رواية مكتوبة على اسمى الجزء الثانى 2 الفصل الخامس 5 بقلم ملك إبراهيم
رواية مكتوبة على اسمى الجزء الثانى 2 بقلم ملك إبراهيم
 |
| رواية مكتوبة على اسمى الجزء الثانى 2 |
رواية مكتوبة على اسمى الجزء الثانى 2 الفصل الخامس 5
#الحلقة_الخامسة
#الجزء_الثاني
#مكتوبة_على_إسمي
#بقلمي_ملك_إبراهيم
ميرفت بتردد: ميسرة...
عامر بقلق: مالها امي؟؟
ميرفت: مش عارفه اقولك ايه يا عامر بس شكل ميسرة بتحب جديد وانا قلقانه عليها اوي.
عامر وقف بالعربيه بصدمة وآيات بصت له بذهول وكتمت ضحكتها علي اخر لحظه وعامر رد على خالته بعصبيه: امي بتحب جديد!! ايه الكلام اللي بتقوليه ده يا خالتي!!
ميرفت بتردد: عامر انت لازم تفضي نفسك وتيجي لان الموضوع بجد وانا قلقانه على ميسرة وهي مش عايزة تسمع مني.
عامر بغضب مكتوم وهو بيشغل عربيته تاني: حاضر يا خالتي انا هوصل آيات البيت واجيلك حالا.
قفل المكالمه وآيات بصتله وسكتت وعامر كان بيبص قدامه بغضب وهو حاسس انه هيتجنن من إللي بيحصله ومش عارف يلاقيها من آيات وعنادها ولا امه وتهورها!!
رواية مكتوبة على إسمي بقلمي ملك إبراهيم.
في بيت ميرفت.
قفلت المكالمه مع عامر ولقت ميسرة نازله وهي لابسه ملابس مش مناسبه ابدا مع سنها ومغيره لون شعرها وحاطه ميكب كتير وريحة برفانها قويه جدا.
ميسرة اتكلمت معاها بصوت رقيق: هاااي يا ميرفت.. متعملوش حسابي في العشا النهاردة انا هتعشى برا.
ميرفت بصتلها بغضب وقالت: ايه اللي انتي عملاه في نفسك ده!! مش مكسوفه لو ابنك شافك بالشكل ده هيقول ايه!
ردت ميسرة بغضب: وابني هيشوفني فين هو مشغول بشغله ومراته!!
اتكلمت ميرفت بانفعال: هيشوفك دلوقتي يا ميسرة.. انا كلمت عامر وهو جاي في الطريق دلوقتي.
ميسرة بصتلها بصدمة: كلمتيه قولتيله ايه؟؟
ميرفت: قولتله يجي يشوف الحالة اللي انتي وصلتيلها دي.
ميسرة قربت من اختها بغضب: مالها حالتي يا ميرفت!!؟ ايه صعبان عليكي تشوفيني مبسوطه وعايشه حياتي ؟! عايزني ابقى نسخه منك واقضي حياتي وانا قاعده مكاني مبتحركش لحد ما بقيتي شبه الكرسي اللي انتي قاعده عليه! صعبان عليكي اني بتحرك واخرج واحب واتحب وانتي مقضيه حياتك تتفرجي على المسلسلات والافلام وتكلمي نفسك هنا!
ميرفت بصت ل اختها بصدمة وميسرة كانت في اشد حالتها من العصبيه والجنون وقالت كلام جارح جدا ل اختها وانهت كلامها وهي بترفع صابعها في وش ميرفت وقالت بتحذير: عامر لو عرف ايه حاجة عن خروجاتي وعن اللي بعمله يبقى لا انتي اختي ولا انا اعرفك يا ميرفت وهتخسريني العمر كله.
ميرفت بصدمة وذهول: للدرجة دي يا ميسرة!!
ميسرة بغضب: واكتر.. انا مش هسمحلك تدمري علاقتي ب ابني وحياتي واقف اتفرج عليكي...
واتحركت اتجاه الدرج وقالت: انا هطلع اغير وانزل اقابل عامر بلبس البيت وانتي تصلحي اللي عملتيه وتقولي ل عامر ان انتي كدبتي عليه او تخترعي اي كدبه وتغيري كلامك اللي قولتيهوله مفهوم.
