رواية مكتوبة على اسمى الجزء الثانى 2 الفصل الأول 1 بقلم ملك إبراهيم
رواية مكتوبة على اسمى الجزء الثانى 2 بقلم ملك إبراهيم
 |
| رواية مكتوبة على اسمى الجزء الثانى 2 |
رواية مكتوبة على اسمى الجزء الثانى 2 الفصل الأول 1
#الحلقة_الأولى
#الجزء_الثاني
#مكتوبة_على_إسمي
#بقلمي_ملك_إبراهيم
الاجازة كانت طويله اوي يا حبيبي بقى هي دي الاجازة اللي قولتلي اننا هنفصل بيها عن كل المشاكل اللي كانت عندنا.
آيات كانت بتتكلم بسخريه وحزن وهي بتجهز شنطتها بعد انتهاء اجازتهم اللي اخدوها هي وعامر بعد انتهاء كل المشاكل والاوجاع اللي عاشوها وقرروا انهم يسافروا يقضوا اجازة مع بعض وعامر يعوض فيها آيات عن كل التعب والحزن إللي عاشته وكانت دي اول مرة آيات تسافر وتخرج برا مصر وعاشت في الاجازة دي أجمل ايام حياتها وكأنها كانت في حلم جميل بس للأسف الحلم انتهى وعامر قرر انهم يرجعوا عشان يحضروا خطوبة شريف وهاجر.
عامر قرب منها وضمها بحنان: احنا بقالنا شهر هنا يا حبيبتي وانتي عارفه ان خطوبة شريف وهاجر بكره واحنا لازم نكون موجودين معاهم في يوم مميز زي ده وكمان الجامعة بتاعك والدراسة هتبدأ من الاسبوع الجاي ولازم تجهزي.
آيات قفلت الشنطة وقالت بحزن: يعني تقصد تقول ان الحلم الجميل اللي عشنا فيه طول الشهر ده انتهى ولازم نرجع للمشاكل اللي كنا عايشين فيها تاني ؟
رد عامر وهو بيضمها: ان شاء الله مفيش مشاكل تاني يا حبيبتي.. خلاص كل المشاكل انتهت وكل اللي جاي هيكون سعادتنا انا وانتي وابننا.
آيات ابتسمت بسعادة وقالت: نفسي نرجع المكان ده تاني يا عامر.. انا عشت هنا أجمل ايام حياتي.
رد عامر بثقة: ان شاء الله ياحبيبتي هنرجع هنا تاني في اجازة اطول ويكون معانا ابننا.
آيات هزت راسها بالايجاب وحطت أيديها علي بطنها البرزه قليلا جدا لأنها كانت لسه في نهاية الشهر التالت من حملها وقالت: خلاص اتفقنا وانت وعدتني انا وابننا.
.....
في مكان اخر.
داخل مبني السجن.
دخل شاب بيظهر عليه الهيبة والغموض مكتب مأمور السجن واتكلم بثبات: انا معايا تصريح أقابل عزيز المحمدي.
مأمور السجن: اهلا بحضرتك وفي توصيه كبيرة مع التصريح.. أتفضل والمسجون هيكون هنا حالا.
بعد دقايق قليله دخل عسكري ومعاه عزيز اللي اول لما شاف الشاب جري عليه وقال:
امير ابني حبيبي شوفت اللي حصل فيا.. شوفت عامر الجارحى عمل فيا ايه واختك الغبيه كانت بتساعده!
رد امير بثبات: متقلقش يا بابا انا رجعت من السفر مخصوص عشانك ووكلتلك اكبر محامي وميرنا انا هتصرف معاها.
عزيز برجاء: أكيد انت مش هتسيبني محبوس هنا يا امير صح؟
امير بص قدامه وقال بثقة: اطمن يا بابا.. انا هعمل المستحيل عشان اخرجك من هنا وبالنسبه ل عامر الجارحى.. انا راجع مخصوص عشانه ولازم ادفعه تمن اللي هو عمله معاك غالي اوي.
رواية مكتوبة على إسمي بقلمي ملك إبراهيم.
