رواية مكتوبة على اسمى الجزء الثانى 2 الفصل العشرون 20 بقلم ملك إبراهيم
رواية مكتوبة على اسمى الجزء الثانى 2 بقلم ملك إبراهيم
 |
| رواية مكتوبة على اسمى الجزء الثانى 2 |
رواية مكتوبة على اسمى الجزء الثانى 2 الفصل العشرون 20
#الحلقة_20
#الجزء_الثاني
#مكتوبة_على_إسمي
#بقلمي_ملك_إبراهيم
في نهاية اليوم آيات رجعت مع بيسان على شقتهم وهما فرحانين وبعد دخولهم الشقة بحوالي عشر دقايق الجرس رن وآيات راحت فتحت لقت بنت جميله واقفه قدامها ولها بطن بارزه من الحمل وواضح انها في بداية الشهر الخامس تقريبا وسألتها: انتي آيات؟
ردت آيات بأبتسامة: اه انا.. مين حضرتك ؟
ردت البنت: انا مرات عامر الجارحي اتجوزنا في لندن من 6 شهور.
لحظات من الصمت وآيات بتحاول تستوعب اللي سمعته وهمست بصوت مهزوز من شدة الصدمة: عامر الجارحي مين!!! مراته ازاي؟
البنت ردت بهدوء: ممكن تسمحيلي ادخل وانا هفهمك كل حاجة.
آيات هزت راسها بالايجاب وهي متجمده مكانها والبنت دخلت وبيسان بصت لها بستغراب ورحبت بيها وسألت آيات مين دي وآيات مكانتش قادرة تنطق ولا تتكلم ودخلت مع البنت وقعدت قدامها وهي لسه بتبصلها بصدمة.
البنت اتكلمت بهدوء: انا دكتوره أروى كنت المعالجة النفسيه ل مدام ميسرة طول فترة علاجها في المستشفى ب لندن وهناك اتعرفت على عامر وحبينا بعض.
آيات رفعت حاجبها وقالت: حبيتوا بعض!!!
بيسان بصتلهم بصدمة ومنتظره تسمع البنت دي مين وعايزه ايه!
كملت أروى كلامها بهدوء: عامر حكالي عن اللي حصل بينكم وانفصالكم عن بعض وفي الحقيقه هو كان بيمر بحالة نفسيه صعبه وانا كنت بساعده وقدر يتخطى كل ده وانا معاه.
بيسان بصت على آيات وهي قلقانه عليها من الكلام اللي بتسمعه وآيات بصت ل أروى بعمق وقالت: واتجوزتوا ازاي؟؟
بيسان شهقت بصدمة: مين اتجوز مين؟
ردت عليها آيات: ثواني يا بيسان نفهم..
وبصت ل أروى وسألتها مرة تانيه: ممكن تحكيلي ازاي عرض عليكي الجواز وازاي اتجوزتوا.
ردت أروى بثقة: كنا سهرانين انا وعامر في مكان وتقلنا في الشرب شويه واخدنا اوضه في الأوتيل لوحدنا ولما فوقنا الصبح اكتشفنا اللي حصل بينا وعامر وقتها قالي انه مش هيتخلى عني.
آيات بصتلها بغموض لانها عارفه ان عامر مش بيشرب ومستحيل يعمل اللي هي بتحكيه ده!! عامر بيحبها هي وبس ولو كان عمل حاجة زي كده اكيد مكنش هيرجع ل آيات ويطلب منها تبدأ معاه من جديد!! على قد ما كانت مصدومة وخايفه ان كلام الدكتورة دي يطلع حقيقي ويكون عامر وقع في الغلط ده معاها فعلا علي قد ما كان في احساس جواها بيقولها ان عامر مستحيل يعمل كده حتي لو هو مش في وعيه زي ماهي بتقول.
بصتلها بغموض وحاولت تتماسك قدامها وقالت: وبعدين.. اتفضلي كملي.
أروى اتكلمت بتوتر لانها إستغربت قوة آيات وتماسكها قدامها رغم كل إللي سمعته والطبيعي ان اي واحدة تسمع الكلام ده عن حبيبها تنهار ومتقدرش تسمع اكتر!
أروى: اكتشفت اني حامل وخوفت اقول ل عامر عشان ميطلبش مني انزل البيبي وقولت اخبي حملي فترة لحد ما تنتهي الشهور الأولى وبعدها اقوله.
