رواية جثةالقرين الفصل الأول 1 بقلم محمود الأمين
رواية جثة القرين بقلم محمود الأمين
(طفولة مريرة)
الخيال.. هل ممكن حياتنا تكون مش حقيقية؟
هل ممكن نكون عايشين في الوهم والاحلام وهنصحي هنلاقي الواقع غير؟
بتسمع عن الجن والعفاريت والمردة والشياطين.. بتسمع بس ولا شوفت؟
طيب سؤال أخير
عمرك سمعت عن قرين مات وبيعذب صاحبه
اي استغربت الكلام.. اكيد
لكن مفيش اصعب من انك تشوف شخص ميت ولما تكشف عن وشه تطلع انت
...
اقسمت عليك يا زمزال الاحمر ابن بني برجاش.. احضر الان ونفذ ما آمرك به.. ياشن ياشن.. عصود عصود.. ماقر ماقر
بحق هذه الاسماء احضر الان
بعد ما قريت الكلام ده نور الشمعة اطفي.. وحسيت اني مش لوحدي وان في حد لمس كتفي
طلعت الولاعة وولعت الشمعة تاني.. صرخت عشان الي كان واقف ورايا ده لا يمكن يكون حقيقي
....
الحلقة الاولى
جثة القرين
(طفولة مريرة)
انا اسمي حسن حسام الصوفي من احدي محافظات الوجه البحري .. وانا بكتب القصة دي عندي 20 سنة.. يعني لسه شباب لكن بقولكم ان عمري انتهي لحد كده وكلها ساعات ويمكن اقل.. واقابل وجه كريم
وانا حقيقي مش جاهز اني اقابله دلوقتي
انا هحكي حكايتي وبطلب منكم تدعولي ان ربنا يسامحني
..
الموضوع بدأ وانا صغير.. انا الطفل الي اتكتب عليه يشوف احلي ايام حياته عذاب وجحيم.. كنت عايش مع أب منزوع من الرحمة.. دايما كان في مشاكل بينه وبين أمي.. مشاكل كانت بتوصل ساعات كتير لمد الايد
ايوة كان بيدربها
كان عندي 7 سنين وقتها.. كل يوم بصحي علي خناقة وأمي بتبكي واروح اطبطب عليها واقولها متزعليش
ده غير ان ابويا كان ماحي شخصيتي جداً
هو الي بيختارلي كل حاجة تقريباً وانا ممنوع اختار.. ولو عملت حاجة من غير ما ارجعلوا كان يسخن معلقة علي النار ويلسعني بيها في جسمي ده الغير الضرب
كانت ايام صعبة
عيشتنا معاه كانت اشبه بافلام الرعب
..
وعدت السنين لحد ما وصل سني 16 سنة.. وحصلت الحاجة الي خلتني اكره الراجل ده.. الراجل الي المفروض ابويا.. هو اقسملي كتير انه مكنش يقصد لكن انا عمري ما هسامحه
..
كان راجع من بره وكان سكران ايوة كان شارب ومش شايف قدامه.. وكالعادة كنت سامع الزعاق والخناق بتاع كل يوم الي اتعودت عليه
لكن فجأة
سمعت صوت صرخة قوية.. خلتني انط من علي السرير واجري بره الاوضه
اتصدمت.. امي واقعة على الارض وغرقانة في دمها
وابويا واقف مش مصدق.. وبصلي وقلي مكنش قصدي مكنش قصدي.. انا زيقتها بس هي الي راسها اتخبطت انا معملتش حاجة.
..
منظر صعب جثة امي قدامي في الارض.. وابويا واقف بيتوسل ليا اني مبلغش الشرطة
انا من الصدمة مكنتش عارف انطق.. واقف وساكت تماما
وبعد شويه ابتديت افوق من حالة الصدمة.. وقربت من جثة امي الي علي الارض.. ودموعي سبقاني مش مصدق ان امي ماتت.. الانسانة الوحيدة الي كانت بتعاملني كويس ومش بتأسي عليا
...
