رواية حبيبى المدير الفصل الحادى عشر 11 بقلم شيماء صبحى
رواية حبيبى المدير بقلم شيماء صبحى
 |
| رواية حبيبى المدير |
رواية حبيبى المدير الفصل الحادى عشر 11
#الفصل_11
#رواية_حبيبي_المدير
#الكاتبة_شيماء_صبحي
الاستاذ سلامة: ١٣سنه بعيد عننا ومش هاين عليك تيجي تزورنا دا حتي البت احلام اتخطبت ولما سالتها انتي نسيتي ماهر وحبك ليه ضحكت ومردتش عليا ..
ماهر اتصدم اول ما سمع كلامه عن احلام والراجل كمل كلامه وقال:انت تصدق برضوا يا ماهر انها تنساك انت ناسي كانت بتحبك ازاي؟
ماهر كان بيسمع كلامه وقلبه بيدق وكأن بسبب كلامه دا أحيىَ في قلب ماهر مشاعر قديمه كانت مدفونه في قلبه فبصله وقال بتساؤل :هيا احلام اتخطبت!
الاستاذ سلامه هز راسه بالموافقه وقال:ايوا اتخطبت لزميلها ايام الكليه بس سابوا بعض من شهرين تلاته يعني مش فاكر اوي ؟
ماهر هز راسه وقال بهدوء:صحيح يا استاذ سلامه هو البيت بتاعنا مين اللي اشتراه؟
الاستاذ سلامه ابتسم وقال: محدش يابني دا البيت من وقت ما سبتوه وهو زي ماهوا محدش سكن فيه ولا حتي قرب منه!
استغرب ماهر كلامه وقال: غريبه اوي يا استاذ سلامه يعني ايه محدش سكنه هو مش المفروض ابويا باعه لناس وكانو بينقلوا عفشهم قبل سفرنا!
الاستاذ سلامه ضم حاجبه بتذكر وقال :فعلا يابني معلش بق الايام نستني الحكايه دي بس برضوا يابني الناس دي مقعدوش في البيت لان والدك الله يرحمه رجعلهم فلوسهم تاني وكتب البيت تاني بأسمه!
ماهر مكنش مصدق كلامه فضم حاجبه وقال:ابويا رجع البيت تانيه باسمه!!!بس ازاي واحنا سافرنا بعدما بعناه بيومين!!
ضحك الاستاذ سلامه وقال:دي حكايه طويله يابني ميعرفهاش غيري انا والمرحوم والدك والله يرحعهولنا بالسلامه الاستاذ محمد والد احلام!!
قلب ماهر اتحرك اول ما الاستاذ سلامه ذكر اسم احلام تاني فهز راسه باستماع وقال:يعني احنا اتضحك علينا وسافرنا والبيت بتاعنا موجود..
ضحك سلامه علي كلام ماهر وهز راسه وقال:ابوك الله يرحمه كان عارف قسي الغربه يابني وزي مايكون قلبه حاسس انكم هترجعوا تاني لمصر فساب ليكم البيت دا اهو حاجه تلم شملكوا من تاني .
ابتسم ماهر وهوا بيقرب من الاستاذ سلامه وبيضمه لحضنه وبيقول:والله يا استاذ سلامه من غيرك مكنتش هعرف اي حاجه تخص البيت انا متشكر جدا ليك..
سلامه بعد ماهر عنه بغيظ وقال:متشكرا ايه وكلام فاضي ايه انت لازم تيجي البيت انت واحشني اوي دول ١٣ سنه….حط ايديه علي صدر ماهر وكمل كلامه وقال:عندنا الله يكرمهم مرتات عيالي عليهم طبيخ ولا اجدعها طباخ في الإمارات !!
ضحك ماهر وهز راسه بالموافقه وقال:حاضر انا موافق بس اعذرني النهارده اصل عندي شغل كتير وحضرتك عارف ان الشغل مش بيتاجل بس انا وعد مني ليك هاجي وهقعد معاك اليوم كله ..
ضحك سلامه وهز راسه بالموافقه وقال:ماشي يا شقي انا هصدقك المره دي بس انا عندي ليك سؤال يابني ومتأخذنيش فيه..
ماهر هز راسه وقال:اتفضل انا تحت امرك’
ابتسم سلامه وهز راسه وقال وهو بيشاور علي عربية ماهر :هي دي عربيتك!
ضحك ماهر وهز راسه بالموافقه وقال:ايوا تعالي اوريهالك انا عارف انك بتحب العربيات من زمان!