بيسان سألتها بصدمة: يعني انتي حامل من عامر دلوقتي؟
ردت بتأكيد: اه وفي بداية الشهر الخامس.
آيات بصتلها والدموع بتلمع في عينيها وقالت بصوت مبحوح: واتجوزتوا ازاي وامتي؟
أروى ردت بارتباك: احنا كنا هنتجوز بس عامر اضطر يرجع مصر.
آيات وهي بتبصلها بشك: يعني انتي مش مراته زي ما قولتي ؟
أروى: قولتلك هو وعدني انه مش هيتخلى عني.
بيسان اتكلمت بانفعال: ايه الجنان ده أكيد في حاجة غلط انا مش قادرة اصدق ان عامر يعمل كده!!
وبصت ل آيات وقالت: آيات انا اعرف عامر من ايام الجامعة وصدقيني عامر مستحيل يكون كده.
أروى بصت ل بيسان وقالت بثقة: وتفتكري انا هتبلى عليه مثلا!! في بنت تحط نفسها في موقف زي ده!
آيات بصتلها وهي مش قادرة تصدق لأن هي كمان واثقه في أخلاق عامر وعارفه انه مستحيل يغضب ربنا ويقع في ذنب كبير زي ده!! اتكلمت آيات وهي حاسه انها مش قادرة تتماسك اكتر من كده: وجايه ليا انا دلوقتي ليه؟ ليه مروحتيش ل عامر تتكلمي معاه.. أظن دي مشكلتكم انتوا وغلطتكم انتوا الاتنين.
ردت أروى: انا جيتلك لأني عرفت ان في احتمال انتي وعامر ترجعوا لبعض تاني.. ورجوعك ل عامر هيمنعه يوفي بوعده ليا ومش هيقدر يتجوزني وهيرفض يعترف ب ابنه.
آيات مقدرتش تستحمل كلامها اكتر من كده ودموعها نزلت من عينيها وقامت تجري على اوضتها..
بيسان بصت ل أروى بصدمة وسألتها: وانتي عرفتي منين ان عامر وآيات هيرجعوا لبعض.. ؟ ومنتظرة من آيات تعملك ايه؟؟
ردت أروى: عرفت من مدام ميسرة لاني لسه متابعه معاها حالتها وبنتواصل اون لاين ومنتظرة من آيات تبعد عن عامر وتسيبهولي بعد ما عرفت الحقيقه.
بيسان بصتلها بصدمة وبصت على غرفة آيات وهي مش عارفه تعمل ايه وبعد كام دقيقه خرجت آيات من غرفتها وهي بتجفف دموعها وقعدت معاها تاني وقالت: انا وعامر من اللحظة دي مفيش بينا حاجة بينا اطمني.
أروى ابتسمت وسألتها: يعني هتسيبهولي؟
آيات بصتلها والدموع بتنزل من عينيها وقالتلها: اكيد مش هحرمه من ابنه.
بيسان بصت ل آيات بصدمه وقالت: إيه الكلام اللي انتي بتقوليه ده يا آيات!! طب علي الاقل واجهي عامر واسأليه؟
آيات بصت ل بيسان وقالت بأصرار: هسأله عن ايه ؟ تفتكري في راجل ممكن يعترف بغلط زي ده.. خلاص الموضوع منتهي بالنسبه ليا.
أروى ابتسمت وكانت لسه هتقوم عشان تمشي لكن آيات وقفتها: استني لو سمحتي.. كلامنا لسه مخلصش.
أروى بصت لها بدهشة وآيات قالتلها: انتي عرفتي منين ان انا وعامر احتمال نرجع لبعض؟ هو اللي قالك؟؟
عينيها زاغة في المكان بتفكير وتردد وقالت: ااه.. اه هو اللي قالي وعشان كده جيت على اول طيارة وعرفت عنوانك وجيتلك عشان امنعه.
بيسان ردت عليها بغضب: انتي مش لسه قايله قدامي ان مامت عامر اللي قالتلك!!
آيات بصت ل اروي اللي بقى ظاهر عليها التوتر والخوف وقالت أروى بارتباك: اه مامته قالتلي وهو كمان قالي.
آيات هزت راسها وأروى قالت بتأكيد: اتمنى الكلام اللي قولته يفضل بينا لان عامر لو عرف اني جيتلك ممكن يعاند معايا ويرفض يتجوزني رسمي.
آيات هزت راسها بالايجاب وقالت: طبعا متقلقيش.
