رواية مكتوبة على اسمى الجزء الثانى 2 الفصل الرابع 4 بقلم ملك إبراهيم
رواية مكتوبة على اسمى الجزء الثانى 2 بقلم ملك إبراهيم
 |
| رواية مكتوبة على اسمى الجزء الثانى 2 |
رواية مكتوبة على اسمى الجزء الثانى 2 الفصل الرابع 4
#الحلقة_الرابعة
#مكتوبة_على_إسمي
#الجزء_الثاني
#بقلمي_ملك_إبراهيم
البنت هزت راسها بأبتسامة وآيات رجعت عند زمايلها عشان تحضر المحاضرة وبعد خروج آيات من الحمام البنت ابتسمت بمكر واتكلمت في التليفون مع شخص وقالت: خلاص قابلتها وشكلها سهلة مش هتتعبنا.
..............
في الشقة اللي فيها البنات.
كانت ميرنا قاعدة في الشقة لوحدها والبنات نزلوا الجامعة وكانت قاعده زهقانه ومضايقه وحاسه انها مش مرتاحة ابدا في العيشه وسطهم لإنهم مش شبهها ابدا وحياتهم عبارة عن دراسه ومذاكرة وبس وهي عايزة تعيش الحياة اللي بتحبها وكلها خروجات وحفلات وسهر مع اصحابها وفلوس كتير تصرفها برحتها.. قاطع شرودها وافكارها صوت جرس الباب.. قامت فتحت الباب وهي معتقده ان واحدة من البنات رجعت من الجامعة بدري وهمست بضيق: علي آخر الزمن بقيتي بوابه يا ميرو.. ااه لو كوكو واصحابي شافوني وانا قايمه افتح الباب بنفسي!!!
شهقت بصدمة اول لما فتحت الباب وشافت اخوها امير واقف قدامها وفكرت ان عامر هو اللي كلمه عشان يرجع وياخدها.
ميرنا بسعادة: امير انت رجعت..
وقربت منه عشان تضمه لكن ايد أمير بعدتها عنه وهو بيبصلها بغضب.
ميرنا استغربت رد فعله الغريب والبارد وامير اتجاهل نظراتها له ودخل الشقة وهو بيبص حواليه بشمئزاز وقال ببرود: هي دي العيشة اللي بعتي ابوكي عشانها!!
ميرنا اتوترت من كلامه وقالت بارتباك: أمير انا مبعتش بابا.. انااا..
قاطعها أميرة بصفعة قوية على خدها وميرنا وقعت علي الارض من قوة الصفعة وهو بيصرخ فيها: انتي اييه!! بتساعدي عدو ابوكي عشان يدخله السجن وانتي تاخدي المقابل رحلة سفر وترجعي تعيشي في الشقة الحقيرة دي.!
ميرنا ببكاء وصدمة وهي واقعه علي الارض: أمير انت فاهم غلط!!.. بابا هو اللي كان عايز يأذي عامر وعامر هو اللي كان دايما بيساعدني وو....
قاطعها أمير بصراخ: وايه كمااان.. عرف يضحك عليكي وانتى مشيتي وراه وانتي مغمضه وسلمتيه ابوكي.. نسيتي ان عامر الجارحى ابن الست إللي اتسببت في موت امنا.
ميرنا بصت ل اخوها بصدمة وقالت: مين السبب في موت ماما..! ؟ طنط ميسرة؟معقول ؟
أمير بغضب: ايوا هي السبب في موت امنا.. امك ماتت وهي عارفه ان ابوكي عينه على ميسرة وفلوسها وكان بيفكر فيها ليل ونهار.. ماتت وهي بتتحسر على جوزها اللي بيفكر في واحدة غيرها.. عشان كده انا مقدرتش اعيش هنا بعد موتها واكون شاهد على قصة الحب الكبيرة اللي بين ابوكي وميسرة.. ميسرة اللي كانت جمب ابنها لحد ما بقى اسمه من اكبر رجال الاعمال في البلد وانا بعدت عن اهلي ومستقبلي ضاع بسببها هي وابنها!
ميرنا بذهول: الكلام إللي انت بتقوله ده مش صح يا أمير.. بابا وطنط ميسرة...
قاطعها أمير بغضب: مش عايز اسمع منك ولا كلمة.. انا رجعت عشان اخرج ابويا من السجن وانتقم من عامر الجارحي وميسرة.
ميرنا بصتله بصدمة وامير قرب منها وقال بقوة: وانتي هتساعديني.. وبنفس الطريقة اللي ساعدتي عامر بيها وهدفعلك المقابل زي ما هو دفعلك.. بس اللي انا هدفعه اكتر بكتير.. انا دلوقتي معايا فلوس تشتري اي حد.
