📁

رواية مكتوبة على اسمى الجزء الثانى 2 الفصل الحادى والعشرون 21 والأخير بقلم ملك إبراهيم

رواية مكتوبة على اسمى الجزء الثانى 2 الفصل الحادى والعشرون 21 والأخير بقلم ملك إبراهيم

رواية مكتوبة على اسمى الجزء الثانى 2 بقلم ملك إبراهيم

رواية مكتوبة على اسمى الجزء الثانى 2 الفصل الحادى والعشرون 21 والأخير بقلم ملك إبراهيم
رواية مكتوبة على اسمى الجزء الثانى 2


رواية مكتوبة على اسمى الجزء الثانى 2 الفصل الحادى والعشرون 21 والأخير


#الحلقة_الأخيرة

#الجزء_الثاني

#مكتوبة_على_إسمي

#بقلمي_ملك_إبراهيم 

بيسان كانت مذهولة من كل اللي بيحصل وحاسه انها بتتفرج على فيلم كارتون وميرنا وكوكو مسبوهاش تخرج من المحل غير لما اشترت منهم لبس كتير جدا وخرجت من المحل بتاعهم وهي ندمانه على اللحظة اللي فكرت تدخل فيها المحل بتاعهم وآيات كانت ماشيه معاها وهي بتضحك وبتتخيل شكل عامر لما ميرنا وكوكو يرحوا الشركة عنده ويقولوا له انهم اتجوزوا.

---------

في البلد عند عم آيات. 

فارس قعد قدام الحاج إسماعيل والده وهو بيبصله وقال: متأكد من قرارك ده يا حاج.. اصل انا شايف ان الست ميسره دي طول عمرها عايشه في العالي واكيد مش هترتاح في العيشه في البلد هنا!.. انا مش معترض على جوازكم بس حاسس انها مش هتعرف تعيش معانا في البلد وهتزهق بسرعه. 


رد الحاج إسماعيل بثقة: انا اتكلمت معاها في الموضوع ده وهي نفسها تقضي اللي باقي من عمرها في راحة وبعيد عن المدينه ومشاكلها. 


اتكلم فارس: يبقى على بركة الله.. هتكلم عامر امتي؟


رد الحاج إسماعيل: انا متردد شويه اني افاتح عامر في موضوع زي ده.. مش عايزه يفكر اني حطيت عيني على حريمه! 


اتكلم فارس وهو بيضحك: اللي انت بتطلبه ده حلال ربنا يا ابويا والعروسه موافقه وعامر بيحبك ويحترمك واكيد مش هيلاقي ل امه عريس احسن منك. 


اتكلم الحاج اسماعيل بثقة: يعني انت شايف اني افاتحه في الموضوع ده؟


رد فارس: خير البر عاجله.. كلمه دلوقتي وحدد معاه ميعاد نروح نزورهم في البيت ونفاتحه في الموضوع هناك وناخد رأي العروسه بالمرة. 


عم آيات اتحمس واتصل على عامر. 

-------

في شركة الجارحي. 

عامر كان مجتمع مع امجد لوحدهم واتكلم عامر بعد تفكير: امجد.. يضايقك لو انا وآيات عملنا فرحنا معاكم انت وبيسان في نفس القاعة. 


امجد اتحمس وقال: ياريت يا عامر بجد فكرة حلوة اوي.. انت وآيات تعبتوا كتير وتستاهلوا تفرحوا. 


اتكلم عامر بتردد: طب ممكن تاخد رأي بيسان الأول ولو هيضايقها انا هعمل ل آيات فرح في يوم تاني.


اتكلم امجد بثقة: انت عارف بيسان بتحب آيات قد ايه واكتر واحدة هتشجعك انك تفرح آيات وتعملوا فرحكم معانا في نفس الليلة. 


عامر ابتسم وهو بيتخيل آيات بفستان الفرح وقال: خلاص اتكلم مع بيسان وعرفها بس آكد عليها ان الموضوع ده هيكون سر بينا وآيات مش هتعرف غير يوم الفرح وانا هشتري الفستان وهجهز كل حاجة. 