صباح اليوم التالي..
في بيت هاجر.
البيت كان بيتجهز لحفلة خطوبة هاجر وشريف.
جرس الباب رن وجريت هاجر تفتح الباب وكانت بيسان.. رحبت بها هاجر بسعادة.
هاجر: شكرا يا بيسان انك جيتي تساعديني.. آيات كلمتني وقالت ان الطيارة وصلت متأخر ومش هتقدر تيجي بدري وانها هتيجي مع عامر بالليل.
بيسان برقه: انا هكون معاكي اطمني وان شاء الله كله هيبقى تمام.
امجد قرب منهم وهو بيبص ل بيسان بحب وقال: ايه يا هاجر انتوا هتفضلوا تتكلموا علي الباب كده!! اهلا يا بيسان اتفضلي.
بيسان دخلت بخجل ومامت هاجر كانت قاعدة واول لما شافت بيسان داخله مع بنتها وامجد جنبها ملامحها اتغيرت للغضب وهي بتبص ل بيسان وهاجر اتكلمت مع مامتها بحماس: ماما اقدملك بيسان....
مامتها قاطعتها بجمود وقالت: اهلا.
وقامت وقفت ودخلت المطبخ وبيسان خفضت وشها باحراج وهاجر بصت ل أخوها بستغراب لان رد فعل مامتها كان غريب بالنسبه لها وامجد اتكلم مع بيسان بلطف: اطلعي مع هاجر اوضتها فوق عشان تجهزوا برحتكم.
بيسان هزت راسها بالايجاب وطلعت مع هاجر وامجد دخل المطبخ عند مامته وكان في خدم بيجهزوا اكل الحفلة وامجد اتكلم مع والدته بعصبيه: ممكن افهم ليه حضرتك حرجتيها كده؟
مامته بصت للخدم وبصت ل امجد وقالت بجمود: انت شايف ان ده الوقت او المكان المناسب اللي نتكلم فيه!
امجد بص حواليه وشاف الخدم مركزين مع كلامهم وخرج وساب والدته جوه ووالدته اتعصبت علي الخدم وطلبت منهم يخلصوا الاكل بسرعة.
---------
في المساء داخل مكان مخصص للسهر.
علاء ومختار كانوا قاعدين جنب بعض.
علاء شرب من الكاس اللي قدامه وقال: انا لازم انتقم من عامر الجارحي .. مش هسيبه يعيش حياته براحة وسعادة وهو مدمر حياتي.. بقى انا على اخر الزمن يتقالي يا جوز لولا!!
مختار وهو بيشرب كاس جمبه: عامر بعد ما شارك امجد وعملوا الشركة الجديدة دي وبقى هو رقم واحد بدون منافس ومفيش أي حد قادر عليه.. احنا لازم نوقع عامر الجارحى ونخلص منه بأي طريقة.
علاء: مش هسيبه يتهنى ب مراته يا مختار.. لازم اخليها نسخه من لولا.
مختار بص ل علاء بصدمة وقال: انت شكلك تقلت في الشرب ولا ايه!! انت محرمتش بعد اللي عمله فيك اول مرة.. المرادي مش بعيد يقتـ"لك فيها.. اعقل يا علاء وخلينا نفكر في حل معاه والاهم اننا منبنش في الصورة.
علاء بغضب: انا عايز اخليه يدوق اللي انا دوقته يا مختار.. عارف يعني ايه تبقى واحدة زي لولا مكتوبة على اسمك.
مختار بفزع: مش عايز أعرف.. انت لبست لولا وخلصنا.. خلينا دلوقتي في شغلنا.. عامر الجارحى لازم ينتهي وميبقاش له قومه تاني عشان كل واحد فينا يوصل للي هو عايزه.
علاء: وهنعملها ازاي دي وانت خايف اننا نقرب من مراته.
مختار بغضب: هو انت مش بتفكر في الانتقام غير من مراته!! ما تسيبك من مراته دلوقتي وخلينا في عامر نفسه.
