رواية مكتوبة على اسمى الجزء الثانى 2 الفصل التاسع عشر 19 بقلم ملك إبراهيم
رواية مكتوبة على اسمى الجزء الثانى 2 بقلم ملك إبراهيم
 |
| رواية مكتوبة على اسمى الجزء الثانى 2 |
رواية مكتوبة على اسمى الجزء الثانى 2 الفصل التاسع عشر 19
#الحلقة_19
#الجزء_الثاني
#مكتوبة_على_إسمي
#بقلمي_ملك_إبراهيم
بعد يوم طويل وفي ساعة متأخرة من الليل.
خرجوا كلهم من القسم.
آيات وبيسان وعامر وامجد.
آيات وقفت قدام عامر وقالتله: انا هروح مع بيسان بقى وشكرا يا عامر علي كل اللي عملته معانا.
عامر مسك أيديها وقفها وقال : استني هنا انتي مش هتروحي لأي مكان.. انتي هتيجي معايا علي بيتنا.
آيات بارتباك: لا بيتنا ايه..
وبصتله ب استعطاف: عامر انا محتاجة وقت افكر في علاقتنا.
عامر ضحك وقال: تفكري في علاقتنا من اي اتجاه بالظبط.. حبيبتي انا لسه مخرجك من القسم دلوقتي ومن قضية شروع في قتل.. انتي متفكريش تاني بعد كده!
آيات بصتله بغيظ وقالت: ما هو حضرتك لو كنت تعبت نفسك شويه وشرحتلنا انت ليه سحبت مننا المشروع مكنش كل ده حصل.
رد عامر: يعني طلعت انا اللي غلطان برضه؟
ردت بتلقائيه: اه طبعا.
اتكلمت بيسان بتعب: خلونا نروح دلوقتي نرتاح وابقوا اتخانقوا برحتكم بعدين.
اتكلم امجد مع بيسان: واحنا كمان لازم نتكلم يا بيسان ومتفكريش انك هتهربي مني تاني.
بيسان اتوترت وهزت راسها بالايجاب وعامر بص ل آيات واتكلم وهو بيضحك: خلاص هسيبك تروحي مع بيسان وترتاحي النهاردة ونبقى نكمل كلامنا بعدين.. بس اعملي حسابك متخطيش خطوة بعد كده قبل ما تعرفيني انا مش كل يوم اجي اخرجك من القسم.
امجد ضحك وقال ل عامر: مش كنا سبناهم يباتوا الليلة دي في التخشيبه يمكن يعقلوا شويه.
عامر ضحك وبيسان وآيات بصولهم بغيظ وآيات اتكلمت وهي متغاظه منهم: اااه دا انتوا هتتسلوا علينا النهاردة بقى.. علي فكرة كنتو سيبونا عادي كنا هنعرف نتصرف.
عامر ضحك وقالها: ااه ما انتوا بقيتوا رد سجون بقى وخبره.
امجد ضحك وبيسان قالتلهم بغيظ: انتوا بتضحكوا علي احزانا وشمتانين فينا!!
عامر رد عليها: ياريت بس تتعلموا من اللي حصل وتبطلوا تهور شويه.. تعالوا يلا عشان اوصلكم.
أتكلم أمجد: خد آيات معاك في عربيتك يا عامر وانا هاخد بيسان معايا في عربيتي.
بيسان بصت ل امجد بتوتر وآيات راحت مع عامر علي عربيته وبيسان ركبت مع امجد.
رواية مكتوبة على إسمي بقلمي ملك إبراهيم.
بعد وقت وصل عامر بعربيته قدام العمارة اللي فيها شقة بيسان وآيات.
آيات بصتله واتكلمت برقه: شكرا يا عامر علي كل اللي عملته عشاني النهاردة.
عامر بصلها بحب وقال: اظن مفيش واحدة في الدنيا تشكر جوزها لما يعمل حاجة عشانها..
ومسك ايديها وقال: نفسي بس تتعلمي من الأخطاء دي يا آيات وبلاش تهور وعناد تاني وبتمنى تثقي فيا حتى لو ملقتيش مني تفسير لكل حاجة بعملها بس تكوني متأكدة اني بعمل كل حاجة لمصلحتك وعشان بخاف عليكي.