امجد ابتسم بسعادة وقام وقف وقال: اتفقنا وانا هروح أكلم بيسان اعرفها. 


خرج امجد من مكتب عامر وعامر بص قدامه وهو بيفكر في كل الترتيبات اللي هو عايز يعملها في الفرح عشان يسعد آيات. 


تليفونه رن برقم عم آيات. 

عامر ابتسم و رد على طول: ازيك يا عمي اخبار حضرتك ايه.. انا كنت لسه بفكر فيك وكنت هكلمك عشان ابلغك بخبر حلو. 


رد الحاج إسماعيل: خير فرحني؟


عامر: انا وآيات علاقتنا اتحسنت الحمدلله والاسبوع الجاي هيكون فرحنا عشان نبدأ مع بعض حياتنا من جديد وتدخل بيتي وهي بفستان فرحها. 


رد الحاج إسماعيل: بسم الله ما شاء الله ربنا يفرحكم يابني ويصلح حالكم.. 

وكمل كلامه بتردد: وكان في موضوع كنت عايز أكلمك فيه يا عامر.


عامر بقلق: خير يا عمي اتفضل. 


عم آيات مقدرش يقوله في التليفون وقال: بكره ان شاء الله هنيجي انا وفارس ابني نزورك في بيتك عشان نعرف نتكلم لان الكلام في التليفون مش هينفع. 


رد عامر بدهشة: تنورو في اي وقت وانا هكون في انتظاركم. 


انتهت المكالمه وعامر كان مستغرب وحاسس ان عم آيات عايز يتكلم معاه في موضوع مهم. 

شرد دقايق وهو بيفكر وفجأة سمع صوت دوشة برا وباب مكتبه اتفتح باندفاع وكوكو بيصرخ بصوته الناعم والسكرتيرة بتاع عامر بتحاول تمنعه من الدخول. 

كوكو: عامر قول للبنت الفقيرة دي تسيبني ادخل هي مش عارفه انا ابقى مين!!! 


واتكلمت ميرنا: البنت السكرتيرة دي لازم تترفد يا عامر. 


عامر بصلهم بصدمة وضحك وقام من مكانه والسكرتيرة بتقوله بعتذار: انا اسفه يا باشمهندس بس هو والبنت اللي معاه دي دخلوا بطريقه همجيه وانا قولتلهم ان مينفعش يقابلوا حضرتك قبل ما أعرف سبب المقابله. 


عامر ضحك وقالها: انا عارف سبب المقابله دول مبيجوش هنا غير لسبب واحد.. خلاص سيبيهم انا هشوفهم عايزين ايه. 


السكرتيرة سابتهم يدخلوا وهي بتبصلهم بشمئزاز وكوكو صرخ فيها: اخرجي برا يا فقيرة انتي واقفلي الباب احنا رجال اعمال زي بعض وعندنا اجتماع مهم. 


عامر ضحك وهو بيبصلهم وبعدين رسم الجديه على ملامحه وقال: لو جاين تاخدوا مني فلوس انا مش هديكم حاجة دا اولا عشان متتعبوش نفسكم علي الفاضي.. وبعدين ايه حكاية احنا رجال اعمال زي بعض دي!!


رد كوكو بثقة: انا وانت يا عامر بقينا رجال اعمال زي بعض. 


عامر بص له بصدمة وقال: رجال زي بعض بمعني ايه ؟؟


ردت ميرو: احنا فتحنا مشروع يا عامر وبقينا اصحاب اشهر ستور. 


اتكلم كوكو: وكل اصحابنا بيشتروا لبسهم من عندنا احنا بس. 


عامر هز راسه وهو بيبتسم وقال: براڨو عليكم واخيرا اشتغلتوا.. طب ستور بتاعكم ده بيبع ايه؟


رد كوكو بثقة: ملابس للاغنيا بس. 


عامر بدهشة: ايه ملابس الاغنيا دي!! ؟


ردت ميرنا: يعني مش بندخل المحل بتاعنا غير الاغنيا بس. 


