رواية الشيطان الروسي الفصل الأول 1 بقلم الملف الأسود
رواية الشيطان الروسي بقلم الملف الأسود
الملف الأسود | الشيطان الروسي - الجزء الأول
ولد في 22 يناير 1869 في قرية « بروكونو » سيبيريا حاليا
في يوم من الأيام، في واحده من القرى الروسيه البعيده…
كان في صريخ بيشقّ الهوا.
مجموعة فلاحين بيجروا ورا صوت الميّه… طفلين وقعوا في النهر.
المياه كانت عنيفه، بتشدهم بقوة، وبتحدفهم في الصخور.
الفلاحين بيحاولوا يلحقوهم، لكن التيار أسرع…
وهم بيجروا، فجأه الاتنين بيختفوا من قدّامهم، وبيقعوا من الشلال.
نزلوا بالعافيه علشان يدوروا…
لقوا طفل نايم فوق صخرة، جسمه ميت، وعينه مفتوحه على الآخر…
العين كانت مرعوبة، كأنها شافت كابوس قبل الموت.
في دم نازل من راسه… بس مفيش نفس، خلاص.
أما الطفل التاني…
اختفى.
فضلوا يدوروا عليه ساعات، مفيش أي أثر، لحد ما…
من بين الشجر…
الطفل بيخرج.
واقف، مبتل من الميّه، وشه شاحب، وبيبص لنقطة واحده جنب النهر…
مرعوب… لأ، ده مش رعب عادي.
الفلاحين جريوا عليه، بس هو مش بيتكلم.
مفيهوش خدش. مفيش كدمة.
لكنه متجمّد مكانه، وعينه ثابتة على نفس الزاوية…
لما بصّوا في الاتجاه ده…
ماكانش في حاجه.
لكن هو… هو شايف.
شايف كيان… كيان أحمر، واقف وبيضحك بطريقه مريبه.
ضحكة خبيثة، ملعون فيها الشيطان نفسه.
من اليوم ده، الطفل ما اتكلمش تاني.
أسابيع ساكت.
وبعدها… لما بدأ يتكلم، كلامه كان قليل.
غريب.
بيقول كلمات ملهاش معنى.
بيرسم رموز مش مفهومه.
وبيبعد عن الأطفال، كأنهم غرب.
الناس بدأت تلاحظ إن الطفل ده مش طبيعي…
لكن محدش يعرف، إنهم قدّام بداية أكبر لعنة شافتها روسيا…
الطفل ده… كان اسمه "غريغوري راسبوتين"
اللي هيبقى بعد كده…
الشيطان الروسي.
يتبع
لقراءة باقي فصول الرواية اضغط هنا( رواية الشيطان الروسي )
