رواية دماء علي اوراق الور الجزء الأول 1الفصل الثامن 8 بقلم اثر توفيق.
يوم الخميس انهت محاضراتها وخرجت مع صديقاتها من الباب المقابل للمكتبة للذهاب الى مجطة الرمل كالعادة فى نهاية كل اسبوع ولكن عند خروجهم فوجئت بسيارة حاتم تقف فى الجانب المقابل عند مكتبة الاسكندرية هل هى فعلا سيارته ؟ بالتاكيد هى فالسيارة مميزة كصاحبها
تنحنحت وقالت بحرج
داليا : طيب يا جماعه معلش اصل العربيه دى جايه علشانى اشوفكم بقى الاسبوع الجاى
امل : عربية مين دى يا داليا ؟
داليا : ده ده ده ... جارنا اه جارنا اصله قابلنى الصبح وانا جايه ووصلنى وقلتله انى تعبانه ونازله بالعافيه علشان المحاضرات مهمه قاللى انه يمكن ييجى يوصلنى
هند : انتى تعبانه ؟ غريبه مش باين عليكى
نسرين : احنا مش كنا متفقين نروح محطة الرمل وبعد كده نوصل امل محطة القطر ؟
داليا : رمل فى عينك منك ليها باقول لكم الراجل تاعب نفسه وجاى مخصوص علشان يوصلنى ما يصحش اكسفه خلى محطة الرمل الاسبوع الجاى وحاعزمكم على حسابى
هند : ده شكل الموضوع كبير قوى
داليا : اه اه هو كبير ده من سن بابا ياللا بقى امشوا علشان امل حتتاخر
امل : قلبك على امل قوى ؟ طيب يا ستى عاوزين نشوف بابا ده
داليا : بلاش رخامه حازعل ومش حاعزمكم الاسبوع الجاى
نسرين : خلاص يا يتى احنا ماشيين نشوفك الاسبوع الجاى
انصرفت الفتيات واخذت هى تبحث حول السيارة حتى راته قادما من بعيد وفى يده علبتى مياة غازية
حاتم : اكيد المحاضرات نشفت ريقك علشان تعرفى انى حاسس بيكى
داليا : حاتم ؟ مش معقول ايه الصدفه دى ؟ بتعمل ايه هنا ؟
حاتم : يعنى واقف بقالى ساعه مستنى ورايح اجيب بيبسى مخصوص وسايب العربيه علشان لما تشوفيها ما تمشيش وتبقى صدفه ازاى ؟
داليا : قصدك انك جاى علشانى مخصوص ؟
حاتم : وحاعزمك على الغدا كمان اركبى
ركبت بجواره متسائلة
داليا : انت راكن العربيه هنا من بدرى ؟
حاتم : يعنى مش من ساعه اوى تقريبا ربع ساعه بس خفت تخرجى وانا باجيب البيبسى قلت اسيب العربيه لما تشوفيها تعرفى انى هنا
داليا : بس هنا ممنوع الركنه كان ممكن الونش يشيلها
حاتم : ونش ؟ ونش يشيل عربية حاتم فريد ؟ العربيه دى المرور كله عارفها وماحدش يقدر يقرب لها يا بنتى انا حاتم فريد زهران مش اى حد
داليا : طيب انت حتودينى نفس المطعم ؟
حاتم : لا انا حاغديكى سمك فى ابو قير اصل الفوسفور بينشط المخ ويحسن الحاله المعنويه علشان تعرفى تذاكرى ويبقى تغيير برضه ايه رايك ؟
داليا : ماشى بس صحيح انت عرفت منبن انى فى تجاره
حاتم : ايه الغباء ده ؟ باقول انا حاتم فريد عاوزه حاتم فريد ما يعرفش انتى فى كلية ايه وفى سنه كام وبتخلصى محاضراتك الساعه كام ؟
......................