ميرفت كانت مصدمة من اختها وكلامها وميسرة مهتمتش بصدمتها وطلعت تغير لبسها ودموع ميرفت نزلت بحزن وقهره بعد ما سمعت كلام اختها الجارح وخافت فعلا انها تخسرها او تكون سبب ان ميسرة تخسر ابنها.
بعد وقت عامر وصل قدام بيت خالته وهو هيتجنن بعد الكلام اللي قالته وفي نفس الوقت كان شريف لسه واصل هو كمان وراجع من برا لانه مشغول الفترة دي في تجهيز الفيلا اللي هيتجوز فيها.
شريف استغرب لما شاف عامر وسآله بدهشة: عامر مقولتش يعني انك هتيجي هنا مش المفروض هتاخد آيات للدكتور النهاردة!
رد عامر وهو بيتنهد بتعب: روحنا للدكتور وروحت آيات البيت وجيت أشوف امي لان خالتي كلمتني وقالتلي حاجة غريبه كده عن امي وانا جيت افهم ايه الحكاية!
شريف بدهشة: حاجة ايه؟؟
عامر زفر بغضب وهو مش عارف يقول ايه ل شريف لان الموضوع مخجل جدا وقاله: تعالى ندخل ونشوف خالتي هتقول ايه.
عامر وشريف دخلوا وكانت ميرفت قاعده بتبكي واول لما شافتهم جففت دموعها بسرعه وابتسمت بتوتر وهي بتستقبلهم.
عامر قرب منها وسلم عليها وسألها بقلق: خالتي ايه الكلام اللي قولتيه في التليفون ده!!
اتكلمت ميرفت بتوتر: هو انا يعني مينفعش اشوفك غير بالطريقه دي!.. انت بقالك كام يوم مش بتيجي ووحشتني وكمان ميسرة كل شويه تسأل عليك.
عامر بص ل خالته بدهشة وقال: بس الكلام اللي قولتيه في التليفون ده....
قاطعته خالته وهي بتضحك عشان يصدق انها كانت بتهزر معاه: انا كنت بقولك كده عشان اغيظ ميسرة وكانت قاعده جمبي وكنا بنضحك وعايزين نعرف ايه هيكون رد فعلك لو حاجة زي دي حصلت.
عامر اتنهد براحة وقال: حرام عليكي يا خالتي هو في هزار في الكلام ده برضه!!
سألهم شريف بفضول: هو ايه الحكاية انا عايز افهم؟
قاطعهم نزول ميسرة وكانت لابسه بيچامة منزليه غامقه وبشرتها كانت باهته بعد ما مسحت الميكب اللي كان على وشها وقربت منهم وهي بتتابعهم بترقب واتكلمت مع عامر: عامر حبيبي وحشتني.
عامر ضمها وقال بحنان: وانتي كمان يا امي وحشتيني.. انا اسف لاني انشغلت عنك الايام اللي فاتت.
ميسرة بصت ل اختها بعد ما اتأكدت انها متكلمتش مع عامر في حاجة وردت عليه: ولايهمك يا حبيبي انا وخالتك بنتسلى طول اليوم مع بعض.
أتكلم شريف بحزن: وانا كمان اسف لاني انشغلت عنكم الفترة دي بس انتوا عارفين تجهيز الفيلا اللي هتجوز فيها واخده كل وقتي.
ميسرة بصت ل ميرفت بخبث وقالت: هي دي سنة الحياة يا حبيبتي كل واحد لازم يهتم بحياته ومستقبله.. اكيد مش هتفضلوا قاعدين جمبنا طول العمر..كل واحد فيكم لازم يبقى عنده بيت وزوجة واولاد يشغلوه وياخدو كل وقته.
ميرفت خفضت وشها بحزن لان هي الوحيدة اللي فاهمه قصد اختها وعامر قبل أيد امه وقالها: مين قال كده يا ست الكل احنا من غيركم ولا حاجة.
ميسرة ابتسمت وعيونها كانت على اختها وشريف بص ل عامر وقاله: بما انك هنا انا كنت عايز اخد رأيك في تعديلات عايز أعملها في الفيلا بتاعي.. تعالى معايا أوضة المكتب تشوفهم.