علاء: انت غبي يا مختار.. مرات عامر هي نقطة ضعفه وملوش داخله غيرها.
مختار بص ل علاء بتفكير وقال: تصدق في دي عندك حق.
علاء بثقة: اسمع انت كلامي بقى وهتشوف النتيجة بعينك.
مختار بقلق: ربنا يستر.
........
في بيت هاجر.
بدأت حفلة الخطوبة وشريف ووالدته وميسرة وعامر وآيات وصلوا بيت هاجر والحفلة كانت عائلية وامجد ووالدته كانوا في استقبالهم وبيسان وهاجر كانوا فوق بيجهزوا.
آيات طلعت فوق عند هاجر عشان تكون معاها وتساعدها لو محتاجة حاجة وعامر وشريف وامجد وقفوا يتكلموا مع بعض.
شريف كان متوتر جدا وامجد قرب منه وقاله بنبرة مرحة: ايه يا بني انت متوتر كده ليه دي لسه خطوبة مش دخلة.. أجمد كده يا عريس.
عامر ضحك وشريف قال بتوتر: مش عارف حاسس ان فكرة اني عريس والجو ده موترني..
وبص ل عامر وسأله: قولي يا عامر انت يوم فرحك كنت متوتر كده برضه.. طمني ؟
رد عليه عامر بسخرية؛ اه طبعا كنت متوتر جدا لدرجة اني نسيت ان انا اتجوزت اساسا.. هو انت يابني فقدت الذاكرة يعني ولا ايه! ما انت عارف انا اتجوزت ازاي!
ضحك امجد وقال: بصراحة يا عامر جوازك ده اغرب جوازة في التاريخ!! انا مكنتش قادر اصدق لما هاجر حكتلي انت وآيات اتجوزتوا ازاي.
شريف ضحك وقال: اه والله يا أمجد عندك حق.. راح أتجوز عروسة جده ونساها خمس سنين.. شوفت الجبروت بتاعه.
شريف وامجد ضحكوا بصوت عالي واتكلم عامر بغيظ: طب اقفل بقى على الموضوع ده عشان لو آيات سمعتك مش هتسكت والليلة هتقلب نكد.. انا لما صدقت انسيها الموضوع ده.
امجد: تنسيها ايه بس يا جبروتك يا أخي.. بقى في واحد في الدنيا ينسى انه اتجوز ويسيب مراته خمس سنين ميعرفش عنها حاجة!!
عامر لمح آيات نازل علي السلم مع هاجر وبيسان وقال: طب اسكت بقى عشان آيات نازله دا لو انتوا عايزين الفرح ده يكمل علي خير.
اتكلم شريف بتريقه: عيني علي الرجاله.. بقى الباشمهندس عامر الجارحي خايف من مراته.
عامر بص له بطرف عينيه وقال: مابلاش انت وخلينا ناكل عيش واحنا ساكتين احسن.
امجد ضحك وقالهم: والله صعبانين عليا انتوا آلاتنين.. كنتوا شباب زي الورد.
رد عامر: وانت مش ناوي تصعب علينا انت كمان..
وشاور على بيسان بعينيه.
امجد فهم وابتسم وقال: احتمال اصعب عليكم قريب ادعولي.
واتحرك بسرعة وهو بيقرب من اخته عشان يسلمها ل شريف.
هاجر كانت مكسوفه جدا وآيات وبيسان واقفين جنبها وامجد مسك ايد هاجر وشريف قرب منهم وعامر معاه وامجد اتكلم مع شريف وهو بيوصيه على هاجر وكانوا كلهم فرحانين وعامر عيونه كانت على آيات اللي اتأثرت بالمشهد وامجد ماسك ايد أخته وبيسلمها ل عريسها وبدأت دموعها تنزل من الفرحة وعامر قرب منها ورفع أيديه يجفف دموعها واتكلم معاها بهمس: ايه الروچ اللي على شفايفك ده؟
آيات بصتله بصدمة وحطت أيديها علي شفايفها وقالت بعفويه: انت عرفت ازاي اني حاطه روچ؟ دا روچ خفيف بيسان كانت بتجربه علي بشرتي.