بيسان بصت ل آيات بصدمة وقالتلها: إللي آنتي بتعمليه ده غلط كبير يا آيات.. عامر مستحيل يعمل حاجة زي كده.
آيات بصتلها وقالت: هنعرف كل حاجة دلوقتي يا بيسان.
سمعوا صوت الجرس وآيات بصت ل أروى وقالت: دا اكيد عامر.
أروى انتفضت من مكانها بصدمة وبيسان بصت ل آيات بدهشة وآيات قامت فتحت الباب وهي بتبص ل عامر وافتكرت إللي حصل اول لما دخلت اوضتها وهي بتبكي ومصدومة من اللي سمعته من أروى..
فلاش باك..
دخلت اوضتها وهي مصدومة وبتبكي ومش قادرة تصدق ان عامر يعمل فيها كده وكان جواها إحساس قوي ان عامر برئ واتصلت عليه وهي بتبكي وعامر اتصدم لما سمع صوتها الباكي.
عامر: آيات انتي بتعيطي ؟؟
ردت ببكاء: عامر انت تعرف دكتورة اسمها أروى كانت بتعالج مامتك ؟
رد عامر بدهشة: اه اعرفها مالها؟
آيات ببكاء: انت وهي حصل بينكم حاجة ؟
عامر باستغراب: حاجة زي ايه مش فاهم ؟ هو انتي فين يا آيات وشوفتي دكتورة أروى فين ؟
ردت آيات ببكاء: هي هنا عندي في الشقة وبتقولي ان هي حامل منك.
عامر بصدمة وذهول: نعم!!!! ايه الكلام الفاضي ده حامل مني ازاي دي مجنونه ولا ايه... آيات خليها عندك متتحركش وانا جاي حالا 10 دقايق وهكون عندك.
آيات وهي بتبكي: يعني انت وهي محصلش بينكم حاجة ؟؟
عامر بصدمة: استغفرالله العظيم.. آيات انتي عايزة تجننيني انتي كمان!! انا هيكون بيني وبينها اي دي كمان! هي المصايب بتجري ورايا في كل مكان ومبقتش عارف الاقيها منين ولا منين.. اقفلي انا جايلك حالا ومتخليهاش تمشي قبل ما اوصل.
باااااك..
عامر دخل وآيات بتبصله وجسمها بيرتجف وخايفه يكون كلام أروى حقيقي وبطمن قلبها ان عامر مستحيل يعمل كده.
أروى جسمها اتجمد لما شافت عامر وبقت واقفه خايفه ومرعوبه وبيسان ابتسمت لما شافت عامر وكانت متأكدة انه هيكشف كذب البنت دي قدام آيات.
آيات قربت من عامر ووقفت جنبه وعامر بص ل أروى واتكلم معاها بنبرة حادة: ايه الكلام اللي قولتيه ل مراتي ده يا دكتورة؟ انا وانتي كان في بينا علاقة امتى؟
أروى وقفت مصدومة ومعرفتش ترد وقالت بارتباك: انا.. انا مقولتش حاجة.. هي بتكدب.
بيسان بصتلها بصدمة وقالت: انتي مجنونه ولا ايه.. انا كنت موجودة وسمعت كل الكلام اللي قولتيه..
وبصت ل عامر وقالت: انا كنت موجودة يا عامر وهي بتقول ل آيات ان انت وهي حصل بينكم علاقه وكنتوا سكرانين وانت وعدتها بالجواز والطفل اللي في بطنها ده يبقى ابنك.
عامر بص ل أروى بصدمة وقال: وكمان كنت سكران وانا اصلا مبشربش!! وحامل مني كمان!
اتكلمت أروى بصوت مهزوز: دول كدابين.. انا مقولتش كده.. هما اللي قالوا كده عشان هي تسيبك..
وشاروت على آيات وقالت: هي مش بتحبك يا عامر وهي قالتلي كده بنفسها.. انا اللي بحبك وانت بتحبني انا.
عامر بصدمة: بحبك ايه انتي مجنونه!! انتي كنتي بتعالجي امي وانا كنت بتابع حالتها معاكي وعمرنا ما اتكلمنا في اي حاجة غير حالة امي وبس!