ابتسم سلامه بحماس وكانه مستني يسمع كلام ماهر من بدري فقرب من العربيه وفضل يسمي الله وهو فرحان بشكلها!
ماهر بص لمنعم وقال:هات المفتاح!
منعم استغرب كلام ماهر وضم حاجبه وقال:خير يافندم!
ماهر بصله وخبطه في كتفه وقال:متركزش وهات المفتاح وبقولك ايه خليك هنا لحدما ارجعلك !
منعم مكنش فاهم ايه اللي في بيدور دماغ ماهر فهز راسه بالموافقة وقال:المفتاح في العربيه يا فندم!
هز ماهر راسه وسابه واتحرك للعربيه وقال وهو بيبص للاستاذ سلامه اللي واقف يبص للعربيه بفرحه:اي رئيك تاخدني بالعربيه لفه سريعه كده في المنطقه هنا؟
الاستاذ سلامه قرب منه وهوا مش مستوعب كلامه فقال بتردد:انت متاكد يابني من كلامك دا ..
ابتسم ماهر وهز راسه وقال:انا وعربيتي تحت امرك!
سلامه فرح من كلامه وقال:بس يابني انا عمري ماسوقت عربيه زي دي؟
ماهر هز راسه وقال:بسيطه ممكن انا اسوق المره دي واوعدك المره الجايه هعلمك عليها !
سلامه هز راسه وماهر اتحرك للجه التانيه وفتحله الباب وسلامه ركب وهو فرحان وبعدها ماهر ركب في كرسي القياده واتحرك من قدام منعم اللي واقف يبص عليهم وهو مصدوم ومش مستوعب ان ماهر الصياد بنفسه بيتصرف كل التصرفات دي وغير مبالي بشكله العام!
ماهر كان سايق ببطئ وبيبص لسلامه ومبتسم وسلامه كان مش مصدق نفسه وكانه في حلم ..بص لماهر اللي باصص عليه ومبتسم وطبطب عليه وقال:ربنا يخليهالك ويكفيك شرها يابني!
هز ماهر راسه وقال بابتسامه:اللهم امين!
سلامه وهوا بيبص حواليه شاف بيته فقال :نزلني هنا يابني علشان تروح انه علي شغلك ..
ماهر بص للمكان اللي بيشاورله عليه وقال: هتنزل هنا!
ابتسم سلامه وقال:ايوا يابني دا بيتي احفظه بق علشان لما تيجي المره الجايه ..
هز ماهر راسه ووقف العربيه قدام البيت اللي شاور عليه سلامه واول ما نزل بص لماهر وقال:خلي بالك من نفسك ومتنساش تعدي علي بيت عمك محمد وتسلم علي احلام دي هتفرح اوي لما تشوفك..
ماهر كان قادر يسمع صوت ضربات قلبه كلما اسمها يتذكر قدامه فهز راسه بالموافقه وقال:حاضر يا استاذ سلامه..هعدي عليها!
سلامه ابتسم ودخل للبيت وشاورله وماهر هز راسه واتحرك من قدامه بسرعه ..
كان منعم ساند بجسمه علي الحيطه ومستني ماهر يرجع واول مشافه عدل نفسه وقال:حمدالله علي السلامه يا فندم!
ماهر نزل من العربيه وركب في الكرسي الخلفي ومنعم قرب من العربيه بسرعه وقال:تحب حضرتك ترو…ح.
قاطعه ماهر وقال:الشركة!
هز منعم راسه بالموافقه وشغل العربيه واتحرك لخارج المنطقة وطول الطريق كان بيبص لماهر من المرايه وهو مش مستوعب ايه اللي حصله اول مشافه الراجل العجوز وازاي طلع اجتماعي رغم انه طول الوقت راسم الجديه ومش بيسمح لحد يتكلم معاه غير في الشغل
فحرك راسه وضحك واول ماعينيه جت في عين ماهر في المرايه عدل نفسه علي الكرسي بتوتر وبلع ريقه وبص علي الطريق وهو بيدعي ان ماهرميطردوش !!
__________
في قصر الصياد صحيت سيلين وقربت من غرفة حمزه وفتحت الباب بهدوء …كان حمزه نايم من غير التيشرت ورافع ايديه ورا رقبته وكانت عضلات جسمه واضحه ،،
قربت منه سيلين وهيا بتبص لجسمه بإعجاب شديد وبتقول بهمس:كيف تمتلك هذا الجسم المثير والاخرين يضربونك بسهوله .. حركت كتفها بتسأول وكملت كلامها وقالت:انت غريب الاطوار يا حمزه؟
حمزه نزل ايديه علشان يتقلب للجه التانيه وهيا كانت بتتابعه باستمتاع ..قربت منه وقعدت جمبه علي السرير وحطت ايديها علي جسمه برفق..