عامر قام ودخل مع شريف غرفة المكتب وميسرة قربت من ميرفت اختها وهي بتبتسم وقالت: شكرا يا ميرفت لانك حافظتي على علاقتنا.
ميرفت بصتلها بحزن وقالت: ياريت انتي كمان تحافظي على علاقتك بينا يا ميسرة.. لانك لو خسرتينا مش هتلاقي حد يخاف عليكي بعد كده.
ميسرة ردت ببرود: متخافيش يا ميرفت انا عارفه انا بعمل ايه كويس ومش محتاجة نصيحة من حد وخصوصا منك انتي.
ميرفت بصتلها بغضب واتحركت بالكرسي بتاعها بعيد عنها وميسرة قعدت تبتسم بثقة ومسكت تليفونها وبعتت رساله ل مرتضى تعتذر له انها مش هتقدر تخرج تقابله النهاردة.
رواية مكتوبة على إسمي بقلمي ملك إبراهيم.
بعد مرور عدة ايام واسابيع..
كانت كل يوم ميسرة بتتعلق ب مرتضى اكتر من اليوم اللي قابله وكل يوم مرتضى يفاجئها بهدايا وخروجات وسهر في أماكن مختلفه وكانت ميسرة سعيدة جدا معاه بالحياة الخياليه اللي أخدها عليها وكأنها بتعيش شبابها معاه من جديد.
كانوا سهرانين في مكان ومرتضي قاعد جنبها وبيتكلموا وبدون ما تنتبه ميسرة استغل مرتضى انها مشغوله في الكلام معاه وحط قرص دواء في العصير بتاعها وميسرة شربت العصير بدون ما تنتبه وبعد دقايق فتح علبه صغيرة فيها بودره بيضا وبدأ يجهزها قدامه.
ميسرة اتصدمت وسألته بقلق: ايه ده انت بتعمل ايه؟ ده هيرو.ين صح؟
رد مرتضى: لا دا اللي بيخليكي تحسي انك اسعد انسانه في الدنيا.. وانا حابب اننا نتشارك الشعور ده مع بعض.. خدي جربي.
ميسرة خافت وقالت بتوتر: لا انا بخاف من الحاجات دي!
مرتضى: يبقى انتي مش عايزة تشاركيني الحاجات اللي بتسعدني.
ميسرة بتردد: بس بلاش ده.
مرتضى بزعل مزيف: برحتك يا ميسرة.. انتي شكلك مش عايزة تتبسطي معايا.
ميسرة لاحظت انه زعل وقالت بتوتر: خلاص أنا ممكن أجرب مرة واحدة بس عشان خاطرك.
هز راسه بابتسامة وميسرة قربت البودرة من انفها واخدت نفس عميق ومرتضي كان بيبصلها ويبتسم وقالها: ايوا كده يا حبيبتي.. برافو عليكي.
ميسرة حست بشعور غريب واسترخاء في كامل جسمها وكان ده تأثير الدواء اللي مرتضى حطه في العصير بتاعها وغمضت عينيها تستمتع بالشعور اللي هي حاسه بيه.
مرتضى ابتسم بثقة وكتب رساله على تليفونه "كله تمام المفعول بدأ يظهر عليها"
جاتله رساله بالرد "برافو عليك بس لازم تنتظم على الدوا ده مع البودرة لمدة أسبوعين على الاقل"
رد مرتضي برساله وهو متابع حالة الاسترخاء اللي بقت ميسرة فيها وكأنها في عالم تاني "واسبوعين هيكونوا كفايه عشان تكون مدمنه؟ "
جاله رد "انا مش هدفي انها تكون مدمنه انا عايز اشوفها مذلوله قدامي والدوا إللي انت حطيتهولها في العصير ده بيتفاعل مع البودرة وهتوصلها لحالة هيكون علاجها اصعب من الإدمان بكتير، المهم عندي انك لازم تقابلها كل يوم وتخليها تاخد الدوا ده مع كام شامه كده من البودرة اللي معاك"
رد مرتضى" تمام كل اللي قولت عليه هيتنفذ"
------
بعد مرور أسبوعين.