عامر ضحك وهز راسه وقال: تمام مفيش مشكله المهم بقى عندكم مصدر دخل غيري.. وانتوا عرفتوا منين ان انا رجعت. 


رد كوكو: من آيات. 


عامر بص له ب انتباه اول لما سمع اسم آيات وسأله: وانتوا شوفتوا آيات فين؟


ردت ميرنا: هي جت المحل بتاعنا مع صحبتها اللي هتتجوز امجد. 


عامر هز راسه بتفهم وكوكو قال: عامر انت مش مصدق اننا دخلنا آيات المحل بتاعنا عشان هي فقيرة صح ؟


رد عامر عليه بغضب: انت بتقول ايه يا متخلف انت!! انت بتقول على مراتي فقيرة..

واتعصب عليهم وقال: بقولكم ايه انتوا الاتنين روحوا يلا المحل بتاعكم انا مش فاضيلكم.


أتكلم كوكو: وفلوسنا!! 


عامر بص له بدهشة: فلوس ايه ؟


رد كوكو وهو بيمسك ايد ميرنا: حلاوة جوازنا انا وميرو. 


عامر بصلهم بصدمة وقال: جواز مين من مين!!!


ردت ميرنا: انا وكوكي اتجوزنا وبقينا شركا في كل حاجة. 


عامر بصدمة: جواز جواز بجد يعني وكتب كتاب ومأذون وشهود وليلة دخله ؟! 


كوكو وميرنا بصوا لبعض وقالوا: ايه الحاجات البلدي دي.. احنا روحنا للمأذون واصحابنا عملونا حفله علي حسابهم تجنن. 


رد عامر؛ المهم ان في جواز! 


كوكو بص ل ميرنا وقال بفخر: بس انا كان لبسي احلي من ميرو وكل اصحابنا قالولي ان انا كنت أجمل منها. 


عامر بدهشة: ليه هو مين فيكم كان العروسه؟ 


ميرنا بصت ل كوكو بزعل وقالت: كوكو عيب تقول كده انا كمان كنت جميله. 


وبصت ل عامر وقالتله: انا هجبلك الصور بتاعنا يا عامر وانت احكم بينا وقول مين فينا كان احلى. 


رد عليها كوكو: انا كنت احلي منك يا ميرو يا حقوده. 


عامر بنفاذ صبر: بقولكم ايه انتوا الاتنين انا مش فاضي للرغي بتاعكم ده.. انتوا عايزين حلاوة جوازكم خلاص هبعتهالكم وامشو بقى صدعتوني. 


كوكو مسك ايد ميرنا وقاله: ياريت متأخرهاش يا عامر عشان احنا مش بنشحت.. وفين مكتب اللي اسمه امجد ده عايزين ناخد منه فلوس الحاجة اللي خطيبته اشترتها مننا. 


عامر زعق فيهم: روحوا للسكرتيرة برا هتوصلكم ل مكتب امجد. 


اتكلم كوكو مع ميرنا: يلا يا ميرو احنا معندناش وقت نضيعه احنا رجال اعمال وعندنا شغل كتير. 


ميرنا ردت عليه: يلا يا كوكي. 


خرجوا الاتنين وعامر قعد على مكتبه وهو بيضحك وبيسأل نفسه ازاي دول أتجوزو! 

واتصل على آيات وقالها: ايه المصبتين اللي انتي بعتيهم لي دول؟


آيات كانت في الشقة واول لما سمعت عامر فهمت ان كوكو وميرنا راحوا عنده وقالت وهي بتضحك: هما تيمون وبومبا جم عندك ؟؟


رد عامر وهو بيضحك: دول جننوني.. ليه قولتيلهم ان انا رجعت كنتي سيبيهم فاكرين ان انا مهاجر ومش راجع تاني. 


آيات ضحكت وقالت: انا مليش دعوه كوكو قالي ان انت وهو بيقيتوا رجاال اعمال زي بعض. 