جريت علي التليفون ابلغ.. ابويا مسكني كويس وكتفني وقال
_عاوز تحبس ابوك يا حسن.. هي دي تربيتي ليك
_اوعي سبني انت مش ابويا انت شيطان.. انت قتلت امي انا مش هسيبك غير لما ابلغ عنك.. انت لازم تموت زي مموتها
_ اديك قولت بنفسك قتلتها.. ومعنديش مشكلة اقتلك انت كمان.. اهدي كده عشان نعرف نتكلم
..
خوفت يقتلني زي ما قتلها.. اخد جثتها علي الحمام ونضفلها الجرح الي كان ظاهر.. وقلي احنا هنكفنها وهنقول للناس ماتت وخلاص
..
مكنتش عارف اقول اي.. بني ادم اتجرد من كل حاجة ليها علاقه بالانسانية
وكل حاجة حصلت بسرعة وكان عايش الدور جداً قدام الناس
..
لحظات صعبة عدت عليا.. تشييع جثمان امي.. والقبر وهي بتدخل جواه وبتسبني.. دموعي الي بتنزل وانا مش مدرك لسه انها ماتت
ايام العزا الي كنت واقف فيها تايه ومش حاسس بحاجة خالص
..
عدي اسبوع علي وفاتها طول الاسبوع ده انا مكنتش بتكلم معاه وحابس نفسي في اوضتي.. وبفكر في حاجة واحدة
الشيطان ده قتل أمي يبقي لازم يموت.. لازم يموت
جوايا صراع بين شخصين
شخص بيقولي انت عارف انت بتقول اي.. ده ابوك فاهم يعني اي
..
وشخص بيقولي هو اه لازم يموت بس انت كمان متروحش في داهية بسببه.. لازم تقتله من غير ما تتحبس فيه يوم واحد
...
طيب وده هيحصل ازاي؟ اذا كان عليا عاوز اقتله واقطع جثته علي مليون حتة
..
لحد ما قررت اني هفتح يوتيوب واتفرج علي جرايم القتل الكاملة
بصراحة كانت فيديوهات قليلة ومش فاهم منها حاجة
..
لحد ما لقيت فيديو مكتوب عليه.. القرين يقتل صاحبه
فتحت الفيديو واتفرجت علي ان في واحد كان عاوز يخلص من صحبه عشان خانه
والي حصل ان الشخص ده عمل طقوس وحضر قرين صحبه وبعدين قري تعويذة.. عشان القرين ده يموت وبموت القرين بيموت صحبه
..
دخلت وبحثت عن الكتاب ده وعرفت انه كتاب محرم دوليا.. اكيد انتوا عارفين ده كتاب اي مش محتاج اقول
وعرفت كل الطقوس.. دخلت الحمام وولعت شمعة ووقفت قدام مرايا الحمام والنور مطفي
وقولت اقسمت عليك يا زمزال الاحمر ابن بني برجاش.. احضر الان ونفذ ما آمرك به.. ياشن ياشن.. عصود عصود.. ماقر ماقر
بحق هذه الاسماء احضر الان
بعد ما قريت الكلام ده نور الشمعة اطفي.. وحسيت اني مش لوحدي وان في حد لمس كتفي
طلعت الولاعة وولعت الشمعة تاني.. صرخت عشان الي كان واقف ورايا ده لا يمكن يكون حقيقي.. الي ورايا كان واحد شبه ابويا بالظبط لكن عينيه مبرقة وطويل جداً
كنت بترعش من الخوف
لكن اتكلمت وقولت اقسمت عليك يا زمزال الاحمر انت واعوانك من الشياطين.. قطعوه عذبوه
بحق موت اللعين وانتقام القرين عذبوه حتى الموت
..
لكن الي حصل كان بشع.. شبيه ابويا رفع ايده وكان فيها سكينة.. وعمل اخر حاجة كان ممكن اتوقع انها تحصل
دبح نفسه في منظر صعب جداً
وسمعت صوت صرخات في ودني لدرجة انها نزفت دم
الشمعة طفت.. وخرجت اجري من الحمام.. لكن سمعت ابويا من جوه الاوضة وهو بيصرخ
جريت بسرعة وفتحت باب الأوضة.. وهنا كانت الصدمة
...
يتبع الحلقة الثانية من جثة القرين بعنوان انتقام القرين
..