آيات هزت راسها بالايجاب وقالت: خلاص يا عامر وصدقني انا هثق فيك ومش هتهور تاني بعد النهاردة.
عامر قبّل ايديها بحب وقال: وانا اسف يا حبيبتي على اي حاجة عملتها وزعلتك وعايزك تعرفي اني مستعد افديكي بروحي.
آيات خفضت وشها بخجل وعامر أتكلم معاها باشتياق: مش ناويه نرجع بقى.. كفايه بعاد انا مش قادر اعيش من غيرك اكتر من كده.
آيات ابتسمت بخجل وقالت: خلينا نصبر شويه يا عامر.. حاسه اني محتاجة وقت شويه كمان..
وبصتله بعمق وقالت: انا زعلت منك اوي لما سبتني في اكتر وقت كنت محتاجاك فيه، بس لما عرفت انك مطلقتنيش زعلي منك قل شويه ودلوقتي محتاجة شوية وقت كمان عشان اكون مستعدة اننا نبدأ مع بعض من جديد.
عامر بصلها اوي وقال: حاضر يا آيات زي ما تحبي وانا مستعد استناكي لاخر يوم في عمري.
آيات ابتسمت بحب وهي بتبصله وحاسه انها مش عايزة اي حاجة من الدنيا غيره هو وبس.
-------
في عربية امجد.
وقف بالعربيه وبص ل بيسان وقالها: ليه خبيتي عليا ان امي هي اللي طلبت منك تبعدي عني.
بيسان بصتله بصدمة ومقدرتش تتكلم.. امجد وهو بيبصلها بحب: انا عرفت كل حاجة.. وبعتذرلك على كل اللي امي عملته معاكي وبتمنى تسامحيها يا بيسان.
بيسان عيونها لمعت بالدموع وقالت: اللي والدتك عملته ده طبيعي جدا واي ام مكانها هتعمل كده.
امجد رد بثقة: لا يا بيسان.. اللي امي عملته ده غلط كبير في حقي وحقك وحق حبنا.. امي متعرفش انا بحبك قد ايه وعشان كده فكرت ان اي بنت ممكن تدخل قلبي وتاخد مكانك عادي.. بس الحقيقه ان مفيش اي بنت هتاخد مكانك في قلبي وعايزك تعرفي اني هفضل أتشرف بيكِ عمري كله.
بيسان دموعها نزلت وامجد بصلها بحزن وقالها برجاء: بلاش تبكي عشان خاطري.. انا بحبك يا بيسان وفي اقرب وقت هاجي انا وعيلتي عشان اخطبك وامي هتكون اول واحدة موجودة.. اوعدك.
بيسان اتكلمت بصوت باكي: انا مش عايزاك تخسر عيلتك بسببي يا امجد.
امجد بثقة: انا مش هخسر اي حد وكل اللي محتاجه منك شوية وقت ومتبعديش عني تاني.
بيسان ابتسمت وهزت راسها بالموافقه ونزلت من العربيه وهي بتبتسم وآيات كمان نزلت من عربية عامر وطلعوا الاتنين علي الشقة بتاعهم وقلوبهم بترقص من الفرحة وعامر وامجد رجعوا علي بيوتهم وكل واحد فيهم بيفكر ازاي يسعد حبيبته ويعوضها عن كل الايام الصعبه اللي عاشتها.
رواية مكتوبة على إسمي بقلمي ملك إبراهيم.
بعد يومين.
آيات وقفت قدام المرايا وهي بتجهز وكان وشها منور وحاسه انها بقت أحلى وأجمل كتير بعد رجوع عامر ليها واهتمامه الكبير بيها واتصاله عليها باستمرار عشان يسمع صوتها وكل شويه يوصلها رساله منه مكتوب فيها وحشتيني.. كانت فرحانه بالمشاعر الجميلة إللي بتعيشها معاه وكأن علاقتهم بتبدأ من جديد.
خرجت آيات من اوضتها وبيسان بصتلها بنبهار وقالت: ايه القمر ده بركاتك يا عامر يا جارحي.
آيات ابتسمت بخجل وقالتها: وامجد برضه مش مقصر.
بيسان ابتسمت وقالت: مكنتش متخيله ان امجد بيحبني كده ومستعد يتحدى الكل عشاني.