بصت على آيات بنظرات كلها كره وقالت: هي دي السبب.. هي اللي كانت شاغله تفكيرك طول الوقت وبسببها مشوفتش انا حبيتك قد ايه.. كل كلمة كانت مامتك بتحكيهالي عنك كانت بتخليني اتشد ليك اكتر.. كنت بتخيل لو انا اللي في حياتك مكانها وكنت بتحبني كل الحب ده اكيد مكنتش هزعلك زيها ابدا.. هي متستحقش تكون في حياتك يا عامر ومتستهلش تعيش.. هي لازم تموت عشان انت تحبني انا...
وفجأة فتحت شنطتها وخرجت منها سلاح وصوبت السلاح اتجاه آيات وعامر أتحرك بسرعه ووقف قدام آيات وآيات كانت خايفه ومسكت فيه وهو بيحميها وحس ان أروى مش طبيعيه.
بيسان شهقت بصدمة وهي مرعوبه من اللي بيحصل وأروي كانت بتبص ل عامر وهي رافعه السلاح وقالت بصوت مهزوز: ابعد عنها يا عامر.. هي مش بتحبك صدقني..
عامر هز راسه وهو بيرد عليها بهدوء: عندك حق يا أروى.. هي فعلا مش بتحبني.. انا اتأخرت لما عرفت الحقيقه دي.. بس انتي لو قتلتيها دلوقتي هتدخلي السجن وانا هتحرم منك.
أروى بصتله وهي بتبتسم وقالت: بجد يا عامر.. يعني انت بتحبني انا وخايف عليا ؟
هز راسه وقال: طبعا يا حبيبتي.
وبدأ يقرب منها عشان ياخد منها السلاح وأروي بتبصله وبتقول بصوت مهزوز: هنمشي من هنا.. هتاخدني ونروح بعيد عنهم.
عامر: طبعا يا حبيبتي بس هاتي ده من ايديكي عشان انا خايف عليكي.
وقرب منها اكتر ومد ايديه عشان ياخد منها السلاح وهي سابت السلاح من ايديها وضمته وهي بتقول: انا بحبك اوي يا عامر.
عامر اخد السلاح من ايديها ورماه بعيد وكتف ايديها الاتنين وقال ل بيسان: بيسان هاتي اي حبل بسرعه..
ردت بيسان بخوف: معندناش حبل!
عامر بصراخ: طب هاتي طرحه من بتوع آيات.
بيسان جريت علي أوضة آيات وأروي حست ان عامر كان بيكدب عليها ومش عارفه تخلص ايديها منه.
آيات وقفت تتابع كل اللي بيحصل بصدمة وهي بتبكي وبيسان رجعت ل عامر بسرعه وفي ايديها طرح من بتوع آيات وعامر ربط ايد أروى وهي بتحاول تخلص نفسها منه وبيسان ساعدته وربطوها في الكرسي وفجأة أروى غابت عن الوعي.
آيات كانت بتتابع كل اللي بيحصل وهي لسه خايفه وبتبكي ومش قادرة تتحرك من مكانها.
عامر ساب أروى بعد ما ربطها في الكرسي واخد السلاح بتاعها من علي الارض واتصل على الدكتور اللي كان متابع حالة والدته في المستشفى في لندن وحكاله اللي حصل من أروى والدكتور قاله ان أروى كانت بتتعالج من فترة كبيرة بسبب ان حبيبها سابها اول لما عرف انها حامل منه وبعتلها رجاله اغتصبوها وضربوها لحد ما حصل اجهاض وهي في الشهر الخامس من الحمل وكانت بتتعالج فترة كبيرة ولما اتحسنت وبقت كويسه رجعت لشغلها تاني وقاله ان ممكن لما والدته حكتلها اللي حصل معاكم حست ان في تشابه في الأحداث اللي حصلت معاها لكن الفرق ان انت قدرت تحمي مراتك وتنقذها ويمكن للسبب ده هي اتعلقت بيك ورجعت حالتها تسوء تاني.
عامر اتصدم من كل اللي عرفه والدكتور قاله انه هيبعتله دكتور من مستشفى في القاهرة دلوقتي ياخدوا أروى لانها لازم تتحجز في المستشفى عشان متأذيش حد.
عامر بص على آيات اللي كانت واقفه بتبكي وهي بتبص ل اروي وخايفه.
قرب منها وضمها لحضنه وهو بيطمنها: متخافيش يا حبيبتي.. في دكتور هيجي ياخدها دلوقتي.
آيات ببكاء: انا مش فاهمه هي ليه عملت كده!
