وقفت رجاء بغضب وقالت بحدة
رجاء : كلام ايه الفارغ ده يا حاج مهاب ؟ ازاى باعلك الارض ؟
مهاب : زى الناس يا مراة اخويا ارضه وهو حر فيها وبعدين المرحوم اخويا كان بيصرف كتير على ابحاث وبيالف كتب علميه ومش بيهتم بالربح وكان بيصرف على حاجات تانيه كتير انتوا ما تعرفوهاش ومن حوالى سنه وزياده قعدنا نتحاسب وباعلى الارض
وقف حامد الذى كان يتابع الحديث صامتا واقترب من المكتب وقال بسخرية
حامد : وباعلك الارض ازاى بقى يا حاج مهاب ؟ بعقد عرفى واللا بالكلمه ؟
مهاب : هو فيه ارض بتتباع بالكلمه يا حاج حامد ؟ المرحوم باعلى الارض بعقد رسمى مسجل وتوكيل فى الشهر العقارى وادى صورة العقد والتوكيل
حامد : الله الله الله انت جاى جاهز لا لعبتها صح
مهاب : هى ايه دى اللى لعبتها صح ؟ العقد والتوكيل عندكم تقدروا تكشفوا عليهم فى الشهر العقارى واكتر من كده مش عاوز كلمه فى الموضوع ده
رجاء : العقد ده اكيد مزور المرحوم مستحيل يبيع ارضه وانا مش حاسكت
مهاب : احفظى لسانك يا رجاء انا عامل خاطر للمرحوم اخويا وبنته واللى مش مصدق عنده المحكمه ليها بدل الباب عشره
رجاء : وانا قلت مش حاسكت وبينى وبينك المحكمه
مهاب : اعلى ما فى خيلك اركبيه
حامد : انت قلبك جامد قوى يا حاج مهاب لكن لازم تعرف ان المحكمه مش السكه الوحيده اللى ناخد بيها حقنا ناس زمان قالوا اخد الحق حرفه
مهاب : انا شامم ريحة تهديد والحاج مهاب شركس ما يتهددش لكن علشان نقصر الشر انا ليا قعده تانيه معاك انت والست اختك حنقول فيها كلام تانى يعرفك مين هو مهتب شركس وعلشان تعرف قلبى جامد قد ايه حاجيلكم من غير رجالتى ومعايا ابنى الكبير بس
انهى كلامه والتفت نحو داليا ليرى فى عينيها نظرة فزع فدنا منها الا انها تراجعت برعب قائلة
داليا محسن : انا مش مصدقه مش مصدقه دى اخر حاجه كنت اتصورها دلوقت بس حسيت انى يتيمه
مهاب : يا بنتى انا ....
داليا : ما تقولش بنتى انت مش عمى الحاج مهاب انت مين ؟ انت واحد تانى يا خساره يا الف خساره دلوقت بس حسيت ان بابا مات وسابنى لوحدى
.....................
مساء الخير البوست قصير ومعلش حاضطر انشر تلات او اربع بوستات بالحجم ده لحد ما اشوف هل حيستنر النشر واللا الاقى البوستات بتترفض ولما تتضح الصورة فى الروايه حابدا اطول البوستات
يتبع