آيات ابتسمت وقالت: انتي تستاهلي حب امجد واكتر يا بيسان وصدقيني لو لف الدنيا مش هيلاقي زيك.
بيسان ضحكت وقالت: واضح ان مزاجك رايق على الصبح.. ما تخلي شوية كلام من الحلو ده للمسكين جوزك إللي مطلعه عينه ده.
اتكلمت آيات بسعادة: انا فرحانه اوي يا بيسان وعلاقتنا انا وعامر بتبدأ من جديد وكأننا لسه مخطوبين وبنتعرف علي بعض.. تعرفي انا كنت بتمنى اعيش المشاعر دي زي كل البنات.
بيسان ضحكت وقالت: بس متطوليش فترة الخطوبه دي احسن عامر يطفش منك ولا واحدة كده ولا كده تخطفوا منك.
آيات ردت بثقة: عامر بيحبني انا وبس ومستحيل بنت غيري تملى عينه.
بيسان بهزار: ااه يا عم الواثق انت ربنا يهديكي.. بس مقولتليش انتي متشيكه كده ورايحه علي فين؟
ردت آيات بسعادة: عامر هيوصلني الجامعه النهاردة.
بيسان بأبتسامة: ربنا يهنيكم ويسعدكم يارب.
آيات رددت من قلبها: يارب.
وخرجت من الشقة ونزلت ل عامر اللي كان مستنيها قدام عربيته واول لما شافها ابتسم وقالها: كل ده تأخير...
وبصلها وهي بتبتسم وقال: معقول كل الجمال ده عشاني.
آيات خفضت وشها بخجل وهو فتحلها باب العربيه وهو بيبصلها بحب وبعد ما ركبت هو ركب مكانه وشغل العربيه وهو بيبصلها ومش قادر يشيل عينيه من عليها وقال: هي فترة الخطوبه دي هتخلص امتى؟
آيات ضحكت بخجل وقالت: انا مش عايزاها تخلص لانها عجباني.
هز راسه وقال: والجواز حلو برضه وهيعجبك صدقيني.
آيات وشها احمر بخجل وسكتت وعامر ضحك على خجلها وقال: انا عايز اشتري فيلا لينا قريبه من فيلا هاجر وشريف وعايزك تيجي تشوفيها النهاردة بعد الجامعه عشان تقوليلي رأيك ولو عجبتك هشتريها وتفرشيها انتي علي ذوقك.
آيات بصت له بسعادة وكانت حاسه انها فعلا بتبدأ معاه كل حاجة من جديد وهزت راسها بالموافقه وعامر قالها: وفي اجتماع في الشركة عندي النهاردة وانتي وبيسان لازم تحضروا.
اتكلمت آيات بدهشة: بس مفيش حد قالنا على الاجتماع ده!
رد عامر: انا قولتلك اهو وامجد هيقول ل بيسان.
هزت راسها وبصت قدامها لقت انهم وصلوا قدام الجامعه.. بصت ل عامر وقالتله: انت هتروح الشركة دلوقتي ؟
عامر بص قدامه وقال بنبرة مرحة: هو انا ليا مكان تاني اروحه.. انتي شايفه مراتي سيباني عايش عازب لوحدي ومليش مكان غير الشركة.
آيات ابتسمت وقربت منه بسرعه وطبعت بوسه على خده.. عامر اتفاجئ وبصلها وهو بيضحك وقال: شكلي بدأت اصعب عليكي.
آيات ضحكت وقالتله: الصراحة صعبت عليا شويه...
عامر اتكلم بنبره مرحه: يعني في امل اني اصعب عليكي اكتر من كده شويه كمان...
وغمز لها بطرف عينيه وهو بيبص علي شفايفها.
آيات فتحت باب العربيه بسرعه ونزلت وهي بتضحك وبتقول: لا انسى انك تصعب عليا للدرجادي.
عامر نزل هو كمان من العربيه ووقف قصادها وهو بيضحك وقال: ماشي اهربي مني دلوقتي برحتك بس هيجي اليوم إللي تقعي فيه تحت أيدي.
آيات ضحكت وهي بتشاور ب ايديها وبتقولوه مش هيحصل واتحركت اتجاه البوابه بتاع الجامعه وعامر واقف يبصلها بنظرات عاشقه.
