رواية معنى الحب الحقيقى الفصل الثامن 8 بقلم نشوه عادل
رواية معنى الحب الحقيقى بقلم نشوه عادل
 |
| رواية معنى الحب الحقيقى |
رواية معنى الحب الحقيقى الفصل الثامن 8
ـ عند هانى اللى وصل ع شقته وحاول يفتحها كتير معرفش قعد يخبط ويرزع كتير بعصبية طلع البواب ع صوته وقال: ميصحش كده ي استاذ هانى ده وقت متأخر وفيه اطفال نايمة لمدارسها
هانى: المفتاح مش راضى يفتح وانا عاوز ادخل انام
البواب: هو حضرتك متعرفش ولا ايه
هانى بعدم فهم: معرفش ايه مش فاهم
البواب: ابو حضرتك بعت نجار من العصر غير كالون الشقة
هانى بغضب: نعم ده جنان رسمى وانت ازاى مكلمتنيش وعرفتنى بحاجة زى دى ولا انت واقف هنا زى خيال المآتة وفالح بس كل شهر تقول عايز فلوس الصيانة واجرتى
البواب: ميصحش كده ي استاذ هانى انا راجل كبير مش صغير عشان تكلمنى بالطريقة دى وثانيا لو كلفت خاطرك وبصيت ع تليفونك هتلاقينى رنيت عليك ٦ مرات وانت مردتش ولما تعبت رنيت ع والدك وقالى ان هو فعلا اللى باعتهم
هانى: طب هدومى وحاجتى
البواب: ثوانى
نزل البواب ع اوضته وطلع ومعاه شنطة وقال: والدك ساب الشنطة دى وقالى اسلمها ليك اول ما اشوفك
هانى بغضب: لا ده كتير اوى بجد اوعى من خلقتى
نزل هانى بعد ما نتش الشنطة من البواب وقعد ف عربيته ومسك فونه ورن ع ابوه كذا مرة مردش وف اخر مرة رد وقال: افندم فيه حد يتصل ف وقت متأخر كده
هانى: انا عاوز افهم انت بتعمل معايا كده ليه بجد ازاى تغير كالون شقتى من غير ما تقولى
فوزى: اولا دى شقتى انا وباسمى انا اعمل فيها اللى انا عاوزه مش هستنى رأى معاليك ثانيا انا قولتلك مش هتشوف منى مليم واحد بعد كده واحمد ربنا انى سايب ليك العربية وهدومك واللاب توب وكله من شقايا
هانى: طب انا هعمل ايه ولا اروح فين دلوقتى انا مش معايا اى فلوس نهائى
فوزى: والله دى مش مشكلتى وعيب تبقى راجل وعايز تاخد المصروف من بابا حالة واحدة اللى ممكن اصرف عليك فيها لما يكلمونى من المصحة ويقولوا ليا ابنك هنا بيتعالج وعاوزين المصاريف
هانى: لا ده انت اتجننت رسمى
فوزى بغضب: اخرس ي قليل الادب انا متجننتش انا عقلت ويا تكون زى ما انا عايز ي تغور ف داهية تاخدك بعيد عنى واعتبرنى مت
انهى كلامه وقفل السكة بوشه وبص لمراته: عجبك كده ي ست هانم شوفتى تربيتك ودلعك وصل لايه ابنك بيقل ادبه عليا ومش بعيد لو كان هنا كان مد ايده كمان
مها: انت قسيت عليه اوى ي فوزى واكيد ميقصدش بس من عصبيته
فوزى: انتى كمان بتبررى افعاله انا عارف ان قلة الكلام معاكى احسن انا داخل انام
بالفعل مشى فوزى وهو ع اخره ومها بتعيط بحرقة ورنت ع هانى كذا مرة ومردش عليها ...فضل هانى ف العربية مدة لحد ما مسك فونه ورن ع شادى
هانى: انت فين ي ابنى