عامر بغيظ: والله! 


آيات ضحكت بصوت عالي وعامر ضحك وقالها: ماشي يا آيات اضحكي برحتك كلها أسبوع ونشوف الموضوع ده... 


فجأة باب مكتب عامر اتفتح بقوة ودخل امجد وهو بيبصله بصدمة وقال: ايه المجانين اللي انت باعتهملي دول!!! 

رواية مكتوبة على إسمي بقلمي ملك إبراهيم.

اليوم التالي. 

عامر عرف آيات ان عمها طلب يزوره في بيته النهاردة وعامر مش عارف إيه سبب الزيارة. 


آيات شكت ان عمها ممكن يكون عايز يزور عامر عشان ميسرة واتصلت ب عمها وسألته وعمها قالها انها هتعرف كل حاجة لما تروح معاهم وطلب منها انها تجهز وتستناهم عشان هتروح معاهم بيت عامر. 


آيات عرفت عامر انها هتيجي مع عمها وده زود فضول عامر انه يعرف سبب الزيارة. 


في البيت عند ميرفت وميسرة. 

ميرفت وميسرة هما بس اللي كانوا عارفين سبب الزيارة وميسرة كانت بتستعد زي اي عروسه وهاجر وشريف راحوا هما كمان. 


في المساء.. 

عامر استقبل عم آيات وفارس وهدير مرات فارس وآيات اللي دخلت وهي بتبص ل عامر بتوتر بعد ما عرفت من هدير سبب الزيارة. 


عامر كان ملاحظ توتر وارتباك غريب عليهم وقعدوا كلهم وبعد لحظات قليله دخلت ميسره وهي لابسه فستان لونه فاتح وحاطه على شعرها حجاب بنفس اللون وشايله صنيه عليها شربات.. 

شريف اول لما شافها بص ل عامر وقال: مين دي؟


عامر بص  ل امه بصدمة وهو مش مصدق اللي عيونه شايفاه وصحيح امه دايما بتفاجأه بس المرادي غير!! 


ميسره قدمت الشربات وهي مكسوفه وعامر بيبص ل امه ولسه مصدوم وفاق من صدمته على صوت فارس وهو بيقول: احنا جايين النهاردة نطلب ايد ميسره هانم ل أبويا الحاج إسماعيل.


هاجر ضحكت بصوت عالي وشريف بص لها بغضب وكتمت ضحكتها ب أيديها. 


عامر بص لهم بصدمة وبص ل آيات اللي كانت كاتمه ضحكتها هي كمان وهزت كتفها بمعنى انها متعرفش حاجة. 


الحاج اسماعيل اتكلم وهو بيبص ل عامر: عامر يا بني.. سواء قبلت او رفضت انت هتفضل عندي زي ما انت... 


قاطعته ميسره بلهفه وقالت: لا يرفض ايه..!!


هاجر ضحكت تاني بصوت عالي والمرادي آيات هي كمان ضحكت وهدير معاهم. 


عامر بص ل امه بصدمة .. 

ميسره قعدت وقالت بخجل: انا واسماعيل بنحب بعض. 


الحاج اسماعيل اتكلم بتوتر: عيب يا ميسرة الكلام ده مش قدام العيال! 


ردت ميسره وهي بتخفض وشها في الأرض: حاضر يا اسماعيل انا مش هتكلم خالص اتكلم انت. 


عامر كان حاسس انه بيتفرج على فيلم وكل اللي بيحصل ده مش حقيقي ومش عارف يرد يقول ايه!! 


فارس اتكلم مع عامر: عامر انا عارف ان الموضوع غريب وانا كمان كنت مستغرب في الاول وقولت ل أبويا ان ميسره هانم عاشت عمرها كله في المدينه هنا وصعب تعرف تعيش في البلد عندنا. 


ردت ميسره: بس انا اتكلمت مع اسماعيل في الموضوع ده وعرفته اني عايزه اقضي اللي باقي من عمري بعيد عن المدينه والمشاكل هنا وأكيد انتوا مش هتسخسروا فينا نعيش اللي باقي من عمرنا مبسوطين!.. 

