رواية دماء علي أوراق الورد الجزء الأول الفصل الرابع 4 بقلم اثر توفيق
رواية دماء علي أوراق الورد الجزء الأول الفصل الرابع 4 بقلم أثر توفيق
كانت علاقة داليا بامها غاية فى السوء وازدادت سوءا بعد وفاة ابيها كانت المشاحنات والعناد بينهما يوميا ولم تهتم رجاء ابدا بتوفير الجو المناسب لابنتها للنجاح فى هذا العام الصعب الثانوية العامة وكان اسوا مافى الامر انها تركتها وحيدة وسافرت قبل الامتحانات باسبوعين فى اشد اوقات احتياج داليا اليها .
بالطبع تاثرت داليا كثيرا ولكنها حاولت ان تظهر اللامبالاة قائلة لزميلاتها اللاتى صدمن من الخبر
داليا : احسن يعنى انها سافرت على الاقل اقدر اذاكر بهدوء هى يعنى كانت عاملالى ايه انشالله ما ترجع
ورغم ذلك كانت تبكى الما وهى وحدها وتقف امام صورة ابيها تناجيه وتشكو اليه وحدتها بعده
بعد سفر رجاء بعدة ايام دق الجرس فذهبت لتفتح لتجد امامها احلام زوجة ابراهيم البواب تحمل كيسا به بعض الملابس وتقف مطرقة الراس
احلام : ازيك يا ست داليا
داليا : احلام ؟ ازيك عامله ايه ؟ خير يا احلام ؟
احلام : مش عارفه اقول ايه اصل ابراهيم ضربنى وسبتله الاوضه ممكن تخلينى اقعد عندك كام يوم على ما ابويا ييجى من البلد ؟
داليا : اتفضلى يا احلام ادخلى
دخلت احلام وجلستا فى الصالة
احلام : معلش يا ست داليا حاتقل عليكى
داليا : ما تقوليش كده يا احلام انتى اتعشيتى واللا لسه ؟ انا لسه ما اتعشيتش نتعشى سوا
احلام : طيب قومى انتى شوفى مذاكرتك وانا حاحضر العشا
داليا : لالا ما يصحش انتى ضيفتى تعالى نحضر العشا مع بعض
احلام : والله العظيم ما يحصل انتى قومى علشان امتحانك وانا حاعمل كل حاجه
مرت عدة ايام واحلام تنظف الشقة وتجهز الطعام لتترك لداليا المجال حتى تهتم بدروسها حتى عادت داليا يوما من درس للمراجعة فلمحت احلام تدخل الى غرفتها بجوار السلم فاقتربت لتناديها وهى تتمنى ان تكون قد تصالحت مع ابراهيم ولكنها حين اقتربت سمعتها تقول
احلام : هى الوليه دى ماعندهاش دم ؟ يعنى تسيب بنتها ايام الامتحان وتاخد الشغاله كمان معاها طب كانت تسيب الشغاله حتى تشوف طلباتها علشان تعرف تذاكر
ابراهيم : معلش يا احلام البركه فيكى ما تنسيش الدكتور الله يرجمه طول عمره كان خيره علينا امنى خليكى جنبها لحد ما تخلص اهو نرد حاجه من جمايل الدكتور الله يرحمه
احلام : الله يرحمه اما لو عليا اخدمها بعينيا لكن لو قلتلها افضل معاكى علشان امتحانك كانت حتصعب عليها نفسها
انسحبت داليا وهى تمسح دموعها وصعدت الى شقتها ووقفت امام صورة ابيها الراحل
داليا : شفت يا بابا ؟ الغرب هم اللى بيراعونى واهلى مش سائلين فيا شفت عمى عمل ايه بعدك ؟ منك لله يا عمى فيها ايه لو اخدتنى فى حضنك وقلتلى عاوز الارض كنت حاسيبها وكفايه افضل فى حضنك منك لله يا ماما عمرى ما حسيت بحنيتك ولا كأنى بنتك
......................
