رواية جثة القرين الفصل الثالث 3 بقلم محمود الأمين
رواية جثة القرين بقلم محمود الأمين
...
هعمل تذكير بالاحداث
الحكاية بتبدأ مع حسن الي عاش طفولة مريرة مع أبوه وامه.. مشاكل وخناقات طول الوقت ووصلت لمد الايد من الاب وكان كمان مخلي حسن منعدم الشخصية قدام نفسه وبيختارله كل حاجة
واتسبب الاب في موت الام بالخطأ عشان ده يكبر الكره في قلب حسن ويقرر ينتقم من ابوه.. يستحضر قرين ابوه عن طريق كتاب سحر ويعمل تعويذة عشان القرين يقتل ابوه.. وبتنتهي الحلقة التانية عند موت الاب والي حصل قبل دفنه
....
#جثة_القرين
#الحلقةالثالثه(قبر أبويا)
الي حصل لما جينا ندفن ابويا.. الكفن كان لونه اسود.. كانت حاجة مش مفهومة للكل.. الكفن اتحول للون اسود قبل ما نتحرك بيه للمقابر
طلبت من الدكتور يكشف الكفن عن وش ابويا
طبعاً رفض في البداية وقلي ان ده مستحيل يحصل
..
لكن بعد ضغط عليه وافق.. وقرر يكشف وش الجثة وطلب من عامل المشرحة يكشف وش الجثة
وهنا كانت الصدمة.. وش ابويا متقطع ومتشوه وكأن حد رمي عليه ميه نار... الراجل عامل المشرحة لما شاف المنظر وقع من طوله.. والدكتور قال.. مكنش كده والله كان سليم اعوذ بالله من الشيطان الرجيم.. اعوذ بالله من الشيطان الرجيم
...
كان منظر صعب جدا.. اتنقلت جثة ابويا بسرعة للنعش وخرجنا بيه.. في طريقنا في المقابر.. مش مطمن ايوة
خايف لا ده انا مرعوب
وصلنا المقابر وسط هتاف الناس لا إله إلا الله.. إن لله وإن إليه راجعون
نزلنا النعش علي الارض وابتدي الشيخ يقري قرآن في مشهد مش هين علي أي حد مننا شافه
مشهد بيجسد نهاية كل واحد فينا وهو شايف اخرته قدامه.. اخرك متر في متر وهتدفن في التراب
..
وانا النهاردة واقف عشان ابويا بيدفن ومن كام يوم كانت أمي.. لكن الفرق ان القاتل المرة دي هو الي هيدفن المقتول
ينطبق عليا مثل يقتل القتيل ويمشي في جنازته
..
الشيخ اتكلم وقال
_ يلا يبني عشان تنزل مع التربي عشان تنزل ابوك لمثواه الاخير
_ انزل.. انزل فين.. لا انا اخاف انزل مكان زي ده انا عمري ما نزلت مكان زي ده
_ تخاف.. عيب عليك الكلام ده يبني انت راجل دلوقتي وده ابوك وانت ابنه الوحيد
_بس انا
_ مبسش يبني انت الي هتنزل مع التربي.. محدش هينزل غيرك
...
قولت في نفسي بعد ما سلمت للامر الواقع.. يعني قرفني وانت عايش وهتقرفني كمان وانا ميت
شيلت الجثة الي كانت تقيلة جداً.. مع التربي ونزلنا الجثة القبر
نزلت بضهري زي ما طلب مني التربي.. حطينا جثة ابويا علي الارض والتربي رخي الكفن من علي وشه.. نط من مكانه وهو بيقول
_ اعوذ بالله.. هو ابوك كان بيعمل اي في دنيته يبني.. منظره صعب كده ليه؟
_ ربنا يسامحه بقا.. هقول اي غير كده
..
لكن وانا واقف شوفته ايوة شوفته.. قرين ابويا من تاني كان واقف في ركن في القبر وعينيه كانت عبارة عن جمرتين من جهنم.. وطالع منه صوت اشبه بمزجرة الكلب.. لاحظ التربي اني باصص للركن وقلي
_ متركزش معاهم يبني.. انت مش قدهم
_ هما مين؟
_ مش مهم.. يلا بينا دلوقتي
..
وخرجنا من القبر.. مش عارف الي جاي اي
انا لو هلوم.. هلوم نفسي انا الي عملت في نفسي كده
انا الي وصلت نفسي للرعب والقلق ده
رجعت البيت.. مفيش عزا طبعاً
مين الي هيعمل عزا انا بس الي فاضل
دخلت اوضتي.. اترميت علي السرير ونمت
وطبعا مينفعش انام ومحلمش.. شوفت نفسي واقف في ارض بور رمل وصخر.. السما لونها احمر بلون الدم
صوت كلاب بتعوي من كل حتة
مشيت وانا مش عارف انا رايح فين
ومن العدم ظهرت ناس اشكالهم غريبة قصيرين وجسمهم مليان شعر.. وبدأوا يلفوا حواليا في حركة دائرية
ويقولوا.. قربان جديد قربان جديد
...
مكنتش فاهم حاجة مين الي قربان جديد
صحيت علي صوت رنة تليفوني.. كان المحامي بتاع بابا
وقلي
_ ازيك يا حسن البقاء لله
_ سبحان من له الدوام.. خير يا استاذ كمال
_ كنت عاوز اقابلك ضروري.. في موضوع مهم
_ موضوع اي؟
_ مش هينفع في التليفون.. انا هجيلك النهارده
_ ماشي تشرف يا استاذ كمال
...
قفلت معاه وقومت عشان ادخل الحمام
دخلت الحمام.. ووقفت قدام المرايا عشان اغسل وشي
رفعت وشي لقيته في وشي في المرايا
وقلي
_ الدور عليك.. انا نفذت العهد وعليك اكماله
_اكمال اي مش فاهم حاجه
_ عليك بالقربان.. عليك برأس بني آدم
_ انت بتقول اي.. انا مستحيل اعمل كده
_ لقد جلست واحضرتنا... فحضرنا وكان لك منا السمع والطاعة
لكنك خونت العهد فليس لك منا سمع ولا طاعة
وسيكون منك انتقامنا كبير
...
المرايا اتكسرت وسمعت صرخة وكأنها زلزال
خرجت اجري من الحمام وانا خايف.. وخايف اكتر من الي جاي
في الوقت ده الباب خبط.. قومت افتح الباب
كان استاذ كمال المحامي سلم عليا وعزاني وقلي شد حيلك
وبعدها اتكلم وقلي
_ عاوزك تركز في كلامي.. انا عندي ليك خبر مش عارف اقولهالك ازاي؟
_ اتكلم حضرتك قلقتني؟
_ انت ملكش في الورث اي حاجة نهائي
_ ازاي يعني ده انا الوريث الوحيد
_ حسن.. حسام مش ابوك
_ انت بتقول اي يا راجل انت؟
_ انا هحكيلك كل حاجة
...
وبدأ يتكلم وهنا كانت الصدمة
...
يتبع الحلقة الرابعة من جثة القرين بعنوان
( الوريث الوحيد)
