رواية جثة القرين الفصل الثاني 2 بقلم محمود الأمين
رواية جثة القرين بقلم محمود الأمين
(انتقام القرين)
فتحت الباب لقيت ابويا ماسك رقبته وبيخنق نفسه او بمعني اصح بيحاول يبعد حاجة عنه انا مش شايفها
واول ما شافني فضل يشاور بايده عشان الحقه
لكن انا كنت واقف بتفرج علي واحد المفروض انه ابويا
لكن انا فرحان جداً وانا شايفوا بيتعذب قدامي كده
لكن في النهاية قدر انه يخلص نفسه من الشئ الخفي الي كان بيحاول يموته
..
فصل يكح كحة جامدة.. وشه كان احمر من كتر ما كان خلاص هيموت
وصرخ فيا وقلي
_ انت مجنون.. انت شايفني هموت قدامك ومش متحرك.. امشي غور روح هاتلي كوباية مية
_ لا مش هجبلك حاجة.. وياريت تموت واخلص منك
_ انت بتدعي علي ابوك يا قليل الادب.. طاب والله لعلمك الادب من اول وجديد
..
وكان جاي ناحيتي وهو ماسك في ايده حزام عشان يضربني بيه
وقرب مني وقال انا هعلمك ازاي تكلم ابوك
ورفع الحزام عشان يضربني لكنه بص ورايا وبرق وقال
اعوذ بالله.. اعوذ بالله.. اعوذ بالله من الشيطان الرجيم
..
في حركة تلقائية بصيت ورايا
ملقتش حد.... ابويا تراجع لورا وهو مبرق وانا خرجت من الاوضة
معرفش ليه انا كنت مبسوط من الي حصل ده
..
رجعت اوضتي لقيت الكتاب مفتوح علي المكتب
قعدت علي المكتب وبصيت في الكتاب كانت عبارة عن رسومات دواير ومثلثات واشكال هندسية
مكنتش فاهم منها حاجة
قلبت الصفحة لقيت رسمة.. اشبه براس جدي جوه نجمة خماسية كبيرة
ولقيت في كلام مكتوب بالعربي لكن كان عبارة عن حروف كتير.. حروف متفرقة
جبت ورقة وقلم وبدأت اجمع الحروف دي مع بعضها
وكانت النتيجة جملة واحدة
لقد ايقظت قرين الشيطان فعليه الانتقام وعليك السمع والطاعة
..
مكنتش فاهم حاجة من الكلام ده.. قفلت الكتاب وخرجت من الاوضه.. وقولت اقعد شوية قدام التليفزيون
لقيت ابويا عمال يقلب في قنوات التليفزيون.. مكنتش فاهم حاجة وهو بيعمل كده ليه
سألته
_ انت بتعمل اي؟
_ عاوز اجيب قناة من قنوات القرآن
_ ههه دلوقتي عرفت ربنا مش كده.. معرفتهوش ليه وانت بتعاملني اسوء معاملة.. معرفتهوش ليه قبل ما تقتل امي.. انا بكرهك وبكره كل يوم عشته معاك
_ للدرجة دي بتكرهني يا حسن.. للدرجة دي شيفني وحش
_ الكره بيولد كره.. وانت عمرك ما حبتني زي ما تكون عدوي
...
في اللحظة دي واحنا بنتكلم كان التليفزيون شغالة على قناة الاشارة فيها ضعيفة شوية
لكنها اشتغلت وكانت قناة المجد للقرآن الكريم
معرفش اي الي حصل
زي ما يكون زلزال وضرب البيت.. الشبابيك بدأت تتفتح وتتقفل بعنف
كنت واقف وشايف الي بيحصل ومش خايف عشان انا عارف ليه بيحصل ده
...
ابويا جري علي التليفزيون عشان يفصله وشال الفيشة وقلي
_ واضح ان البيت ده اتسكن.. باين كده ان جثة والدتك جبتلنا عفريت.. عشان الوضع كده بقي صعب
..
وسبني ودخل اوضته.. مفيش خمس دقايق وسمعته بيصرخ
جريت دخلت على اوضته.. واتصدمت جاني ذهول
عشان المنظر قدامي كان صعب يتصدق بجد
...
ابويا واقف قدام السرير.. وعلي السرير في جثة.. ايوة في جثة
حاجة صعبة انك تكون واقف وشايف جثة قدام عينيك والاصعب انها تكون جثتك انت
..
ايوة بالظبط كده.. الجثة الي كانت علي السرير كانت جثة ابويا.. او بمعني اصح.. جثة القرين
ابويا كان واقف مش مصدق الي شايفوا وبصلي وقال
_ هو ده اي.. ده اي؟
_ بصتله وعلي وشي ابتسامة مستفزة وفضلت ساكت
...
قرب مني وقلي
_ انت عارف حاجة عن الي بيحصل ده .. رد عليا تعرف حاجة عن الي بيحصل ده
_ لا معرفش.. معرفش يا بابا
..
هو كان شاكك اني انا ليا دخل في الموضوع ده..
دخلت اوضتي.. وسمعت باب الحمام بيتفتح.. قولت اكيد دخل الحمام
مفيش خمس دقايق وسمعت صوت صرخة شقت سكون الليل.. كانت صرخة ابويا.. جريت علي الحمام.. وفتحته
ابويا كان علي الارض مدبوح والدم مغرق الحمام والسكينة كانت في ايده
..
مش عارف ازعل ولا افرح.. جريت بلغت الجيران وبلغوا الشرطة والاسعاف
تحقيقات كتير.. طبعاً عملت نفسي زعلان علي موته
ابويا بقا الي مليش غيره مات
عياط ونواح
وكل ده كان تمثيل عشان محدش يلاحظ اني السبب في موته.. الموضوع كان مش مستاهل واتحرر المحضر علي انه انتحار وخرجوا جثة ابويا عشان تدفن.. لكن حصلت حاجة مكنتش علي بالي.. الي حصل
...
انتظروني في الحلقة الثالثه من سلسلة جثة القرين
بعنوان (قبر ابويا)
يتبع