فى مطعم اسماك على شاطئ ابو قير اعدت لهما مائدة يفصل بينها ولين الرمال بضع درجات خرسانية وجلسا يتاملان البحر وهما يتناولان الطعام وسالها بصورة عابرة
حاتم : ماما رجعت من السفر واللا لسه ؟
داليا : لسه قدامها اسبوع ويمكن تطول واللا ربنا يسهل ما ترجعش خالص
حاتم : انتى ليه كارهه امك بالشكل ده ؟ دى حاجه غريبه
داليا : امى ؟ فين امى دى ؟ امى عمرها فى يوم ما رجعت من المدرسه الاقيها تاخدنى فى حضنها وتسالنى عملت ايه ؟ امى عمرها ما لقيتها صاحيه الصبح تحضرلى سندوتشاتى وتسرح شعرى ؟ امى عمرها ما سهرت جنبى وانا عيانه ؟ امى عمرها ما سالت يوم النتيجه عملت ايه ؟ هى الامومه كلمه تتقال وخلاص ؟ ارجوك يا حاتم كفايه
قامت تاركة الطعام فقام حاتم خلفها بعد ان اوصى العاملين بترك كل شيء لحاله
حاتم : اهدى يا داليا معلش انا اسف تعالى نتمشى شويه
نزلا جنبا الى جنب يتمشيان فوق الرمال ومرت بضع دقائق من الصمت قبل ان يقول بهدوء
حاتم : يا داليا انتى مش عارفه ايه ظروفها
داليا : ظروفها دى لما تكون اتغيرت فجاه نقول عندها ظروف انما دى طول عمرها كده طول عمرى من وانا صغيره الاقى بابا هو اللى يصحينى ويلبسنى ويسرح شعرى ويعمل سندوتشاتى وينزلنى لحد الباص ولحد ما كبرت كان هو برضه اب وام وهى مجرد صوره مالهاش معنى ولا فيها اى صفه من صفات الامومه اللى البنات اللى معايا بيحكوا عنها حتى لما بابا مات وعمى اخد ورثى واكل حقى قالت ازاى وحقنا قال لها انتى عندك وديعه بحقك كامل ومالكيش دعوه بالبنت قالت طالما انا اخدت حقى تولع البنت مل*عون ابو البنت
انفعلت بشدة وسالت دموعها فاعطته ظهرها وواجهت البحر فربت على كفتها مواسيا وارتج جسدها كله انفعالا وهى تقول
داليا : مش مهم عندها غير حقها وفى داهيه بنتها والاخر راحت اتجوزت واحد شبه الرجاله واحد مالوش لازمه ولا له وصف بعد ما كانت حرم الاستاذ الدكتور محسن ممتاز شركس تبقى حرم اللى مالوش لازمه ده ؟
حاتم : يمكن بيحبوا بعض
داليا : يولعوا ببعض ده اصغر منها بعشر سنين دى حصل لمخها حاجه
حاتم : بصراحه هى جوازه غريبه خلت الكل يستغرب والراجل شكله من اللى بيصطادوا الارامل الكبار فى السن علشان فلوسهم
داليا : تستاهل خليه يلهف الوديعه بتاعتها
حاتم : والوديعه دى كبيره ؟
داليا : ما اعرفش وما يهمنيش بس ياريت يسبونى فى حالى ويبعدوا عنى ويريحونى وكفايه اللى عمله عمى اللى لحد دلوقت طعم المر ما راحش من بقى
حاتم : عمل ايه عمك ؟
داليا : زور عقد بالارض من بابا وسجلها باسمه وقال ان بابا باعهاله وفى الاخر ليرميلى صدقه كل شهر
حاتم : انتى متاكده ؟ مش يمكن بابا باعله الارض فعلا ؟
داليا : هو بيقول كده لكن بابا ما قالش حاجه
حاتم : طيب بالمنطق طالما طمع فى الارض ايه اللى يخليه يديكى مصروف ؟
داليا : يمكن بيخلص ذمته او علشان منظره قدام الناس
حاتم : هى يعنى الارض دى كبيره قوى للدرجه دى ؟
داليا : ولا اعرف ولا فارق معايا كل اللى فرق معايا انى بعد موت بابا لقيت عمى اللى المفروض اتحامى فيه هو اللى بيغدر بيا عارف لو كنت ورثت طبيعى ولقيت عمى بيقول انه عاوز الارض كنت اتنازلت عنها وكفايه افضل فى حضنه بس هو فضل الارض عليا وباعنى واشترى شوية طين
حاتم : وهو بابا ما سابش اى حاجه ليكى ؟
داليا : كتبلى الشقه باسمى وسابلى وديعه تتفك لما اكمل خمسه وعشرين سنه سالت على الفوايد لقيتها تراكميه تتصرف مع الوديعه كان نفسى اعرف اصرف الفوايد وما اخدش من عمى ولا مليم بس اعمل ايه
حاتم : طيب هو بيدفعلك مبلغ يكفى مصاريفك
داليا : بيكفى ويزيد واكتر من اللى باطلبه لما ابعت مع المحامى انى مثلا عاوزه الف جنيه اجيب لبس يبعت عشره وقال ان كل طلباتى مجابه وهو ملزم بيها بس برضه حاسسه انها صدقه
حاتم : طيب انتى هديتى نرجع نكمل غدا ؟
داليا : ماليش نفس خلاص
حاتم : علشان خاطرى انتى عاوزه تزعلينى ؟
ابتسمت وتجوها للمطعم لاستكمال الطعام وهناك قال لها