في اتجاه تاني كان دكتور مالك واقف جنب عربيته وشاف آيات وهي نازله من عربية عامر الجارحي وهو نزل ووقف يتكلم معاها وكانوا بيضحكوا ونظراتهم لبعض كلها حب.. مالك حس بالغيره ومكنش لسه يعرف ب علاقة عامر وآيات ودخل الجامعه وهو مضايق ومتعصب.
رواية مكتوبة على إسمي بقلمي ملك إبراهيم.
عند ميرفت وميسرة.
ميرفت كانت قاعدة بتشرب قهوتها وشافت ميسرة نازله من اوضتها وسألتها عن عامر وميرفت قالتلها انه خرج من بدري.
ميسرة قعدت قدام ميرفت وهي مرتبكه ومش عارفه تبدأ كلامها منين وقالت: ميرفت في موضوع عايزة افتحه معاكي.
ميرفت بقلق: خير يا ميسرة؟
اتكلمت ميسرة: اسماعيل.
ميرفت بدهشة: اسماعيل مين؟؟
ميسرة: عم آيات.
ميرفت بدهشة: ماله؟
ميسره خفضت وشها في الأرض بخجل وقالت: شكله كده واخد الموضوع جد وانا متلخبطه اوي ومش عارفه اوافق ولا لا.. بصراحة انا متحمسه للموضوع عشان نفسي اعيش اللي باقي من عمري في هدوء ووسط الطبيعه.
ميرفت بصدمة: موضوع ايه اللي واخده جد؟
ميسرة: جواز يا ميرفت طبعا.
ميرفت بصدمة وذهول: جواااز.. تاني يا ميسره؟!
ردت ميسرة: بس المرادي مختلفه يا ميرفت وإسماعيل غير اي راجل دخل حياتي قبل كده.. اسماعيل راجل بمعنى الكلمه وتقيل كده ويتحب وبصراحة حاسه ان هو هيكون العوض ليا.
ميرفت كانت بتبصلها بصدمة وساكته وميسره كملت كلامها وقالت: المشكله دلوقتي في عامر.. انا هتكسف أقوله الموضوع ده.
ردت ميرفت: دا على اساس ان انتي بتتكسفي اصلا!!
ميسرة بصتلها وقالت: اه يا ميرفت بتكسف وخصوصا بعد المصايب اللي اتسببت ل عامر فيها بس انا اخترت صح المرادي وهتجوز إسماعيل وهروح اعيش معاه في البلد بس لما عامر يوافق الاول.
ميرفت بصتلها وكتمت غيظها وقالت: بس انتوا كده مش مستعجلين شويه.. معقول في كام يوم تقرروا الجواز!
ردت ميسره وهي بتضحك: هو عجبني من ليلة فرح شريف ومن يومها واحنا كل يوم نتكلم.
ميرفت بصتلها وقالت: بتتكلموا.. اااه.. على بركة الله يا ميسرة وربنا يستر.
رواية مكتوبة على إسمي بقلمي ملك إبراهيم.
في الجامعة.
آيات خرجت من المحاضرة مع زمايلها وفجأة جتلها رساله من دكتور مالك وقفتها.
"آيات تعاليلي المكتب بتاعي دلوقتي ضروري"
آيات قراءة الرساله واتنهدت بغضب وهي مضايقه من تصرفاته دي وقررت تحط له حد.
سابت زمايلها وراحت علي مكتبه ووقفت تخبط وسمعت صوته بيسمح بالدخول.
دخلت آيات واتكلمت بنبرة حادة: حضرتك طلبتني يا دكتور؟
مالك حس بغضبها من نبرة صوتها الحادة وهو كمان كان مضايق بعد ما شافها مع عامر الجارحي الصبح وقالها: ايوا يا آيات.. انا طلبتك عشان اقولك ان اللي حصل الصبح ده مينفعش.. عيب لما تكوني طالبه جامعيه محترمة وتسمحي لواحد يجي يوصلك لحد الجامعة وتقفي تضحكي معاه كمان.
آيات بصتله بصدمة وقالت: واحد مين !!!
مالك بغضب: على ما اعتقد انه عامر الجارحي.