وبصت ل عامر وقالت: ولا انت رأيك ايه يا عامر؟


عامر مكنش عارف يرد يقول ايه وبص ل خالته ولقاها هزت راسها بالموافقه وبص ل شريف وشريف هز راسه بالموافقه هو كمان وبص للحاج إسماعيل وقال: اكيد انا مش هقف في طريق سعادتكم... مبروك. 


ميسره ابتسمت بسعادة والحاج إسماعيل قال: يبقى على بركة الله.. نكتب الكتاب اخر الاسبوع ده واخد ميسره معانا البلد.


عامر بص ل امه وشافها مبسوطه وقال: زي ما تحبوا. 


عامر بص ل آيات وهي قاعده جنب عمها وكانت آيات بتبصله بحب وهمست له بشفايفها بكلمة "بحبك" 

عامر ابتسم واتفقوا علي كل حاجة والليلة انتهت وكلهم مبسوطين. 

رواية مكتوبة على إسمي بقلمي ملك إبراهيم. 

قبل الفرح بيوم في الشقة عند آيات وبيسان. 

آيات وبيسان كانوا قاعدين مع بعض وحاطين ماسك على وشهم وبيجهزوا نفسهم لبكره. 


عامر اتصل على آيات وقالها انزلي انا تحت البيت وعايزك. 


آيات ردت بتوتر: مش هينفع انزل يا عامر دلوقتي.


عامر بدهشة: ليه مش هينفع تنزلي !!؟ 


آيات بخجل: اصل انا حاطه ماسك على وشي ومش هينفع انزل بيه ومش هينفع أغسله دلوقتي عشان لسه حطاه. 


عامر ضحك وقالها: خلاص هطلعلك انا افتحي الباب. 


آيات بخجل: تطلع فين مش هينفع. 


عامر: معايا حاجة خديها من علي الباب وهنزل علي طول. 


عامر كان معاه فستان الفرح بتاع آيات وكانت لحد اللحظة دي متعرفش انه بكره هيكون فرحها مع بيسان. 


عامر طلع وآيات فتحت الباب وهي بتخفي نفسها ورا الباب ومدت ايديها بس وقالتله: هات. 


عامر شاف أيديها بس من ورا الباب وهي بتخفي وشها.. ضحك ومسك أيديها وشدها من ورا الباب لحد ما بقت قدامه فجأة. 


آيات اتصدمت لانه شافها بالشكل ده وعامر ضحك على شكلها وقال: ايه اللي انتي عملاه ده!؟ 


ردت بغيظ: ملكش دعوه وهات اللي انت طالع عشانه. 


عامر غمز لها بطرف عينيه وقال: مليش دعوه ازاي مش انتي بتعملي ده عشاني. 


ردت بخجل: ملكش دعوه يا عامر هات بقى. 


عامر اداها علبة كبيره جدا وقالها: اتفضلي. 


آيات استغربت وقالت: ايه ده؟ 


عامر: ادخلي شوفيه بنفسك.. انا همشي بقى عشان تلحقي تخلصي الحاجات اللي بتعمليها دي!

ولمس الماسك اللي على وشها وقال: و ده بيعمل ايه؟ 


آيات بصتله بغيظ وقالتله: ملكش دعوه وامشي بقى من هنا. 

وقفلت الباب وهي بتضحك بخجل وبيسان قربت منها وسألتها: ايه الصندوق الكبير ده؟


ردت آيات بدهشة: مش عارفه دا عامر جابه ونزل. 


فتحت الصندوق واتصدمت لما لقته فستان زفاف ابيض جميل ورقيق جدا. 


مسكت الفستان بنبهار وقالت: بتاع مين ده؟


بيسان ضحكت وقالتلها: بتاعك طبعا.. وتقريبا دي اللحظة اللي لازم اعترفلك فيها ان عامر عملك مفاجأة وفرحكم هيكون بكره معانا في نفس القاعة. 