عامر بصلها اوي وهو بيحاول يكتم غيرته وغضبه واتكلم بهدوء معاها عشان محدش يلاحظ حاجة: ولما جربته طلع حلو علي بشرتك؟
آيات بتوتر: ااه.
عامر: طب كويس.. نمسحه دلوقتي ولما نرجع البيت تحطي منه برحتك ايه رأيك؟
آيات بعناد: على فكرة الروچ مش باين يا عامر هو اصلا خفيف وبعدين احنا في فرح وكل البنات بيحطو روچ عادي يعني.
عامر بغضب مكتوم: ولما اقولك ان اللون ده خلى شفايفك ملفته للنظر واي حد هيقف يتكلم معاكي مش هيبقى مركز غير مع شفايفك.. هتصممي عليه برضه!
آيات ضغطت على شفايفها وقالت بتوتر: هو باين للدرجادي.
عامر اتنهد وقال: للأسف.
بصتله بخجل وقالت: طب انا هروح الحمام امسحه.
عامر: ياريت.
آيات اتحركت من قدامه وعامر كان بيحاول بكل قوته يحافظ على هدوئه ويخفي غيرته الشديدة عليها.
........
في الحمام.
آيات وقفت قدام المرايا وبصت على الروچ ولقت ان عامر عنده حق وبدأت تمسح الروچ وفجأة سمعت اصوات قدام باب الحمام.
الأصوات كانت منخفضه لكنها واضحة جدا لأنهم كانوا واقفين قدام باب الحمام..
سمعت صوت والدة امجد وهي بتتكلم بعصبيه وبتقول: انتي ايه اللي رجعك تاني.. فاكرة ان السنين دي هتخليني اغير رأيي فيكي.
اتكلمت بيسان بحزن: هو ليه حضرتك بتكرهيني كده!
والدة امجد بغضب: انا مش بكرهك.. بس انا مش عايزاكي في حياة ابني وده حقي اني اختار الزوجة المناسبة له واظن ان انا قولتلك الكلام ده من سنين فاتت.. لما كنتي فاكرة انك تقدري تخدعي امجد وتخليه يتجوزك.
بيسان بحزن: انا عمري ما خدعت امجد.. انا بحبه.
والدة امجد بجمود: لو بتحبيه بجد مكنتيش رجعتي تاني!! انا لما صدقت ان امجد بدأ ينساكِ.. الاقيكي رجعتي تاني وعايزة تبدئي الحكاية من الأول وانتي عارفة كويس ان امجد لو اتجوزك مستقبله هيضيع.. لو انتي فاكرة ان الناس ممكن ينسوا ماضي عيلتك تبقي بتحلمي.
بيسان بكت بحزن وقالت: من فضلك بلاش نتكلم في الموضوع ده!
والدة امجد: لا لازم نتكلم عشان تفتكري مامتك اللي ماتت مقتولة هي وعشيقها على ايد ابوكي اللي مات في السجن!.. أكيد انا مش هسمح ان تكون دي العيلة اللي ابني يناسبهم واسمهم يرتبط بأسم عيلتنا!
بيسان كانت بتبكي ومنهارة وآيات جوه الحمام سامعه كل الكلام اللي بينهم وصعبت عليها بيسان وهي سامعة صوت عياطها وهي واقفة قدام مامت امجد.
اتكلمت مامت امجد بقوة: ده اخر تحذير ليكي يا بيسان.. ابعدي عن ابني وارجعي مكان ما كنتي.. انتي عمرك ما هتكوني ل امجد غير في حالتين اتنين.. يا اما انا اموت.. او امجد يختارك وينسى ان له ام.
بيسان بصتلها بصدمة ووالدة امجد اتكلمت مرة تانيه قبل ما تمشي: ادخلي الحمام اغسلي وشك وامشي من هنا يا بيسان ومش عايزة أشوفك في بيتي ولا في حياة ابني تاني.. مفهوم.
