روابة جوازة صالونات الفصل السادس والأربعون 46 بقلم ندى علي حبيب
رواية جوازة صالونات الفصل السادس والأربعون 46
" جوازة صالونات "
" البارت السادس والاربعون "
" الكاتبه ندي علي حبيب "
" بدأت الايام تمر يوم ورا يوم ايام متشابهه جدا مفيش تجديد فيها مر ٣ شهور ومش كل ساعه بتمر علي نهال شوقها لأدهم بيزيد، ادهم ميقلش عنها حاجه مراته وحشاه لدرجة انه كارهه الشغل اللي بسببه هو بعيد عنها وعن حضنها "
" اشرقت شمس تحمل في حرارتها اشراقه ليوم طويل من ايام فصل الصيف، نهال كانت نايمه في سريرها في شقتها قامت من النوم بكسل علي حركه في بطنها "
نهال بنوم وهي بتحسس علي بطنها: فايق بدري ليه يقلب امك " اتاها ركله من الصغير " طايح في بطني ليييه من الصبح فهمني " وشافت الساعه كانت خمسه الفجر راحت رنت علي ادهم "
ادهم اول ما شاف رنتها فاق من النوم بقلق: ايوا يا نِهال في حاجه بتوجعك ولا ايه؟ اطلع امي؟
نهال ببتسامه: اهدي يحبيبي انا كويسه والله بس المفعوص ابنك نازل رفص في بطني صحاني قولت بما ان صحيت استغل جوزي قبل ما يتسحل في شغله ومعرفش اكلمه غير صُدف
ادهم رجع اتعدل علي سريره واتنهد براحه وقالها بحنان: استغلي يقلبي استغلي انا عندي كام نِهال يعني دي هي واحده وحقها تدلع عليا كمان وكمان
نهال بحُب: يلهوي علي كلامك اللي بيوديني في داهيه " وقالت بحماس " ادهم انا اختارت اسم..
ادهم بملل: هنرجع تاني نتخانق علي الاسماء يابنتي كفايه من يوم ما عرفتي انه ولد واحنا بتختار في اسماء والاخر تقولي وحش سبيها لله وهو هيجي بإسمه
نهال بتكشير: ازاي يعني هيتولد مسمي ادهم قول كلام يتعقل بعدين هيحصل ايه لو وافقت علي اسم ' إيلان ' دا تحفه
ادهم بعتاب: استحلفك بالله يا شيخه دا اسم راجل؟ يعني يكبر ويبقي راجل بدقن وشنب طول بعرض كدا واسمه إيلان؟ دا حتي عيب
نهال بضيق: ما شاء الله إيلان مش عاجبك وصالح عاجبك؟
ادهم بضحكه خفيفه: اسم جدي...بعدين اسم مفهوم ولايق علي هيئة الراجل
نهال: مفهووم بس قديم انا عايزه اسم كريتيف كدا يا ادهم
ادهم بقتراح: ايه رأيك في اسم ' عيسـي'
نهال بتفكير : عيسي ادهم سالم...طب تصدق حلو عجبني وكمان كان عاجبني اسم ' شُعيـب ' بس عيسي حلوه نعتمده
ادهم ببتسامه: نعتمده يا احلي وارق ام عيسـي في الدنيا كلهاا
نهال ابتسمت اوي: ادهم انا بحب عيلتنا اوي وبحب التفاهم اللي بيني وبينك طول عمري بتمني شخص وقت ما يغلط يعترف بغلطه ويعتذر ربنا بعتلي شخص بيعتذر علي اغلاطي واغلاطه فعلا انت بتصلـح حجات انت مبوظتهاش يا ادهم
ادهم كلام نهال نفسه بيحضنه فقال بحب: انا لحد النهارده مش عارف استحملت الـ ٣ شهور دول وانا بعيد عنك ازاي
نهال ضحكت بخفه وقالت بدلع: فاتو علشان انا مش محسساك ان غايبه عنك بينا بلاد ومسافه اه بس اقرب لبعض اكتر ما كنت هنا " وحست بضربه في بطنها فـَ اتألمت " يابن الكلــب
ادهم كان مبتسم علي كلامها بعدين اتصدم بشتميتها: دا مين بن الكلــب دا !
نهال بغيظ: هيكون مين يعني يا ادهم ابنك بيرفص في بطني ولا همه حـد ملعب ابووه هوو
ادهم بدهشه: ابنـك ؟ ملعـب ابوه ! والكلـب دا اللي هو انا يعني صح ولا انا فاهـم الموضوع غلط؟
نهال ادركت اللي قالتله بعدين قالت بأسف: سوري يا ادهم والله الكلمـه طلعت غصب عني..بعدين ابنك اللي ضربني جامد في بطني
ادهم بحنـان: معلش يا قلب ادهم يجي بس هو بالسلامـه وانا هطلعلك ميتين امـه
نهال بعتراض: واشمعنـا امـه بقـا ياسـي ادهم ؟
ادهم: ما انتي شتمتي ابووه ومتكلمتش اشمعنـا زعلتي بقـااا بعدين قافله الكاميرا ليه؟
نهال عدلت نفسها علي السرير وفتحت الكاميرا وقالت بسرسجيه: احلااا مساا عليك يا ولااا يا جوزي
ادهم اندهش من طريقتها لكن سايرها: مساء ايه بقا دا احنا لسه ٨ الصبح دلوقتي بنقول صباحك ورد يا ريس صباحك عِنـاب يا كبير كدا يعني
نهال ضحكت وقالت: صباحك سُكـر ابيض يـَ دوووومي
ادهم ركز علي بطنها اللي باينه وقال: قومي وريني بطنك كدا
نهال قامت ثبتت الكاميرا علي بطنها الكبيره وحطت ايدها عليها: بقيت قد البطريق يا ادهم " وضحكت بخفه "
ادهم ابتسم علي شكلها: اجمل واحلا بطريق شوفته في حياتي..