آيات بصتلها بصدمة وقالت: مش معقول!! فرحنا ازاي لا انا هتكسف يا بيسان مش هينفع! 


ردت بيسان بدهشة: تتكسفي من ايه بنتي انتي هتبقي عروسه بكره. 


اتكلمت آيات بخجل: مش هينفع يا بيسان واحنا اصلا متجوزين! 


ردت بيسان: بس معملتوش فرح وطبعا فرحك اللي من كام سنه ده مش محسوب وعامر عايز يفرحك زي كل البنات وهو كمان من حقه يفرح ويشوف حبيبته بفستان الفرح. 


آيات بصت على فستان الفرح وعيونها دمعت وقالت: مش مصدقه يا بيسان.. حاسه اني بحلم.


بيسان قالتلها بسعادة: بلاش نكد بقى وخلينا نفرح أحنا بكره هنبقى عرايس. 

رواية مكتوبة على إسمي بقلمي ملك إبراهيم. 

يوم الفرح. 

في غرفة الشباب. 

عامر وامجد كانوا بيلبسوا البدل وشريف قاعد يبصلهم وقال وهو بيضحك: متوترين كده ليه يا شباب الموضوع سهل متقلقوش واي استفسار انا موجود متتكسفوش مني. 


عامر بص له بغيظ وقاله: نفسي اعرف انت قاعد هنا بتعمل ايه.. مش المفروض تكون تحت تستقبل الناس لحد ما احنا نلبس وننزل. 


رد شريف وهو بيضحك: متقلقش جوز خالتي قايم بالواجب تحت.


عامر بص له بغضب وشريف ضحك وقال: والله الحاج اسماعيل ده مفيش زيه وحاسس ان هو اللي هيصلح حال خالتي.. دا انا كمان عرفت انه هياخدها ويعملوا عمره هما الاتنين!! متخيل خالتي ميسره وهي عامله عمره وراجعه توزع علينا سبح وسجادة صلاة. 


وضحك شريف جامد وعامر قرب منه بغيظ وقاله: دا انا اللي شكلي هوزع على روحك يا شريف النهاردة. 


امجد جري عليهم وهو بيخلص شريف من ايد عامر وشريف كان هيموت من الضحك وهو بيتخيل خالته ميسره وهي راجعه من العمره وبتوزع عليهم سبحه وسجادة صلاة. 


امجد قال ل شريف: اخرج برا يا شريف انت جاي تعصبه ليلة فرحه. 


شريف حاول يوقف ضحك وهو مش قادر وعامر غصب عنه ضحك هو كمان وقاله: ماشي يا شريف اضحك برحتك واعمل حسابك ان انا وامجد اجازة من الشغل لمدة شهر وانت اللي هتشيل كل شغل الشركة لوحدك وبيسان وآيات هما كمان اجازة لمدة شهر يعني تعرف هاجر ان هي اللي هتشيل شغل شركة البنات لوحدها هي كمان. 

شريف سكت وبص ل عامر بصدمة. 

امجد ضحك وقاله: كان لازم تضحك يعني.. شيل بقى الشغل كله لوحدك عشان تضحك برحتك. 

رواية مكتوبة على إسمي بقلمي ملك إبراهيم. 

في غرفة البنات. 

آيات وقفت تبص لنفسها بفستان زفافها الرائع مع الحجاب والطرحه الطويله وتاج رقيق كان بيزين حجابها وكانت رقيقه جدا وجميله. 

وبيسان وقفت قدامها بفستانها اللي كان جميل ولايق عليها جدا وهاجر بصتلهم هما الاتنين وقالت بسعادة: بسم الله ماشاء الله انتوا الاتنين اجمل من بعض.. متحمسه أشوف امجد وعامر لما كل واحد فيهم يشوف عروسته. 


آيات بصتلهم بتوتر وقالت: انا متوتره جدا وحاسه برعشة في رجلي وكأني بتجوز لأول مرة. 