حاتم : تعرفى انا قلتلك انى عرفت لنات كتير عمرى ما سالت واحده فيهم على اى حاجه ولا اهتميت انتى الوحيده اللى عاوز اعرف عنك كل حاجه مش عارف ليه بس مش ده المهم دلوقت المهم انك تشدى حيلك فى المذاكره علشان تخلصى السنه دى وتشوفى مصلحتك انتى عامله ايه فى المذاكره ؟
داليا : انا تقريبا مش باذاكر تعرف انى كان نفسى ادخل كلية الهندسه لكن بابا مات وانا فى ثانويه عامه وبعدها حصل موضوع الورث للاسف كل ده اثر عليا وعلى مجموعى ودخلت تجاره وباكملها كده وخلاص
حاتم : انتى عارفه انى كنت من العشره الاوائل على المحافظه ودخلت تجاره برغبتى ؟
داليا : طيب ليه ما دخلتش كليه من كليات القمه ؟
حاتم : لان هى دى فى نظرى كلية القمه تعرفى الصراع فى العالم حاليا بقى قائم على الاقتصاد ما بقاش صراع عسكرى واللى يفهم اقتصاد كويس يقدر يتحكم فى مجريات الامور فى محيطه الصغير ويمكن الكبير لو امتلك القوة والقوة المطلوبة هنا هى المال اما الحروب العسكرية بقت موضه قديمه وقبل ما يفكروا فيها يحسبوا كلفتها الافتصاديه الاول
نظرت نحوه بانبهار قائلة
داليا : كلام كبير قوى بس ما فهمتش ولا كلمه هههههه
حاتم : هههههههه احسن يبقى خلى الكلام ده لبعد الامتحانات اسمعى بكره وراكى حاجه ؟
داليا : ورايا مذاكره بس ده لو قدرت
حاتم : خلاص بكره عاوزك الصبح بدرى تجهزى وتجيبى معاكى ورق الماده اللى صعب عليكى حنقضى اليوم كله مع بعض وافسحك واذاكر معاكى
داليا : معقول حتفضى نفسك علشانى وتذاكر لى مخصوص ؟
حاتم : انا مش عارف اقول ايه بس انا مستعد فعلا اذاكر معاكى كل يوم علشان تنجحى وتجيبى تقدير كويس
داليا : انت حتخلينى اكل الكتب علشان اجيب التقدير اللى يرضيك
حاتم : طيب ياللا علشان نتمشى شويه بعد الغدا ونروح على طول
.......................
فى اليوم التالى انتظرها حاتم مبكرا عند محطة الترام واصطحبها الى المعمورة وعلى الشاطئ فى الشاليه الخاص به قام باخراج كرسيين امام الشاليه
حاتم : ايه رايك فى الجو ده للمذاكره ؟
داليا : هايل انت مش ممكن
حاتم : المهم عندى تكومى مرتاحه ونفسيتك فريش علشان تستوعبى قوليلى جبتى الورق ؟
داليا : ايوه طبعا
اخرجت من حقيبتها مذكرة ناولتها له فقال
حاتم : اه المحاسبه بس المحاسبه مش صعبه انتى ليه مش مستوعباها ؟
داليا : مش عارفه يعنى ... بس ......
لم تستطع اعطاء سبب واضح وشعر هو انها تفتقد التركيز
حاتم : مالك شكلك مرهقه ومش مركزه فيه حاجه مضايقاكى ؟ لو مش عاجبك المكان ممكن نغيره
داليا : لالا طبعا المكان عايل والجو رائع بس بصراحه بعد كلامك امبارح روحت فعدت اذاكر لحد ما اتصلت بيا الصبح وتزلت على طول
حاتم : معقول سهرانه تذاكرى طول الليل ؟
داليا : علشان ارضيك
حاتم : علشان ترضينى تضيعى تعبك ومجهودك على الفاضى ؟ مش طريقة مذاكره تجيب نتيجه كويسه وكده احنا مش حينفع نذاكر النهارده شوفى انا حاخد المذكره معايا اراجعها وبكره اشرحلك والنهارده نقضيه فسحه ونعمل ريفريشنج علشان بكره عاوزك بكامل تركيزك بس عاوز اديكى نصيحه اوعى تضغطى على نفسك فى المذاكره فوق طاقتك لما تحسى ان تركيزك ضعف وقفى المذاكره وقومى العبى شوية رياضه اتفرجى على فيلم اسمعى اغنيه نامى ساعه او اتنين لحد ما ذهنك يصفى والمعلومه اللى ذاكرتيها تثبت وتبتدى تكملى عارفه انا كنت متعود كل تلات ساعات مذاكره لازم اريح ساعه حتى لو مش حاسس بالتعب والنتيجه انى كنت الاول على دفعتى طول الاربع سنين
داليا : طيب ليه ما اتعينتش معيد
حاتم : اترشحت ورفضت التعيين وفضلت الشغل الحر فى البورصه لانه بيدينى متعة التحكم فى مجريات الامور وده اهم عندى من المكسب المادى
داليا : مش فاهمه
حاتم : طبيعى لانك مش مركزه لكن عموما ده موضوع نقدر ناجله لبعد الامتحانات ودلوقت ايه رايك تحبى تنزلى البحر ؟ الجو النهارده جميل قوى
داليا : بس انا ما عنديش حاجه تنفع انزل بيها البحر
حاتم : لو عاوزه ممكن نروح نشترى ولو مش عاوزه نتمشى ونتغدى وبعدها ممكن نركب عجل ولما تروحى هاوزك تسيبى نفسك خالص وتنامى او تتفرجى على التليفزيون بس يكون فيلم كوميدى او كارتون انا عاوزك بكره فى اعلى درجات التركيز
يتبع
رواية دماء علي اوراق الورد الجزء الأول الفصل التاسع 9 من هنا