عامر حكالها اللي الدكتور قاله عن حالة أروى وبعد وقت قليل وصل الدكتور ومعاه عربية اسعاف واخدوا اروي وهي غايبه عن الوعي وهما بياخدوها اكتشفوا انها مش حامل وكانت لابسه بطانه على بطنها عشان تظهر انها حامل.
خرجوا من الشقة وآيات وبيسان لسه مصدومين وعامر اتنهد بتعب وقال: انا كنت ناقص مريضه نفسيه تحبني كمان.. والمفروض ان هي اللي عالجت امي.. ربنا يستر بقى.
بيسان ضحكت قالت: والله انا مش عارفه انتوا المصايب بتجري وراكم ولا ايه.
عامر بص ل آيات وبيسان اتكلمت وهي عايزة تسيبهم لوحدهم: انا هروح أعمل حاجة نشربها بعد الرعب اللي عشناه ده.
وراحت بيسان على المطبخ وعامر قرب من آيات وضم وشها ب ايديه واتكلم معاها بحنان: حبيبتي متخافيش خلاص الموضوع انتهى.
آيات بصتله وقالت بخوف: هو احنا ليه بيحصل معانا كده يا عامر!! ليه كل شويه يظهر حد عايز يفرقنا!
اتكلم عامر معاها بحنان: محدش هيقدر يفرقنا طول ما احنا بنثق في بعض يا آيات وبنحكي لبعض كل حاجة بصراحة.. يعني لو مكنتيش وثقتي فيا المرادي وصدقتي كلامها شوفي كنا ممكن نوصل ل فين.
آيات هزت راسها بالايجاب وقالت: صح يا عامر.. انا للحظة كنت هصدقها من غيرتي عليك بس قررت اثق فيك المرادي والحمدلله انت مخيبتش ثقتي فيك وصدقني انا ندمانه على كل مرة مصدقتش فيها انك بتعمل كل ده عشاني وكنت بتحاول تحميني من ناس مفيش في قلوبهم رحمه وانا مكنتش مقدره خوفك عليا وسمحتلهم يفرقونا عن بعض.
عامر ضمها لحضنه بحنان وقال: مفيش حد هيقدر يفرقنا تاني طول ما انتي بتثقي فيا وبتصدقيني.
آيات ابتسمت جوه حضنه وهي حاسه بالأمان وعامر ضمها بحنان وهو بيطمنها انه مش هيسمح لأي حد يفرقهم تاني.
اتكلم وهي في حضنه: عايزين نفرش الفيلا بسرعه بقى عشان نروح بيتنا وتبقي معايا علي طول.
آيات بعدت عن حضنه وقالت بتوتر: وبيسان يا عامر، معقول هنسيبها تعيش هنا لوحدها.
رد عامر: متقلقيش علي بيسان انا اتكلمت مع امجد في موضوعهم وهو قالي انه كلم خاله عشان يقنع والدته وكمان هاجر وشريف هيرجعوا من شهر العسل بتاعهم عشان يتكلموا معاها ويقنعوها وفي أقرب وقت هيجوا يخطبوا بيسان ل امجد وهيتجوزوا علي طول.
آيات ابتسمت بسعادة وعامر قالها بتأكيد: متقلقيش يا حبيبتي كل إللي جاي هيكون احسن ان شاء الله.
رواية مكتوبة على إسمي بقلمي ملك إبراهيم.
بعد مرور أسبوع..
هاجر وشريف رجعوا وقعدوا مع مامت امجد وَقدرو يقنعوها انها توافق على بيسان وفهمت انها مش هتقدر تمنع ابنها عن حبه ل بيسان وخافت تخسر ابنها وقررت توافق وراحت معاه وهو بيتقدم لخطبة بيسان واتفقوا ان الفرح هيكون بعد شهر من الخطوبه وامجد اختار فيلا قريبه من فيلا عامر وفيلا شريف عشان يكونوا قريبين من بعض وبدأت بيسان تجهز في الفيلا بتاعها مع الفيلا بتاع آيات وكانوا البنات فرحانين لانهم هيكونوا جيران ومع بعض علي طول.
رواية مكتوبة على إسمي بقلمي ملك إبراهيم.
بعد اسبوع..
آيات وبيسان كانوا في المول بيشتروا لبس جديد مع بعض عشان حياتهم الجديدة.
بيسان شافت محل وعجبها اللبس اللي فيه ودخلت وآيات معاها وكانت واقفه بتتفرج وفجأة لقوا اللي ظهر قدامهم وقال بصوته الناعم: اهلا بيكم في ميرو وكوكو ستور.