ردت عليها هاجر: انتي فعلا بتتجوزي لأول مرة.. حبيبتي انسي اللي فات بقى وخليكي في فرحك وعريسك اللي بيموت فيكي. 


بيسان قالت وهي بترتجف: اومال انا اعمل ايه انا جسمي كله بينتفض.. مش متخيله ان انا وامجد هنكون مع بعض ويتقفل علينا باب واحد.. انا حاسه ان هيغمى عليا. 


هاجر ضحكت وقالتلها: لا بقولك ايه امسكي نفسك كده دي ليلة العمر ومش هسمحلك تضيعيها على أخويا. 


بيسان بصتلها بغيظ وقالت: يعني انتي بتفكري في اخوكي وانا صحبتك مش مهم! 


آيات ضحكت وقالت: بقولكم ايه ده مش وقت خناق انا متوتره جدا وحاسه ان اول لما الباب يخبط انا هنط من الشباك. 


سمعوا خبط علي الباب اول لما آيات خلصت كلامها وايات وبيسان بصوا لبعض بصدمة وهاجر ضحكت وقالت: نطوا بقى انتوا الاتنين من الشباك. 


وقامت فتحت الباب ولقت أخوها وعامر. 

بصتلهم وضحكت وقالت: ادخلوا خدوا المجانين دول عشان عايزين ينطو من الشباك.


امجد وعامر دخلوا وآيات وبيسان كانوا ماسكين ايد بعض بخوف. 


عامر اول لما شاف آيات انبهر بجمالها بالفستان الابيض وحس ان قلبه هيطلع من مكانه من شدة حبه ولهفته عليها ومقدرش يبعد عينيه عنها. 


امجد كان واقف جنب عامر وعيونه على بيسان ومش قادر يبعد عيونه عنها من شدة جمالها وهي دي اللحظة إللي عاش سنين يحلم بيها. 


هاجر قربت من آيات وبيسان وقالتلهم: يلا يا حلوين سيبوا ايد بعد وكل واحدة تروح تمسك ايد جوزها. 


آيات وبيسان كانوا واقفين متجمدين وامجد اتحرك وقرب من بيسان وقالها: يلا يا بيسان متخافيش انا معاكي. 


بيسان قالت بخجل: انا متوتره بس شويه. 


امجد مد ايديه ليها وبيسان حطت ايديها في أيديه وخرجت معاه. 


هاجر بصت ل عامر وآيات وقالتلهم: يلا انتوا كمان عشان منتأخرش على المعازيم.. انا هسبقكم على تحت. 


وخرجت هاجر من الاوضه وعامر قرب من آيات ولاحظ ايديها بترتجف جامد وهي بتضغط علي فستانها من شدة التوتر والخوف وقالها: آيات.. انتي خايفه مني؟ 


ردت آيات بتوتر: انا حاسه ان هيغمى عليا من شدة التوتر والخوف يا عامر وكأننا بنتجوز لأول مرة. 


رد عامر بعد ما قرب منها ومسك أيديها اللي كانت بترتجف وزي التلج: حبيبتي انا كمان حاسس اننا بنتجوز لأول مرة وده مفرحني لاننا بنبدأ مع بعض من جديد والنهاردة اتحقق حلمي وشوفتك بفستان الفرح والدنيا كلها هتعرف ان انتي مراتي وحبيبتي ومكتوبه على إسمي لاخر يوم في عمري. 


آيات ابتسمت بخجل وعامر قبّل أيديها بحب وقالها: اوعدك ان انا هعمل كل اللي اقدر عليه عشان اسعدك وتكوني دايما حاسه ب امان ومطمنه. 


ردت آيات بحب: انا بكون مطمنه بوجودك انت وبس يا عامر.. انت اجمل هدية ليا من ربنا. 


عامر ضمها بحب وقال من قلبه: ااه يا آيات.. لو تعرفي انا بحبك قد ايه. 


آيات ابتسمت جوه حضنه وهي حاسه بالأمان. 


هاجر خبطت علي الباب وقالت: المعازيم نامو تحت يلا انزلوا. 