آيات هزت راسها وبصت له بثقة وقالت: بس عامر الجارحي مش غريب عني يا دكتور.. عامر الجارحي يبقى جوزي.
مالك اتصدم وعقله وقف عن التفكير وقال: جوزك!! جوزك ازاي!! متجوزين في السر يعني؟
آيات بدهشة: لا طبعا.. احنا متجوزين من زمان والناس كلهم عارفين ان انا مرات عامر الجارحي.
مالك كان هيتجنن لان مفيش ولا موقف جمع آيات وعامر قدامه يثبت انهم متجوزين!!
كان بيبصلها بذهول وآيات قالت بنبرة حادة: في حاجة تانيه حضرتك عايزني فيها؟
هز راسه ب لا وهو لسه تحت تأثير الصدمة وآيات بصتله بقوة وقالت: طب ممكن بعد اذن حضرتك بلاش تبعتلي رسايل تاني ولما تحب تطلبني ل مكتبك يكون بطريقه رسميه.
مالك كان بيبصلها ومش قادر ينطق وحس انه حرج نفسه معاها جدا.
آيات خرجت من مكتبه وراحت عند زمايلها وهي مقرره ان لو مالك ضايقها تاني هتقول ل عامر هو يتكلم معاه.
رواية مكتوبة على إسمي بقلمي ملك إبراهيم.
بعد انتهاء محاضرتها في الجامعة، آيات خرجت من الجامعه مع زميلتها وكان عامر واقف مستنيها جنب عربيته.
آيات اول لما شافته ابتسمت وهو شاورلها.
اتكلمت زميلة آيات: واااو.. مين المز ده يا آيات؟
آيات بصتلها بغيظ وقالت: المز ده يبقى جوزي.
البنت اتصدمت وآيات سابتها وقربت من عامر وهو فتحلها باب العربيه وحس انها مضايقه شويه.
ركب جنبها وسألها: ايه يا حبيبتي شكلك مضايقه ؟
ردت آيات: لا مفيش حاجة.. قولي احنا هنروح نشوف الفيلا دلوقتي ؟
عامر فرح لانها مهتمه انها تشوف الفيلا اللي هيعيشو فيها وقالها: اه يا حبيبتي انا هاخدك دلوقتي نروح نشوفها وبعدين نتغدا مع بعض وتيجي معايا الشركة عشان الاجتماع.
آيات هزت راسها بالموافقه وهي بتبص ل عامر بحب وبتتمنى ان علاقتهم تفضل جميلة كده على طول ومفيش حد يدخل بينهم تاني يفرقهم عن بعض.
راحوا الفيلا وشافوها وعجبت آيات جدا وعامر قرر انه يشتريها وآيات هتفرشها على ذوقها واول لما الفيلا تجهز هيعيشوا فيها.
اخدها عزمها على الغدا برا وكانوا مبسوطين مع بعض جدا وبعدين أخدها الشركة وكانت بيسان هناك وقاعده مع امجد.
الاجتماع بدأ وعامر كان مجهز لشركتهم مشاريع جديدة هيستلموها وآيات وبيسان كانوا فرحانين جدا بالمشاريع الجديدة وفرحانين ان كل حاجة في حياتهم بتتظبط.. حياتهم الخاصه وشغلهم.
في نهاية اليوم آيات رجعت مع بيسان على شقتهم وهما فرحانين وبعد دخولهم الشقة بحوالي عشر دقايق الجرس رن وآيات راحت فتحت لقت بنت جميله واقفه قدامها ولها بطن بارزه من الحمل وواضح انها في بداية الشهر الخامس تقريبا وسألتها: انتي آيات؟
ردت آيات بأبتسامة: اه انا.. مين حضرتك ؟
ردت البنت: انا مرات عامر الجارحي اتجوزنا في لندن من 6 شهور... بقلمي ملك إبراهيم.
... يتبع
مرات عامر الجارحي ازااااي😱 مين البنت دي وايه حكايتها🤔 هنعرف الحلقة الجايه 😍
رواية مكتوبة على اسمى الجزء الثانى 2 الفصل العشرون 20 من هنا
الرواية كاملة من هنا (رواية مكتوبة على اسمى الجزء الثانى 2)