ميرنا بصتله بذهول وامير قرب منها وقال بتهديد: المفروض ان انا كنت اقتـ.لك بعد خيانتك ل ابوكي.. بس انا هديكي فرصه تانيه ودلوقتي تختاري.. يا تبقي معايا وتطلعي كسبانه.. يا تبقي مع عامر الجارحي وتفضلي عايشه في الفقر هنا.
ميرنا بتوتر وخوف: انا أكيد معاك يا أمير.. انت اخويا الوحيد.
أمير كمل كلامه بسخريه: ومعايا الفلوس إللي هتخليكي اقوي من الكل.
ميرنا عيونها لمعت لما سمعت كلمة الفلوس وابتسمت وقالت: أكيد انا معاك.
أمير هز راسه بالايجاب وقالها: هاتي شنطتك وانزلي ورايا انا هستناكي تحت.. وخلي بالك يا ميرنا.. اي خيانة انا هنسى انك اختي.
هزت راسها بالايجاب بخوف وامير نزل وميرنا فكرت انها لازم تكون مع اخوها لان هو اللي هيقدر يساعدها تبعد عن الفقر.
امير نزل من الشقة وركب عربيته واتكلم في التليفون.
أمير: ايه الاخبار.. خطتنا ماشيه تمام؟
رد الطرف الاخر: كله تمام يا باشا متقلقش.
أمير: انا عايز الضربات بتاعنا تكون كلها في نفس الوقت.. عامر الجارحى لازم ينتهي في لحظة واحدة وميبقاش قادر يستوعب كل الضربات دي بتيجي منين وازاي وامتي لحد ما ينتهي.
رد الطرف الاخر: اطمن يا باشا كل اللي قولت عليه هيتنفذ وعامر الجارحي مش هيقدر يقف على رجليه تاني بعد اللي هيحصله.
رواية مكتوبة على إسمي بقلمي ملك إبراهيم.
في المساء في الشقة عند عامر وآيات.
آيات كانت قاعدة بتذكر وعامر بيشتغل علي اللاب وآيات فجأة افتكرت البنت زميلتها اللي قابلتها في حمام الجامعة وشردت في التفكير فيها.
عامر رفع عينيه وهو بيبص عليها وشافها شارده وبتفكر بتركيز..
قفل اللاب بتاعه وقرب منها وضمها بحب وسألها: حبيبتي بتفكري في ايه؟
ردت آيات بأبتسامة: اصل انا النهاردة قابلت بنت في الجامعة...
سكتت ومكملتش كلامها وعامر سألها بفضول: مالها البنت اللي قابلتيها في الجامعة؟
ردت آيات: اصلها كانت حامل وتعبانه اوي وانا اديتها قرص مسكن من اللي الدكتور بتاعي كتبهولي.. بس خايفه يكون مش مناسب لها! قلقانه عليها.
عامر ابتسم وقالها: متقلقيش يا حبيبتي اكيد الدوا دا امان لكل الحوامل..
وابتسم اكتر وقالها وهو بيحط ايديه علي بطنها: تعرفي انا بقيت مستني اليوم اللي ابننا هيجي فيه الدنيا وينور حياتنا.. مش قادر اتخيل اني هكون اب لطفل حته مني ومنك.
آيات ابتسمت وقالت بسعادة: وانا كمان بتمنى يجي اليوم اللي المسه ب ايدي واخده في حضني.. ونفسي يطلع شبهك في كل حاجة يا عامر.
عامر ضمها وهو بيبتسم وآيات غمضت عينيها جوه حضنه براحة: انا بحبك اوي يا عامر.. اوعى تسيبني او تبعد عني في يوم من الايام.
وبصتله بحب وعيونها لمعت بالدموع وقالت: انا من غيرك اموت.
عامر ابتسم لها بحب وقبل جبينها وقال بحنان: بعد الشر عنك يا حبيبتي انا اللي مقدرش ابعد عنك يا آيات.. اوعدك اني عمري ما ابعد عنك ابدا.
آيات ابتسمت بسعادة وغمضت عينيها جوه حضنه وهي حاسه بالأمان وعامر كان بيضمها لقلبه اكتر وهو بيطمن قلبه بوجودها.
.........
في شقة علاء ولولا.
لولا كانت في المطبخ بتعمل قهوة ل علاء وهي بتتنهد بغيظ لانها بتحاول مع علاء بقالها كام يوم عشان يكونوا زي اي زوجين عادين لكن علاء محافظ على الحدود بينهم وكمان بقاله كام يوم متغير وشكله مشغول بحاجة مهمه وكانت قلقانه وخايفه يكون مشغول بواحدة تانيه !!