آيات بصتله بصدمة وكوكو صرخ اول لما شافها: اياااااات.. مش معقووووول... تعالي يا ميرو شوفي مين هناااا.
ميرنا جت بسرعه وصرخت اول لما شافت آيات وضمتها وقالت: اياااات.. ايه المفاجأة الحلوة دي.
آيات كانت واقفه مصدومة وبصت حواليها ولقت مكتوب في كل ركن من المحل ميرو وكوكو ستور وحاطين صورة ل ميرنا وكوكو وهما واقفين جنب بعض وكاتبين اسم المحل تحتهم.
بيسان همست ل آيات وهي بتضحك: هما تيمون وبومبا أصحاب المحل ده ولا ايه؟
ردت آيات وهي بتبصلهم بصدمة: شكلهم كده!!
وبصت ل ميرنا وقالت: انتوا اصحاب المحل؟
رد كوكو: ايوا ايه رأيك في ذوقنا.. المحل بتاعنا مش بيدخله غير الاغنيا وبس.
واتكلمت ميرنا: كل اصحابنا بياخدوا لبسهم من عندنا عشان كوكو بيفضل يقولهم ان لبسهم وحش وشكله فقير وهما بيشترو من عندنا عشان يبقى شكلهم اغنيا.
اتكلم كوكو مع آيات: آيات هو انتي لسه فقيرة بعد ما عامر سابك.
بيسان بصتله بصدمة وآيات ردت وهي بتضحك لانها عارفه كوكو ومتعوده علي كلامه وقالت: لا يا كوكو انا وعامر رجعنا لبعض تاني.
كوكو عيونه لمعت وقال: يبقى تشتري كل اللبس اللي في المحل بتاعنا وانا هروح اخد الفلوس من عامر هو عنده فلوس كتير.
ردت ايات: والله كان نفسي اخدمك بس انتوا عارفين انا محجبه واللبس ده مش مناسب ليا بس عجب بيسان وهي هتشتري.
بيسان بصت ل آيات بصدمة وآيات ضحكت وكوكو سألها: وبيسان فقيرة ولا غنيا؟
ردت آيات وهي بتضحك: غنيا طبعا وهتتجوز امجد شريك عامر.. وامجد عنده فلوس كتير هو كمان.
كوكو بص ل بيسان وقالها: انتي لسه واقفه ليه تعالي اقعدي هنا وانا هجبلك كل اللبس اللي في المحل.
بيسان بصت ل آيات بصدمة وآيات كانت بتضحك وكوكو قالها: اختاري اللبس اللي يعجبك وانا هروح الشركة عند عامر عشان يعرف ان احنا بقينا رجال اعمال زي بعض.
آيات كتمت ضحكتها وهي بتقول: رجال وزي بعض انت وعامر!! تمام روحله وعامر هيفرح اوي انكم بقيتو رجال زي بعض!
كوكو بص ل ميرنا: ايه رأيك يا ميرو تيجي معايا ونعرفه كمان اننا اتجوزنا عشان ناخد منه حلاوة جوازنا.
آيات بصتلهم بصدمة: انتوا اتجوزتوا بجد!! ازاي!!
ميرنا ردت علي آيات: اتجوزنا عشان نبقى شركا في كل حاجة.. صح يا كوكي.
رد عليها كوكو: صح يا ميرو.
بيسان كانت مذهولة من كل اللي بيحصل وحاسه انها بتتفرج على فيلم كارتون وميرنا وكوكو مسبوهاش تخرج من المحل غير لما اشترت منهم لبس كتير جدا وخرجت من المحل بتاعهم وهي ندمانه على اللحظة اللي فكرت تدخل فيها المحل بتاعهم وآيات كانت ماشيه معاها وهي بتضحك وبتتخيل شكل عامر لما ميرنا وكوكو يرحوا الشركة عنده ويقولوا له انهم اتجوزوا.... بقلمي ملك إبراهيم.
.... يتبع
الحلقة الجاية هتكون الاخيرة ان شاء الله ♥️🌹
منتظرة رأيكم في التعليقات وياريت تفاعل جامد نودع بيه ابطالنا في الحلقة قبل الأخيرة 😍🌹
رواية مكتوبة على اسمى الجزء الثانى 2 الفصل الحادى والعشرون 21 والأخير من هنا
الرواية كاملة من هنا (رواية مكتوبة على اسمى الجزء الثانى 2)