آيات بعدت عنه بخجل وعامر مسك أيديها وقالها: جاهزة. 


هزت راسها بالايجاب وعامر اخدها من أيديها ونزلوا. 

-------

في القاعة.

أضواء القاعة انطفت وعامر وآيات وامجد وبيسان دخلوا مع بعض وكل المعازيم كانوا بيحتفلوا بيهم والكل فرحانين. 


بيسان وامجد رقصوا مع بعض على اغنيه رومانسيه وعامر وآيات قعدوا وآيات قالتله بخجل: أسفه يا عامر انت عارف ان انا هتكسف ارقص معاك قدام الناس كده. 


عامر مسك أيديها وقبّلها بحب وقالها: يا حبيبتي احنا عندنا بيتنا ترقصي معايا فيه برحتنا علي ضوء الشموع من غير ما حد يشوف مراتي حبيبتي وهي جوه حضني. 


آيات بصتله بخجل وقالت: عامر انت بتقول ايه عيب كده علي فكره. 


عامر ضحك على خجلها وقاطع كلامهم صوت دكتور مالك وهو واقف قدامهم. 

مالك بأبتسامة: الف مبروك يا باشمهندس عامر.


عامر وقف وسلم عليه بهدوء ومالك اتكلم مع آيات بتحفظ: مبروك يا آيات. 


ردت آيات عليه بتوتر: شكرا يا دكتور. 


أتكلم مالك قبل ما يمشي من قدامهم: بتمنلكم حياة زوجيه سعيدة.. الف مبروك. 


ومشي مالك وعامر قعد جنب آيات تاني وآيات كانت مستغربه ان مالك جه فرحهم ولقت عامر بيقولها: انا اللي عزمته. 


آيات بصتله بدهشة: انت اللي عزمته بجد؟! 


رد عامر وهو بيضغط علي شفايفه بغضب من شدة غيرته عليها: انا قابلته واتفهمت معاه وعرفته ان انتي مراتي. 


آيات بصت ل عامر بتوتر وقالت: عادي يعني انا بالنسبه له طالبه زي اي طالبه عنده. 


عامر رفع حاجبه وقالها: اه ما انا كنت واخد بالي. 


آيات ضحكت بسعادة وقالت: بحبك وانت بتغير عليا.. بيبقى شكلك حلو اوي. 


عامر بص لها بغيظ وسكت وآيات ضحكت وقالت: بحب أشوف عروق أيدك البارزة دي وانت بتضغط على أيديك عشان تتحكم في غضبك لما بتغير عليا. 


عامر ضحك وقال: دا انتي متابعه بقى ومركزه معايا وانا مش واخد بالي.


آيات قالت بابتسامه وخجل: اه طبعا متابعه ومركزه. 


عامر ضحك وقال: الكلام بينا مش نافع هنا خالص احنا عايزين نروح بيتنا عشان نعرف نتكلم برحتنا.


آيات ابتسمت بخجل. 

ميسرة قربت منهم وقالت: يلا قوموا عشان نتصور الصورة الجماعيه مع بعض. 

عامر وآيات قاموا معاهم ووقفوا وكل واحد فيهم كان جمبه مراته. 

آيات وعامر ، وشريف وهاجر، وبيسان وامجد 

وفارس وهدير، والحاج اسماعيل وميسره

ومامت شريف ومامت امجد 

ولسه المصور هيصورهم سمعوا صوت كوكو وميرنا وهما بيصرخوا. 

كوكو وميرنا: استنوووا احنا كمان هنتصور معاكم. 

وقعدوا كوكو وميرنا علي الارض قدامهم واخدوا كلهم صورة جماعيه وكلهم فرحانين وبيبتسموا بسعادة... بقلمي ملك إبراهيم. 

... يتبع 


رواية مكتوبة على اسمى الجزء الثانى 2 الخاتمة من هنا

الرواية كاملة من هنا (رواية مكتوبة على اسمى الجزء الثانى 2)

روايات شيقة ❤️
روايات شيقة ❤️
تعليقات



close