في شقة عامر وآيات.
اتكلم عامر مع أيات قبل ما يخرجوا من الشقة الصبح: آيات.. انا حاولت اعرف اي حاجة عن البنت صحبتك اللي اسمها نادين دي ومفيش اي معلومة عنها.. في حاجة غريبه ولازم تخلي بالك من البنت دي والافضل تبعدي عنها.
آيات: هو عشان ملقتش حاجة ضدها يبقى ابعد عنها! ليه طول الوقت محسسني ان كل الناس عايزين يؤذونا!
عامر بنفاذ صبر: آيات.. انا فهمتك آكتر من مرة ان طبيعي جدا يكون ليا اعداء وعايزين يؤذوني وانا مش هستحمل يؤذوني فيكي.
آيات بصتله بعدم اقتناع وهزت راسها بلا مبالاة وعامر بصلها بقلق وقال بتحذير اخير: آيات كلامي ده مينفعش فيه عناد وانتي لازم تساعديني احافظ عليكي وعلى ابننا.
آيات بعدم اقتناع: حاضر يا عامر انا لازم امشي دلوقتي عشان اتأخرت علي الجامعة، ممكن ولا في اي اوامر تانيه؟؟
عامر زفر بغضب وقال: دي مش اوامر يا آيات انا خايف عليكي.
آيات: حاضر يا عامر ممكن امشي بقى لاني اتأخرت.
عامر بصلها وهز راسه بقلة حيلة وخرجوا الاتنين من الشقه وآيات ركبت العربيه مع السواق وعامر كان واقف يبص عليها وحاسس بشعور قلق وخوف غريب جواه واللي مضايقه اكتر ان آيات مش مقدرة خوفه عليها وبتتعامل مع كلامه بلا مبالاة!.
رواية مكتوبة على إسمي بقلمي ملك إبراهيم.
عند مرتضى.
كان قاعد في شقته وبيتكلم في التليفون.
مرتضى: فات اسبوعين وانا بحطلها الدوا كل يوم بانتظام وبدأ يظهر عليها الاعراض بقالها يومين وانا مقبلتهاش امبارح زي ما قولتلي وأكيد هتفكر ان كل ده بيحصلها من البودرة بس.
رد عليه: تمام كده هي أكيد هتتعب النهاردة لانها مخدتش القرص إمبارح وهتلاقيها جايه تجري عليك وتنفذ اللي قولتلك عليه مش عايز غلطه.
مرتضي: متقلقش انا ماشي معاها علي الخطه بالظبط.
--------
في بيت ميرفت.
ميسرة خرجت من غرفتها بخطوات سريعة وشريف ووالدته كانوا قاعدين بيفطروا مع بعض.
ميرفت اول لما شافت ميسرة لابسه وخارجة سألتها بقلق: رايحة فين بدري كده يا ميسرة ؟
ردت ميسرة بصوت مهزوز: انا عندي مشوار مهم.
وخرجت بسرعة قبل ما تسمع رد من اختها وشريف بص ل والدته وقالها بدهشة: خالتي شكلها تعبانه.. وشها باهت وفيها حاجة غريبه.!
اتكلمت ميرفت بقلق: بقالها كام يوم مش عجباني مش عارفه فيها ايه!! لما ترجع لازم اقعد اتكلم معاها.
....
قدام باب شقة مرتضي.
وقفت ميسرة تخبط علي الباب بقوة.
مرتضي خرج وفتح لها الباب وبصلها وابتسم وقال: ايه يا حبيبتي جايه بدري ليه كده!
ردت ميسرة بصوت مهزوز: مرتضى انا جسمي كله بيوجعني وعندي صداع هيموتني.. ارجوك انا عايزة بودرة من اللي معاك.. لما بشمها برتاح.
مرتضى ابتسم وقالها: انا مش عارف في عندي هنا ولا لا.. طب ادخلي يا حبيبتي وانا هدور كده عندي يمكن الاقي.
دخلت ميسرة وهي بترتجف ومرتضي دخل أوضة النوم ورجع وهو معاه كيس صغير من البودرة وقالها: حظك حلو لقيت كيس.