" مكالمتهم فضلت لحد ما ادهم حس ان اتأخر علي شغله فـ قفل معاها ونزل علي شغله، ونهال فضلت نايمه علي السرير هيمانه في كلامه لحد ما حست بجوع قامت تعمل اكل "
...............................
" صلاح نايم في سريره ومراته في حضنه وايده بتلعب في شعرها وبيدندن بدرومانسيه "
صلاح قرب لودنها وهمس: وان كـان امـل العشـاق القـرب ، انـا املـي في حبـك هـو الحـب
نوال ضميته لصدرها بعشق وقربت لشفايفه وقالت ببتسامه : وان غبـت سنـه انـا برضـه انـا لا اقـدر انسـاك ولا ليـا غنـاا
صلاح ضحك بخفه وضمها بحب: هو انا هحبك اكتر من كدا ايه " ودفن نفسه في حضنها "قوليلي هفضل احبك اوي كدا لامتي؟
نوال بدلع: انا عايزاك ديما تحبني عايزاك ديما رامي نفسك في حضني انت اغلا عوض في عمري كله يا صلاح
صلاح بحب: مين فيا عوض مين يا نوال دا انتي النور وسط ضلمة حياتي" ولا هو عايز يقوم من حضنها ولا هي عايزاه يقوم " الساعه كام دلوقتي؟
نوال وهي مغمضه عيونها قالت بإنزعاج: عايز ايه من الساعه يا صلاح خلينا نايمين شويه
صلاح بكسل: مش عايز اقوم وحياتك املي في الحياه اكمل باقي عمري في حضنك لكن ورايا شغل ولسه عايز اعدي علي الكافيه اتابع الدنيا كدا
نوال بضيق: صلاح الكافيه دا بيخليك ترجع وش الفجر من يوم ما فتحته وانا بشوفك صُدف
صلاح قام من حضنها بعجوبه: اعمل ايه الكافيه بيفضل فيه زباين لساعه ٤ الفجر علي ما قفلت وخلصت وجيت " ونزل لمستواها في السرير وباس خدها " حقك عليا بس والله غصب عني قومي بقاا اعمليلي سندوتشات
نوال اتقلبت في السرير بكسل: يعني كافيه طويل عريض مبتعرفش تفطر فيه لااازم اقوم
صلاح وهو بيقلع هدومه: ياستي انا بحب سندوتشاتك مش عايز انا من اكل الكافيه يلااا علي ما استحمي تكوني خلصتي
" صلاح دخل الحمام ونوال قامت بكسل تجهز فطار لجوزها وشغلت اذكار الصباح وولعت بخور في الشقه وكان الجو هادي جدا "
........................................
" سلوي كانت قاعده في البرنده بتفطر هي وسالم ودي عاده في فصل الصيف عندهم الفطار برا في البرنده علي حصيره علي الارض "
سالم بإعجاب: البيض البلدي دا منين يا سلوي؟
سلوي بلعت وبصتله: من تحت الفراخ هيكون منين؟ خد بالك متاخدش عليه علشان البيض دا لنِهال البت الانيميااا مصدقت رفعت عندها شويه
سالم: دا مسمومه لو محدش صحاها واكلها عليها تفضل طول النهار من غير اكل ولا شرب المحمول واكل عقلها خالص جيل هـم
سلوي وهي بتشرب الشاي: هنعمل فيها ايه يعني ادهم ابنك بيدووب في التراب اللي بتمشي عليه بعدين انا هعوز ايه غير سعادته
سالم ببتسامه: يوليه وميحبهاش ليه البت حلوه وزي القشطه ولو ادهم قالها ارمي نفسك في النار هترمي نفسها من غير تفكير وبعدين دمها خفيف ومتشبعيش من القاعده معاها
صلاح نزل وكان في ايده كيس السندوتشات: صباح الخير يغوالي...ابااا محمود ابو رجب بعتلي بيقولي عايز تقاوي بنجر هتديله ولا ايه
سالم: وانت قولتله ان عندنا تقاوي؟
صلاح: انا لسه مردتش عليه قولت اسألك الاول
سالم براحه: طب احسن انك مقولتش ان عندنا الراجل دا مبحبش اتعامل معاه راجل جَـايـف عايز ياخد التقاوي ببلاش
صلاح جاله اتصال من الكافيه فـَ كنسل: ليه احنا سرقينه؟ خلاص انا هقوله خلصنا تقاوي وفضك منه يلاا نهاركم عسل همشي علشان متأخر
" وسابهم ونزل علي شغله ومراته شاورتله من بلكونتها وهو ابتسملها وبعتلها بوسه في الهوا ومشـي علي شغله "
.............................
" نهال واقفه قدام حوض المطبخ بتغسل المواعين سمعت الجرس راحت فتحت وكانت نوال اللي دخلت علطول "
نهال بصت علي شكل نوال المصدوم بستغراب: مالك يابت مصدومه كدا ليه
نوال بتوهان : نهال هوريكي حاجه بس بالله سيطري علي اعصابك كدا
نهال بقلق: في ايه قلقتيني.....
"" انتظرو القادم ""