ورغم كل ما عانته الا انها نجحت فى النهاية ولكنها لم تحقق المجموع الذى كانت ترجوه لدخول كلية الهندسة التى حلمت بها منذ طفولتها وايضا لم تكن امها موجوده ولم تكلف نفسها حتى اتصال تليفونى تطمئن على نتيجتها وهو ما اصاب داليا بالاحباط والاسى واصبحت تعانى من احساس قاتل بالوحدة يجعلها دائمة الشرود
عبد الرحمن : داليا انتى يا بنتى مش سامعانى ؟
داليا : اونكل عبد الرحمن ؟ انا اسفه كنت سرحانه
عبد الرحمن : انتى بقيتى على طول سرحانه مالك يا حبيبتى معقول دى داليا الورده المفتحه اللى كنت باشوفها قلبى بيفرح ؟ تعالى يا داليا تعالى اطلعى معايا نتعشى مع بعض
صعدت معه الى شقته فى الطابق السادس لتستقبلها زوجته بترحاب كبير
ولاء : اخص عليكى يا دودو ما بقيتيش بتسالى عن خالص
داليا : انا اسفه يا تانت بس من يوم بابا وانا من هم لهم
ولاء : ربنا يبعد عنك الهم يا حبيبتى ادخلى اقعدى مع عمك عبده شويه على ما اخلص العشا
وفى حجرة الصالون دخل عبد الرحمن يحمل زجاجة مياة غازية ناولها لها قائلا وهو يجلس بجوارها
عبد الرحمن : احكيلى بقى يا ست البنات ايه اللى مضايقك ؟
داليا : كل حاجه يا اونكل كل حاجه من يوم ما مات بابا والدنيا كلها معاندنى مش عارفه ليه انا عملت ايه علشان عمى يطمع فى ورثى ويسيبنى لوحدى طب طمعان فى الارض ياخدها انما يسيبنى ليه مين يحمينى ؟ وامى سايبانى على طول مش عارفه ليه طب لو عندها غيرى كنت اقول يمكن بتحبها اكتر منى انما ما عندهاش غيرى طب حتى بعد كل مذاكرتى ما جبتش المجموع اللى نفسى فيه ومش عارفه اعمل ايه اعيد السنه واللا ادخل اى كليه وخلاص ؟ طب كل صاحباتى سحبوا ورق التنسيق واهاليهم بيساعدهم فل الرغبات وانا لوحدى اقول لمين يفهمنى ويساعدنى انا حاسسه انى لوحدى فى صحرا مالهاش اول من اخر
كانت تخرج كل مافى قلبها وهى تبكى بكاء مرا اما هو فقد تركها تفرغ كل انفعالاتها وهو يربت على كتفها مواسيا ويناولها منديل تلو الاخر حتى انتهت
داليا : انا اسفه يا اونكل ضايقتك بمشاكلى
عبد الرحمن : عيب يا بنتى الكلام ده انتى عارفه ان انا وباباكى كنا اصدقاء وجيران من قبل ما تتولدى وانا زى باباكى سيبيها على الله وما تحمليش هم وعلى التنسيق يا ستى سهله نروح انا وانتى بكره نسحب الاستمارات ونقعد مع بعض نكتب الرغبات واى حاجه عاوزاها كلمينى واعتبرينى مكان بابا
......................
وعادت رجاء من سفرها وعادت المشاحنات لاتفه الاسباب واحيانا بدون اسباب
رجاء : انتى كنتى فين يا بنت من الصبح ؟
داليا : يهمك قوى تعرفى ؟ ما تشغليش بالك كنت فى مشوار يخصنى
رجاء : والجيران يقولوا ايه لما يلاقوكى طالعه داخله كل يوم ؟
تعجبت داليا وضربت كفا بكف وهى تقول
داليا : انتى حتى مش ملاحظه ان من يوم ما رجعتى اول مره اخرج النهارده ؟ فين كل يوم طالعه داخله ده فى خيالك بس واللا عاوزه تتخانقى وخلاص ؟ حاجه عجيبه والله عموما الجيران اللى بيهتموا عارفين انى النهارده كنت فى مكتب التنسيق وعمو عبد الرحمن صاحب بابا هو اللى راح معايا بعربيته وهو اللى كتب معايا الرغبات اما بقى الجيران اللى زى حضرتك اللى مش مهتمين باى حاجه مش حيسالوا
رجاء : اه صحيح انتى عملتى ايه فى النتيجه ؟
داليا : والله لسه فاكره ؟ ما تشغليش بالك ولو انى عارفه انك مش شاغله بالك اصلا وبتسالى كده برو عتب انا مستغربه والله عمرى ما شفت ام بالشكل ده
رجاء : انتى ازاى تردى عليا بالاسلوب ده ؟ انتى نسيتى ان انا امك ؟
داليا : والله نفسى انسى زيك انتى اللى نسيتى انا بقى لو نسيت حارتاح
.......................
بعد التنسيق ذهبت داليا الى صديقتها هند لتسال اباها المحامى المعروف عن امر ما
داليا : مساء الخير يا عمو ازى حضرتك
عمر : اهلا اهلا يا داليا يا بنتى ازيك اخبارك ايه ؟
داليا : الحمد لله كنت عاوزه اسال حضرتك عن العقد ده
ناولته عقد استضافة كان ابوها قد حرره باسم رجاء لاستضافتها مدى حياتها فى الشقة التى ملكها لداليا وقد نص فيها على بقائها فى الشقة طوال حياتها او حتى انتفاء صفة الامومة فقراه المحامى مندهشا
عمر : يعنى ايه الكلام ده طب ده عقد استضافه ماشى انمايعنى ايه انتفاء صفة الامومة ؟ انا اول مره اشوف الجمله دى فى عقد
داليا : هو ازاى يعنى ممكن تنتفى صفة الامومة ؟
عمر : مش فاهم عموما طالما والدك وصى بكده يبقى لازم تنفذى وصيته ولما يجد جديد حنعرف سا داليا انتى زى هند بنتى وانا جنبك فى اى حاجه تحتاجيها
....................
الغاز الغاز الغاز لسه الحلقات كلها عماله تزيد فى الغموض والالغاز لكن كل حاجه حتظهر والحكايه طويله بس ياترى ليه قالوا ان داليا سافرت بينما داليا فى لوران وليه معاب راح يسال على داليا فى رشدى ؟
ملحوظه والنبى عليا الطلاج بالتلاته انا راجل رااااااجل وابو اسيل علشان اسيل ده اسم بنتى بس على فكره ما بازعلش للخبطه دى عادى
يتبع