حس بيها حمزه وفتح عينيه واول مشافها بتبصله وبتبتسم ..قام بخضه وهو بيحط ايديه الاتنين علي صدره وبيقول بشهقه:سيلين .انتي بتعملي ايه هنا!
سيلين ضحكت وهيا بتقرب منه اكتر وبتقول:انت مثير جدا يا حمزه اريد ان.. ..
وقف حمزه بسرعه وقام من علي السرير قبل ما سيلين تكمل كلامها ..فـ قرب من التيشرت اللي كان رميه علي الارض ولبسه بسرعه وهوا بيبص عليها وبيقول:قولتلك انا لسا صغير علي الحجات وبعدين هو مش المفروض العكس..؟
قامت سيلين وهيا مصممه تقرب من حمزه فمسكته من رقبته وقربته من وشها وقالت:هل ترفض التجربه معي لأول مره!!
حمزه صرخ بصوت عالي وهو بيقول:يا خااالي..
بعدت سيلين عنه وهيا بتقول بخضه:ماذا تفعل انا امزح!
هز حمزه راسه بالرفض وقال:لا انتي كنتي بتتكلمي جد والله لأفضح-ك يا سيلين واقول لخالي علي كل حاجه وهقوله برضوا علي الولد بتاع المطعم ..رفع صباعه وهو بيشرحلها .
سيلين ضحكت وقربت منه تاني وقالت:حسنا حمزه انا اتحدث بجديه ..اخبرني هل تريد التج…!
جري حمزه بسرعه من قدامها وخرج من الاوضه ونزل على السلم وهو بيقول بصراخ:مرسييييي..
خرج مرسي من المطبخ علي صوت حمزه العالي وقال بخضه :خير يا حمزه باشا ايه اللي حصل!
وقف حمزه ورا مرسي ومسك في هدومه بقوه وقال:الحقني من البت اللي فوق دي بلغ بوليس الاداب بسرعه !
مرسي بص حواليه وقال:بنت مين يا باشا!
شاور حمزه علي السلم وقال:سيلين التركيه!
مرسي ضم حاجبه ورجع بص علي السلم تاني وملقاش حد فابتسم وقال :شكلك كنت بتحلم يباشا اصل مفيش حد واقف علي السلم!
حمزه بعد عنه وبص في عينيه وقال بغيظ :انا مقولتش انها علي السلم ..دي في اوضتي ؟
مرسي بصله بدهشه وقال:في اوضتك وبتعمل ايه هنااك يباشا هي مش ليها اوضه!
حمزه بصله وقال برفض:معرفش بق روح طلعها اعمل اي حاجه وبقولك ايه انا عاوز حد يركبلي ترباس في الاوضه!
مرسي هز راسه بالموافقه وقال:بس يا باشا ماهر بيه مانع ان يتحطلك ترباس في الباب انت ناسي حضرتك اخر مره عمل ايه دا كسر الباب خالص..
حمزه افتكر اليوم اللي اطرد فيه من المدرسه في اول سنه ليه في مصر وماهر مقدرش يستوعب وجري وراه وبسبب ان حمزه قفل علي نفسه بالترباس اضطر ماهر يكسر الباب ومن وقتها وهو مانع ان باب حمزه يتقفل بقفل؟
مرسي كان مركز مع وش حمزه ومستني اجابته فحمزه هز راسه وقال:بقولك ايه هيا اوضتك مترتبه!
مرسي استغرب كلامه ولاكنه جاوبه وهز راسه وقال:ايوا يا حمزه باشا بس حضرتك بتسأل ليه؟
حمزه حط ايديه ورا شعره بخجل وقال:اصل انا عاوز انام شويه وهيا عارفه كل الاوض اللي في القصر ومش هتسيبني اكمل نوم زي البشر فانا هنام في اوضتك دلوقت لحدما خالي رجع من الشغل؟
مرسي ضم حاجبه وقال بسخريه من كلام حمزه:بَشر ؟
حمزه كان اتحرك خطوتين ولاكنه وقف علي صوت برطمة مرسي فقال بتساؤل:في مشكله لتكون متضايق اني هنام علي سريرك؟
مرسي عدل وقفته وقال برفض:لا ابدا يا باشا تحت امرك دا المكان مكانك ؟
حمزه هز راسه بغرور وقال:امال ايه بَشر دي مش عجبك اني بنام لحد العصر ولا ايه؟
مرسي بص في الارض وقال بتوتر:حضرتك تعمل اللي انت عايزه انا اسف..