قربت من غرفة المكتب عشان تدخله القهوة وفجأة سمعته بيتكلم في التليفون ووقفت تسمع المكالمة بفضول عشان تعرف اذا كان في واحدة تانيه في حياته فعلا ولا لا!!
علاء: اطمن كله تمام.. البنت دي تبعي متقلقش منها.. هتعرف تنفذ كل اللي اتفقنا عليه.. بس زي ما اتفقنا.. انا عايز نسخه من الفيديو بتاعها وهما بيغتصبوها.. لازم افضح عامر الجارحى ويعيش بالعار العمر كله زي ما عمل معايا واكتر.
لولا شهقت بصدمة اول لما سمعت اسم عامر الجارحى وفنجان القهوة وقع منها علي الارض واتكسر.
علاء انتفض من مكانه بسرعه وهو في غرفة مكتبه وقفل التليفون وطلع عشان يشوف إيه اللي حصل وشاف لولا قاعدة على الأرض بتنضف القهوة اللي وقعت وسألها بغضب: انتي بتعملي ايه هنا؟
ردت لولا بتوتر: كنت جيبالك قهوة ووقعت علي الارض وانا ماشيه.
علاء بغضب: انا مطلبتش منك تعمليلي قهوة وقولتلك مليون مرة انا مستحيل أكل او أشرب حاجة من ايديكي.
لولا بصتله بعمق وعلاء قفل باب غرفة مكتبه بالمفتاح وخرج من البيت ولولا قعدت تفكر في مكالمة التليفون اللي سمعتها وكانت عايزة تتأكد هو يقصد ايه بالظبط من كلامه عن عامر الجارحى وهمست لنفسها: ياتري انت بترتب ل ايه تاني يا علاء.. عامر الجارحي مستحيل يسامحك المرادي ومش بعيد يقتـ.لك! ومين البنت دي كمان اللي تبعك!! ربنا يستر من افكارك يا علاء وملاقيش عامر الجارحي مجوزك واحدة كمان!!
رواية مكتوبة على إسمي بقلمي ملك إبراهيم.
في بيت ميرفت.
ميسرة لبست ونزلت وهي حاطه مكياچ كامل وقالت ل ميرفت انها رايحة تعمل شعرها.
ميرفت بصتلها من فوق ل تحت بدهشة وسآلتها بفضول: شعرك ايه إللي رايحه تعمليه.. انتي ايه حكايتك بالظبط يا ميسرة؟ بقالك كام يوم كده مش عجباني وخروجاتك كتير.!
ميسرة: ايه يا ميرفت انتي عايزاني اضيع حياتي وعمري قدام التليفزيون زيك اتابع مسلسلات وادفن نفسي هنا في البيت.. انا لسه صغيرة وعايزة اعيش وأخرج واشوف ناس واحب واتحب.
ميرفت بدهشة: تحبي وتتحبي!! افهم من كده ان في حد جديد في حياتك يا ميسرة.؟
ميسرة بتوتر: وايه اللي يمنع ان يكون في حد جديد في حياتي..!
ميرفت: اللي يمنع انك لسه في فترة العدة بتاعك من عزيز واللي يمنع انك مينفعش تدخلي في علاقة جديدة بالسرعة دي ومع شخص منعرفش هو مين.. مش قادرة أصدق انك لسه متعلمتيش من اللي حصلك مع عزيز.
ميسرة: مش كل الرجاله زي عزيز يا ميرفت.. عزيز صفحة قديمة في حياتي وانا خلاص قفلتها ومش هفكر فيه تاني.
ميرفت: ومين بقى سعيد الحظ الجديد اللي دخل حياتك مكان عزيز!
ردت ميسرة: احنا لسه في مرحلة التعارف.. لما الموضوع يبقى رسمي هبقى اقولك هو مين.. انا لازم امشي دلوقتي.. باااي.
خرجت ميسرة وهمست ميرفت لنفسها بصدمة: مرحلة تعارف والموضع يبقى رسمي.. ربنا يستر من تهورك يا ميسرة.
خرجت ميسرة من البيت وراحت مطعم كبير وكان المكان كله متزين بالورد والشموع.
دخلت ميسرة وهي بتبتسم بسعادة وكان مرتضي في انتظارها وفي ايديه بوكيه ورد احمر وكان حاجز المطعم كله عشانها لوحدها.. ميسرة كانت مبهورة وحاسه انها رجعت بنت في العشرين من عمرها ومرتضي قدم لها الورد بطريقة رومانسيه ومسك أيديها وقعدوا مع بعض وكان بيقولها كلام رومانسي وهي حست انها بتعيش معاه شبابها من جديد وبتعرف الحب لاول مرة.