ميسرة جريت عليه واخدت الكيس من أيديه ووقع منها على الأرض وقعدت على الأرض تفتح الكيس وجسمها كله كان بيرتجف ومرتضى طلع تليفونه وصورها فيديو وهو بيبتسم.
رواية مكتوبة على إسمي بقلمي ملك إبراهيم.
بعد وقت آيات وصلت الجامعة.
قربت نادين من آيات وقالتلها: آيات الحمل تاعبني اوي وحصل عندي نزيف فجاة.. ممكن تاخديني للدكتور بتاعك بسرعة ؟
آيات بقلق: تعبانه حاسه ب ايه؟
نادين: مش عارفه انا لقيت نقط دم وحاسه اني بسقط الحمل.
آيات بصتلها بقلق وشافت نقط دم علي بنطلون نادين وقلقت عليها فعلا وقالت: طب تعالي خلينا نروح بسرعة لاقرب مستشفى.. انا هكلم السواق يجيب العربية ويجي بسرعة عشان يوصلنا.
نادين: لا انا مش هقدر اتحمل خلينا نروح في تاكسي لان انا بشوف عربية حرس ماشيه وراكي وانا مش عايزة شوشره ومش عايزة حد يحس بحاجة.
آيات بصتلها بدهشة ونادين قالت بصوت مهزوز: خلينا نخرج من البوابة التانيه ونتحرك بسرعة حتى وصليني عند الدكتور وسيبني يا آيات وارجعي انتي الجامعة تاني عشان جوزك.
آيات بتردد: بس..
نادين: ااااه الوجع بيزيد يا آيات ارجوكي ساعديني.
آيات هزت راسها بالموافقة وخرجت معاها من البوابة التانيه وكان في تاكسي واقف وقرب منهم بسرعه ونادين ركبت وايات كانت محتاره وحاسه ان اللي بتعمله ده غلط بس كانت شايفه نادين بتتألم قدامها وكانت لازم تساعدها وتاخدها المستشفى بسرعة.
ركبت جنب نادين واول لما ركبت التاكسي اتحرك بسرعه ونادين بصت ل آيات وابتسمت وقالتلها: شكرا يا آيات.
آيات قبل ما ترد عليها لقت نادين بترش حاجة في وشها وفقدت الوعي في نفس اللحظة.
رواية مكتوبة على إسمي بقلمي ملك إبراهيم.
في شقة علاء ولولا.
علاء خرج من اوضته وهو بيتكلم في التليفون بسعادة: اخيرا التنفيذ النهاردة.. هتجيبها علي العنوان اللي اتفقنا عليه والرجاله هيكونوا هناك وبعد ما يخلصوا ويصوروها هنبلغ البوليس وهتتمسك آداب مع واحد فيهم والخبر هيتنشر في كل المواقع.. القبض على زوجة المهندس عامر الجارحي في قضيه مخله للاداب.. هتبقى فضيحة الموسم.
وضحك علاء ب شر وقفل المكالمة وخرج من الشقة ولولا كانت واقفه بتسمع مكالمته وشهقت بصدمة لما اتأكدت انه عايز يأذي مرات عامر الجارحي فعلا واخدت تليفونها بسرعه عشان تحذر عامر.
....
عامر كان في شركته وفجأة جاتله مكالمة من لولا وأستغرب انها بتتصل عليه واول لما فتح المكالمه سمع صوتها وهي بتتكلم بصراخ وخوف : باشمهندس عامر الحق مراتك بسرعة.
عامر انتفض اول لما سمع كلمة مراتك وسألها بقلق: مالها مراتي!
لولا: انا سمعت علاء دلوقتي بيتكلم في التليفون قبل ما يخرج وقال انهم هيخطفوا مراتك النهاردة يصوروها مع رجاله وهتتمسك آداب وهينزلوا صورها علي كل المواقع.... بقلمي ملك إبراهيم.
.... يتبع
تفتكروا عامر هيقدر يلحق آيات وينقذها 🤔🤔
رواية مكتوبة على اسمى الجزء الثانى 2 الفصل السادس 6 من هنا
الرواية كاملة من هنا (رواية مكتوبة على اسمى الجزء الثانى 2)