اتحرك حمزه من قدامه ودخل لاوضته واول مشاف انها عاديه والسرير صغير قال بغيظ:منك لله يا خالي علشان جبتلنا المصيبه دي للقصر منا كنت مرتاااح كل يوم باخد علقه والدنيا تمام ولاكن الا شرفي انتوا فاهمين!
قال كلامه بصوت واضح وكأنه بيكلم شخص قدامه..وبعد دقايق من البرطمة خلص حمزه كلام علي سيلين وماهر وفرد جسمه علي السرير ونام !!
___________
في شركة ديسكاشيال..
كانت احلام في غرفة ياسر واللي شرحلها ان الشحنه بقت من نصيب شركته وانهم حاليا شغالين عليها ولاكن لازم يعملوا اجتماع النهارده مع كل مدراء الاقسام في الشركة وقال وهو بيختم كلامه:طبعا انتي هتبلغيهم بنفسك والميعاد بعد ساعه!
هزت احلام راسها بالموافقه واستاذنته تخرج وهوا ابتسم وشاورلها تخرج..
خرجت احلام من مكتب ياسر واتجهت لمكتبها وقعدت علي الكرسي وهيا بتفكر في ماهر وازاي هتروحله الشركه ..بصت في تيلفونها وقررت تتصل علي مروه وتبلغها باللي حصل علشان تقولها علي حل ..
"رواية حبيبي المدير بقلمي شيماء صبحي "
كانت مروه مشغوله مع الدكتور الجديد وكانت بتساعده يدي حقنه لمريض بيخاف من الحقن كانت مروه مسكه الشاب من دراعه وبتقول:يا استاذ اهدي دي مجرد شكه بس..
الشاب بصلها بغيظ وقال:مش عايزها انا مش بحب الحقن اصلا؟
مروه بصت للدكتور وغمزتله بانها هتلهي الشاب في الكلام وهو يديله الحقنه بسرعه وبالفعل مروه بدات تتكلم مع الشاب وهوا كان بيرد عليها بعصبيه لحدما دكتور علي اداليه الحقنه واو ما دخل الابره الشاب صرخ في وش مروه ..وهيا من صدمتها بسبب صوته العالي خافت الناس اللي برا يخافوا فضربته بالقلم والشاب سكت..
الدكتور بصلهم وقال:كده خلاص يا استاذ بالشفاء العاجل ان شاء الله..
الشاب بصلهم وقال بصدمه:انتوا دكاتره انتوا ازاي تخدعنوني كده..
مروه بصت لعلي وغمزتله يبتسمله وقالت:يعني يا استاذ هو احنا بنعمل كده ليه مش علشان حضرتك تخف بسرعه وبعدين الدكتور غلب معاك وبقالنا ساعه بنشرحلك انها مجرد شكه ومش هتحس بحاجه ..
الشاب وقف وهو بيحط ايديه علي مؤخرته بألم وبيقول :مش ههحس قال دانا هورديكوا ..
خرج الشاب من الغرفه بغيظ منهم ومروه مكنتش قادره تكتم ضحكتها اكتر من كده فضحكت وعلي كان مصدوم من اللي حصل فبصلها ولما لقاها بتضحك بهستريه ضحك هو كمان ..
قاطع ضحكهم رنه تيلفون مروه والي اول مشافت اسم المتصل بصت لعلي وقالت:بعد اذنك يا دكتور هرد على المكالمه دي بسرعه ،تحب حضرتك ادخل المريض الي بعده ولا استني شويه..
علي ابتسم وقال:لا عادي دخلي الي عليه الدور؟
مروه هزت راسها وخرجت من مكتبه وبلغت البنت اللي عليها الدور تدخل وقربت هيا من مكتبها وردت علي احلام؟
مروه بابتسامه:طمنيني يا احلام عامله ايه ؟
احلام هزت راسها وقالت:انا بخير الحمد لله انتي عامله ايه!
مروه:الف حمد وشكر يا حبيبتي ،قوليلي المستشفي كانوا بيتصلوا عليكي ليه!
احلام :بابا فاق من الغيبوبه ودخل العمليات علشان كده اتصلوا عليا..
مروه شهقت بصدمه وقال:انتي لسا بتعرفيني دلوقت اخص عليكي يا احلام هو دا برضوا الي بينا!