مرتضى كان متابع سعادتها بكلامه وفخور بنجاحه في خطته وانه قدر بكل سهوله يسيطر على ميسرة وبدأت تثق فيه.
.......
صباح اليوم التالي.
آيات وصلت الجامعة وشافت البنت الحامل اللي قابلتها في الحمام والبنت قربت منها واتكلمت معاها بأبتسامة: انا حابه أشكرك على اللي عملتيه معايا وانا تعبانه.
ردت آيات بأبتسامة: علي ايه انا معملتش حاجة.. المهم طمنيني انتي كويسه دلوقتي ؟
ردت البنت: اه النهاردة أحسن كتير.. انا مكنتش اعرف ان الحمل بيكون صعب كده في الشهور الأولى!
ردت آيات بأبتسامة: انتي لسه في الشهور الأولى.. انا خلصت الشهور الأولى الحمدلله وبقيت في اول الشهر الخامس دلوقتي.
البنت ابتسمت وقالت: مش باين عليكي الحمل واضح ان بطنك صغيره وكمان لبسك واسع مش مبين انك حامل اصلا!!
آيات ضحكت والبنت كملت كلامها وقالت: بس الحمل صعب مع الجامعة.. تفتكري احنا هنقدر نكمل الجامعة بعد الولادة.
آيات: ان شاء الله نقدر.
البنت مدت أيديها وقالتلها: احنا لسه متعرفناش.. انا نادين..
آيات: وانا آيات.
نادين: دي اول سنه ليا في الجامعة دي ومعرفش حد هنا خالص.. آيات احنا ممكن نبقى أصحاب ؟
ردت آيات: اه طبعا.
نادين ابتسمت وقالتلها: مبسوطة اني اتعرفت عليكي يا آيات.. قوليلي انتي الدكتور بتاعك اسمه ايه؟ اصل انا مش مرتاحة مع الدكتور بتاعي اللي انا متابعة معاه الحمل وبفكر اروح لدكتور تاني.
آيات بدأت تتكلم معاها عن الدكتور بتاعها ونادين كانت بتسمعها بتركيز وبعد كلام كتير بينهم قعدوا مع بعض وآيات كانت مرتاحة في الكلام مع نادين جدا واتكلموا في مواضيع كتير ونادين حكتلها ان جوزها مسافر وانها عايشه هنا لوحدها وآيات اتعاطفت معاها وقررت تكون معاها طول الوقت وتساعدها لو احتاجت أي حاجة.
رواية مكتوبة على إسمي بقلمي ملك إبراهيم.
بعد مرور أسبوع.
عامر وآيات راحوا للدكتور اللي آيات بتتابع معاه الحمل.
الدكتور شاور ب أيديه علي الشاشه إللي قدامهم وقال بأبتسامة: البطل الصغير بتاعنا ظاهر قدامكم اهو..شايفينه ؟
آيات بصت على صورة الجنين في الشاشه اللي قدامها وعيونها دمعت وعامر بص عليه وابتسم بسعادة وسأل الدكتور: هي الولادة هتكون إمتى يا دكتور؟
رد الدكتور بأبتسامة: هانت يا باشمهندس.. كلها اربع شهور وابنك يجي للدنيا ان شاء الله.. بس مدام آيات لازم تهتم ب أكلها شويه وتحاولي ترتاحي لان المايه حوالين الجنين قليله شويه.
آيات بقلق: يعني في خطر عليه يا دكتور ؟
الدكتور: ان شاء الله مفيش اي خطر انا هكتبلك علي ادويه تاخديها في مواعيدها.
آيات قامت بعد انتهاء الكشف واخدو صور الجنين وعامر كان بيبص للصور وهو بيبتسم بسعادة واشتياق انه يشوف ابنه ويضمه في حضنه.
آيات قعدت قدام الدكتور وسألته بفضول: في واحدة صاحبتي إسمها نادين كانت عايزة تتابع حملها مع حضرتك يا دكتور.. هي كانت متابعة الحمل مع دكتور تاني بس بتقول انها مش مرتاحة معاه.
رد الدكتور بأبتسامة: تمام.. ممكن تكلم السكرتيرة وتحجز معاها ميعاد.
آيات ابتسمت وعامر سألها بدهشة: مين نادين؟
آيات: دي زميلتي في الجامعة اللي كانت تعبانه وانا حكتلك عنها.