مامت امجد انتهت من كلامها معاها ورجعت لحفلة الخطوبة تاني وآيات كانت واقفه في الحمام متجمدة مكانها بعد ما سمعت كلامهم وسمعت جبروت مامت هاجر اللي اتصدمت فيها!
بيسان دخلت الحمام واتصدمت لما شافت آيات قدامها وبكت اكتر لانها عرفت ان آيات سمعتهم وعرفت سرها.
آيات قربت منها وقالتلها بحزن: بيسان.. ممكن تهدي.. متزعليش.
بيسان ببكاء: انا خلاص اتفضحت.. هفضل عايشه بالعار ده طول عمري.
آيات: انتي ملكيش ذنب يا بيسان.. اهدي من فضلك.
وضمتها آيات بحنان وهي بتحاول تهديها وبيسان بتبكي ومنهارة وقالت برجاء: أرجوكي يا آيات بلاش حد يعرف الكلام اللي سمعتيه ده.. ارجوكي.
آيات: طبعا يا بيسان محدش هيعرف اطمني.
بيسان بعدت عن آيات وجففت دموعها ب أيديها وقالت: انا لازم أسافر تاني.. مش هينفع اعيش هنا.. كنت فاكرة ان السنين قدرت تنسيها ماضي عيلتي.
اتكلمت آيات بحزن: عرفي امجد يا بيسان.. هو اكيد هيقدر ان ده ماضي انتي ملكيش ذنب فيه.. امجد آكيد مش بيفكر زي مامته.
بيسان ببكاء: امجد لو اختارني هيخسر مامته ومش بعيد يخسر كل عيلته عشاني.. أحسن حل اني اسافر تاني.
وجففت دموعها وقالت: أشوف وشك بخير يا آيات وشكرا على وقفتك معايا وبتمنى متفضحيش سري ده قدام حد حتي لو عامر.. انا مش عايزة نظرتهم ليا تتغير.
آيات بكت عشانها وقالت: اطمني يا بيسان محدش هيعرف حاجة.
بيسان ضمتها وخرجت بسرعه عشان تمشي وآيات وقفت تبكي عشانها وصعبان عليها الظلم اللي اتعرضت له.
رواية مكتوبة على إسمي بقلمي ملك إبراهيم.
عند عامر.
كان واقف بيتكلم مع امجد وبيبص حواليه مش لاقي آيات وقلق عليها لانها اتأخرت في الحمام واستأذن من امجد وراح يدور عليها.
آيات وقفت في الحمام تغسل وشها بعد البكاء الكتير اللي بقى واضح علي ملامحها.
عامر وقف قدام الحمام وخبط على الباب بقلق: اايات.. انتي لسه هنا؟
ردت آيات بصوت مبحوح: اه هنا.
عامر: انتي كويسه؟ اتأخرتي كده ليه؟؟
آيات فتحت باب الحمام وخرجت وعامر بصلها بصدمة لما شاف عيونها حمرا وكان واضح انها بتبكي وسألها بقلق: آيات انتي كنتي بتعيطي؟؟
ضمت نفسها جوه حضنه وهي بتبكي وعامر حاوطها ب أيديه وضمها ليه آكتر وهو قلقان عليها وسألها بقلق: حبيبتي ايه اللي حصل؟
آيات مقدرتش تقوله اللي حصل مع بيسان لانها وعدتها متقولش لحد الكلام اللي سمعته وفكرت بسرعة تقوله إيه سبب بكائها وقالت وهي بتبكي: الروچ مكنش راضي يتمسح.
عامر بصدمة: نعم!!!!.. بقلمي ملك إبراهيم.
... يتبع
حبايبي وحشتوووني😍😍 الجزء التاني هيكون فيه مفاجأت كتير هتظهر الحلقات الجايه ومواعيد النشر هتكون يومياً ان شاء الله عشان نقدر نخلص الرواية قبل شهر رمضان المبارك بأمر الله تعالى ♥️♥️
رواية مكتوبة على اسمى الجزء الثانى 2 الفصل الثانى 2 من هنا
الرواية كاملة من هنا (رواية مكتوبة على اسمى الجزء الثانى 2)