احلام قالت بهدوء:معلشي يا مروه حقك عليا بس والله انا مكنش فيا عقل اعمل ايه ولا ايه المهم دلوقت انا بتصل عليكي علشان اقولك اعمل ايه في المصيبه اللي انا فيها دي؟
مروه هزت راسها وقالت بدهشه:مصيبه ايه دي كمان قولي يابنتي صباحك عسل انتي واخبارك الحلوه دي ؟
احلام ابتسمت غصب عنها من كلام مروه وقالت:حاضر هقولك بس عاوزه حل اتفقنا..
ابتسمت مروه غصب عنها وقالت:احكي انتي بس الاول وسيبيني افكر بعدها؟
احلام هزت راسها واخدت نفس طويل وبدأت تحكي لمروه صحبتها كل اللي حصل امبارح من اول اتصال المستشفي لحد ما راحت لقصر ماهر واتفقت معاه علي امضي العقد..
مروه قالت بصدمه:يعني انتي قابلتي ماهر ..
احلام :ايوا؟
مروه بضحكه:ماهر يا احلام انا قصدي ماهر الصياد؟
احلام قالت بغضب:ايوا قابلته يامروه انتي لسا هتستوعبي قوليلي هخرج انا من الشركه ازاي واروحله دا مصمم امضي العقد في مكتبه..
مروه هزت راسها وقالت وهيا ضامه عينيها بتفكير:اهم حاجه دلوقتي طمنيني ابوكي عامل ايه وهيعمل العمليه امتي؟
احلام :بابا الحمدلله كويس وهيعمل العمليه بعد بكره؟
مروه اول ماسمعت كلامها وقفت وقالت بصوت عالي:انتي عارفه يا احلام انتي بت بارده والله؟
احلام اتصدمت من سماعها لكلام مروه وقالت :نعم انا بارده؟
مروه بصت حواليها وقالت وهي بتعتذر للناس اللي في العياده : معلشي اصلها عصبتني!
الناس اللي في العياده هزوا راسهم وهيا رجعت قالت:يعني ابوكي فاق من الغيبوبه ودخل للعمليات وهيعمل العمليه بعد بكره دا كل دا كوم وانك قابلتي ماهر الصياد وهو دفع فلوس العمليه كوم تاني وفي الاخر حضرتك قاعده في الشغل عادي كده ولا كان في حاجه حصلت؟؟؟
احلام سمعت كلامها وهزت راسها وقالت بضيق :يعني اعمل ايه دلوقت يا مروه اتنطط ولا من الفرحه امشي علي الحيطه والناس يقولوا اتجننت ..
مروه ضحكت علي كلام احلام غصب عنها فقالت :اهو اعملي اي حاجه عبري فيها عن اي صدمه او فرحه حتي..
احلام اتنهدت وقالت بهدوء: انا قاعده عادي ياست مروه علشان انا مش عارفه اعمل ايه ..انا لسا متعينه هنا امبارح ومكملتش اول يوم شغل واخدته اجازه والنهارده عندي شغل ومضغوطه وقال ايه الاستاذ ماهر عاوزني اروحله شركته واللي هيا اصلا منافسه لشركتي ..انتي عارفه يا مروه لما سألني بشتغل في شركه ايه قولتله ايه؟
مروه اطلقت صوت:امم واحلام كملت كلامها وقالت بابتسامه :قولتله البدر يعني هوا ميعرفش الحقيقه وانا دلوقت مش عارفه هستاذن من المدير القفل دا ازاي ولا عارفه هعمل ايه معاه بعد بكره علشان العمليه .. ختمت احلام كلامها بصوت عالي ونرفزه..
مروه قالت بهدوء :طيب اهدي يا احلام بدل ما القفل يسمعك ويطردك واحنا ماصدقنا اشتغلني؟
احلام رجعت بضهرها لورا وقالت بعد تنهيده طويله:حاضر اديني سكت ممكن بق تقوليلي ايه هو الحل..
مروه هزت راسها وقالت:بصي انتي كملي شغلك عادي وسيبيلي موضوع ماهر انا هجيبلك منه العقد لحد البيت وتمضيه؟
احلام اول ما سمعت كلام مروه وقفت من علي الكرسي وقالت:البيت ليه هو انتي هتعملي ايه؟
مروه حركت دراعها وغيرت نظرتها وبصت للفراغ وقالت: اديني انتي عنوان شركته والنهارده بالليل هتعرفي ؟..بقلمي شيماء صبحي
يتبع تفتكروا بق ايه اللي مروه هتعمله مع ماهر علشان تجيب العقد لشقه احلام ؟🤔🙃🙃
#حبيبي_المدير
#بقلم_الكاتبة_شيماء_صبحي
رواية حبيبى المدير الفصل الثانى عشر 12 من هنا
الرواية كاملة من هنا (رواية حبيبى المدير)