عامر بص ل آيات وهز راسه بالايجاب وشكر الدكتور وخرجوا.. اول لما خرجوا آيات اتصلت على نادين وقالتلها انها كلمت الدكتور وقالها تكلم السكرتيرة وتحجز ميعاد للكشف.
عامر كان مستغرب ان آيات علاقتها بزميلتها دي تطورت بسرعة كده وسألها باستغراب: مكنتش اعرف ان علاقتك بزميلتك دي تطورت للدرجة دي!
آيات بأبتسامة: نادين بنت كويسه وانا متعاطفه معاها لأنها حامل وجوزها مسافر وعايشه هنا لوحدها.
عامر بستغراب: وازاي جوزها واهلها سايبنها تعيش لوحدها هنا وهي حامل !
آيات: انا معرفش تفاصيل كتير عنها بس هي طيبه اوي وانا حبيتها.
عامر باستغراب: طب هي اسمها ايه بالكامل؟
آيات: ليه بتسأل؟ اللي اعرفه ان اسمها نادين.
عامر: عايز اسأل عنها واعرف هي كويسه فعلا ولا لا!
آيات بعناد: من غير ما تسأل يا عامر انا بقولك انها بنت كويسه جدا انا متأكدة.. وبعدين مش كل الناس اللي في الدنيا أشرار عشان تخاف عليا من اي حد يقرب مني.. الدنيا لسه بخير وفي ناس كتير كويسين.
عامر بص ل آيات بعمق وقالها: عموما انا هعرف اسمها بطريقتي.
آيات بغضب: عامر انا مش صغيرة على فكرة عشان تتعامل معايا بالطريقة دي!
عامر: آيات انا بحبك ومن حقي اخاف عليكي واحميكي وبعدين مفيش حاجة لو انا اطمنت انها بنت كويسه.
آيات: عامر انت مش ملاحظ ان انت بتخنقني بكل اللي انت بتعمله ده.. حاطت حرس ورايا بيعدوا عليا النفس إللي بتنفسه.. أنا حاسه إني متراقبه طول الوقت ومش عارفه أتنفس.
عامر:احنا اتكلمنا في الموضوع ده آكتر من مره وقولتلك ان الحرس دول لحمايتك.
آيات: حمايتى من ايه!! مش خلاص كل المشاكل اللي كانت عندك انتهت ومبقاش لك اعداء!
عامر: مفيش حد ناجح ملوش اعداء يا آيات.
آيات سكتت لانها مش مقتنعه ب كلامه وعامر تعب من كتر ما هو بيحاول يقنعها وهي عنيده ومش عايزة تفهم انه بيعمل كل ده عشان خايف عليها.
آيات بعصبيه: عموما انا تعبت وزهقت من موضوع الحرس ده ونفسي اعيش حياة طبيعيه زي كل الناس ومش اي بنت اتعرف عليها واصاحبها تبقى شريره وعايزة تأذيني! لو سمحت يا عامر من فضلك انت لازم تحط حدود للموضوع ده ولو انت عندك اعداء انا معنديش!
عامر بنفاذ صبر: وانا ايه وانتي ايه يا ايات؟!! احنا الاتنين واحد واي حد هيفكر يأذيني انتي اول حد هيفكر يأذيني فيه لانك نقطة ضعفي الأولى يا آيات.
آيات بتعب: خلاص يا عامر انا تعبت كفايه كلام في الموضوع ده لو سمحت.
عامر بص قدامه علي الطريق واتنهد بتعب وفي نفس الوقت خالته ميرفت اتصلت عليه وعامر رد عليها وكان واضح على صوتها القلق: عامر.. حبيبي عامل ايه وآيات عامله ايه طمني عليكم.
عامر بقلق: احنا الحمدلله بخير.. صوتك مش طبيعي؟ في حاجة حصلت ؟؟
ميرفت بتردد: ميسرة...
عامر بقلق: مالها امي؟؟
ميرفت: مش عارفه اقولك ايه يا عامر بس شكل ميسرة بتحب جديد وانا قلقانه عليها اوي.
عامر وقف بالعربيه بصدمة وآيات بصت له بذهول وكتمت ضحكتها😂😂.... بقلمي ملك إبراهيم.
... يتبع
آيات وميسرة هيجيبوا اجل عامر ويجننوه💔😂..
الكاتبة ملك إبراهيم Malak Ibrahim
رواية مكتوبة على اسمى الجزء الثانى 2 الفصل الخامس 5 من هنا
الرواية كاملة من هنا (رواية مكتوبة على اسمى الجزء الثانى 2)