شادى: ف البيت يسطا
هانى: لوحدك ولا حد عندك من اهلك
شادى: ما انت عارف انى لوحدى وهما مسافرين فيه حاجة ولا ايه
هانى: عايز اجى ابات عندك النهاردة
شادى: تمام مفيش مشكلة تعال بس فيه حاجة ولا ايه
هانى بتفكير: لا مفيش اصل مخنوق من اللى حصل ومش عايز افضل لوحدى حاسس ان عقلى هينفجر من التفكير
شادى: طب اشطا ي معلم مستنيك متتأخرش
عدى اسبوع وهانى عايش مع شادى ف بيته وامه بتبعت ليه فلوس من ورا ابوه باستمرار من ميراثها عشان جوزها ميعرفش بالمبالغ اللى بتسحبها .... وفى يوم كان يوسف زيارة عند منة ولاحظ سكوتها
يوسف: لسه بتفكرى ف هانى برضه
منة: انا متأكدة انه مش هيسكت ي يوسف حاسة ان ده الهدوء اللى بيسبق العاصفة
يوسف: لا اطمنى ي منة صدقينى عمى قايم معاه بالواجب ومخليه يلف حوالين نفسه
منة: ازاى
حكى ليها يوسف اللى حصل بالظبط وقال: اللى كان مقويه الفلوس لكن دلوقتى هو من غيرها ضعيف
منة: بالعكس يمكن ده يخليه يتجنن اكتر ويعمل اى حاجة بسبب غضبه وخصوصاً انه اكيد عارف انك انت اللى بعت الفيديوهات لابوه
يوسف: لنفترض ان تخمينك صح هيعمل كده ازاى من غير فلوس
منة: انت مفكر ان امه هتسيبه كده زمانها بتبعت ليه من ورا ابوه
يوسف: حتى لو كان كلامك صح عمرها ما هتكون زى المبالغ اللى كان بيسحبها واكيد كلها بتضيع ع المخدرات
نظرت ليه منة بلمعة ف عيونها اول مرة يوسف يلاحظها ولقاها سرحانة فيه قال بابتسامة: مالك سرحانة ف ايه
منة: انت غريب اوى
يوسف: انا ازاى بقى
منة: بتقدر تطمنى وتحتوينى وانا عمرى ما حسيت بكده غير مع بابا وبس
يوسف: امممم يعنى عمرك ما حسيتى بكده مع هانى
منة: عمرى حتى من قبل ما اتخدع فيه مكنتش برتاح ليه وبقلق منه ومن تصرفاته لكن انت بشوف فيك بابا اوى
يوسف: يعنى اطمن ان ف يوم هيكون ليا مكان ف قلبك
ابتسمت منة باحراج وقالت: ممكن سؤال
يوسف بضحك: انتى بتهربى من الاجابة مش كده ما علينا اتفضلى اسألى
منة: هو انت يعنى محبتش قبل كده
يوسف: لا حبيت واوى كمان مرة واحدة بس
منة بزعل وغيرة بتحاول تداريها: بجد كانت مين
يوسف: كانت انتى وبس انتى اول واخر حب
منة باحراج: احم انا ..انا هقوم اعمل شاى بالنعناع اوك
طلعت تجرى من قصاده وهو ضحك وبص للسما وقال: يارب
ف الليل ف شقة شادى اللى كان قاعد مع هانى بيشربوا كل ما حرم الله قال: محضرلك حتة مفاجأة انما ايه من الاخر
هانى: ايه ي معلم
ضرب الجرس ابتسم شادى وقال: المفاجأة وصلت
راح شادى وفتح الباب ودخلت بنتين شكلهم مش تمام وضحكوا ضحكة عالية وقالت واحدة: هنوشتى ي بيبى وحشتنى وووووو...يتبع
#معنى_الحب_الحقيقى الثامن
#بقلم_نشوه_عادل
رواية معنى الحب الحقيقى الفصل التاسع 9 من هنا
الرواية كاملة من هنا (رواية معنى الحب الحقيقى)
